Batsah pat məpəla à bakal
16
1 I dəba gà ɓəza Haruna ata ta mata sula akahər ana tar riŋ ta vile a dukw taf tar a Mbulum ka, BATSAH kwa ŋa a gwaɗa a Musa: 2 « Gwaɗa a damər yak Haruna: ‹ Ka da a təv ana tsəɗaŋŋa ndeyndey a, aka dəba madana petek ana tə sas dər ikaba ga ata ya, aka miɗ dukw mahəndəka aka sahər magəsa masla, zləməŋa pəra tsa, tsəka ki mitiŋa. Aɗaba ana i pete a aà ba nda hulɓukw ika gər dukw mahəndəka aka sahər ata ya.3 Aà mada a təv ana tsəɗaŋŋa ya ka, say Haruna a gise a dər mbuluv sla nda hagwala aà ahər. A vile a mbuluv sla ata, aà matawala fəla məpəla à bakal ŋgar. Dite a vile a hagwala aaha dukw taf ŋa aà matawala fəla ana tə dulawa ya. 4 Say a tike akaba andiw leŋ, kwalisaŋ leŋ, slarapa petek leŋ aka dəmkul, mendiwiɗe gər petek leŋ. Gà taŋa ka, gà petek ana tsəɗaŋŋa ya. Say a bere a ba dzekwiŋ na dite a dze akaba ya. 5 Gà mayahaba gər gà Isərayel, ta geseraha a gà vugul sula, nda hagwala ilik. A ti dze a gà vugul ata dukw taf ŋa, biy matawala fəla məpəla à bakal tar. A ta vile a dukw taf hagwala aaha, biy matawala fəla ana tə dulawa ya.
6 Haruna a ti zle a ɗa a mbuluv sla aha aà matawala fəla məpəla à bakal ŋgar, nda mege dər gà dukw ana ta gawa biy mazla ika ba bakal a, ika gər ŋgar ŋa ya, dite ika gà ma ŋgar a. 7 I dəba ŋa ya, a ti ndzike a gà vugul ata sula ya, a ti dze a aka miɗ BATSAH kwa ŋa, aka biye hərmaga ga petek mayahaba gər. 8 I fata ya ka, Haruna a ta ge a tsetse aka gər gà vugul ata sula ya, vugul wara na biy BATSAH kwa ŋa ya, dite vugul wara na biy Azazelª a. 9 I dəba mege tsetse ata ya ka, Haruna a ta pete a à vugul ana tsetse a ɗif dər ka, biy BATSAH kwa ŋa ya, dite a ta vile a dukw taf ŋa, aà matawala fəla məpəla à bakal. 10 Vugul ana tsetse a ɗif dər biy Azazel a ka, a ta tike a aka miɗ BATSAH kwa ŋa riŋ nda are. I dəba ŋa ya, ti deleweha a Azazel aka mandazla a dala, aà mazla dukw bakal ika gà mayahaba gər gà mburma ya.
11 I təv ana Haruna a ti dze ahər a ba ya ka, a vile a mbuluv sla biy matawala fəla məpəla à bakal ŋgar, dite a ta ge a dukw ana biy mazla bakal, ika gər ŋgar a, nda gà ma ŋgar a. A zle a ɗa a mbuluv sla ata biy matawala fəla məpəla à bakal ŋgar. 12 A zle a tətəgwa, a rehe a ɗəm a avir ana akwa ihər, ika gər təv madula aaka duwa ana ika miɗ BATSAH kwa ŋa ya. Dite a ndzike makərɗa dizl ana a ze hwaŋŋa lele ya, dəɗək dəɗək a ahər sula. A de a aà gà dukw ata kweleŋ aka dəba madana petek, a təv ana tsəɗaŋŋa ndeyndey ya. 13 A nde a makərɗa dizl ata aka avir ana akwa ihər i fata ika miɗ BATSAH kwa ŋa. Tsam ka, hədzək akwa kamala hulɓukw a, a kehe a dukw mahəndəka aka sahər magəsa masla ana gà beeliŋ kur iɗəm a. Kamala taŋa ya, na məməta a le a aà Haruna asa tsiye. 14 I fata ya ka, Haruna a zle a məmbəz mbuluv sla ata, a dzeke a aɗəm kəla ahər, dite a gwetsekeye a à məmbəz ata aka gər dukw mahəndəka aka sahər ata, nda kadwa. Dite a gwetsekeye dər sik təsəla aka miɗ dukw mahəndəka aka sahər ata asa.
15 I dəba ŋa ya, a zle a ɗa a vugul ata ta vəl biy matawala fəla məpəla à bakal gà mayahaba gər gà mburma ya. A zle a məmbəz ŋa, aka dəba madana petek ata. A ge a à məmbəz ata kamala na a ge nda məmbəz mbuluv sla ata ya. A gwetsekeye a dər aka gər dukw mahəndəka aka sahər ata, dite ndaka miɗ ŋa asa. 16 A ge a dukw ana biy mazla dukw bakal ika təv ata tsəɗaŋŋa ndeyndey a, aɗaba makula gər gà Isərayel nda mege gà dukw bakal tar ka, aka ne aà təv ata dukw zlaŋgatsak. I dəba ŋa ya, a ge aà ga petek mayahaba gər, kamala taŋa ya mbaŋa. Aɗaba ana ar ka, ika magər gà mburma ana dukw zlaŋgatsak a tar a. 17 Wura mege riŋ i huɗ ga petek mayahaba gər tsa, na akahər ana Haruna a de a a təv ata tsəɗaŋŋa ndeyndey, aà mege dukw ana biy mazla ihər dukw zlaŋgatsak a, haa aka təv ana a dere a iɗəm a. Haruna a ge a dukw ana biy məpəla à bakal ŋgar a, nda ma ŋgar a, dite ika gər gà mayahaba gər gà Isərayel a tserdze. 18 I dəba ŋa ya, a dere a i təv ata tsəɗaŋŋa ndeyndey ya, a sirik a ndara a təv ana, tə dulawa aaka duwa ika miɗ BATSAH kwa ŋa ya. A ge a dukw ana biy mazla dukw bakal ika təv madula aaka dukw ata ya: A tife a məmbəz mbuluv sla ata nda biy vugul, a geye a aka gà mbukum ana aà təv madula aaka duwa ya tiwlik tits. 19 A dzeke a kəla ahər a məmbəz, dite a gwetsekeye a à məmbəz ata, aà təv madula aaka duwa a Mbulum sik təsəla, aɗaba bakal gà Isərayel aka mbər mene à təv ata dukw zlaŋgatsak. Kamala taŋa ya, na Haruna a zle a ihər dukw zlaŋgatsak a, dite təv madula aaka duwa a Mbulum ata a me a aka mene tsəɗaŋŋa biy Mbulum kuɗa ya.
20 I dəba ana Haruna a ndəv aba aà matawala fəla mazla dukw bakal ika təv ana tsəɗaŋŋa ndeyndey ya, aà ga petek mayahaba gər a, nda təv madula aaka duwa a Mbulum a ka, a da gəsara vugul ana a riŋ nda are ya. 21 A ti dze a gà ahər ŋgar sula aka gər dukw gənaw ata, dite a ti ɗeme a gà segeme nda gà bakal gà Isərayel fit aka gər vugul ata. Kərga taŋa ya na, a te miyek a à bakal aka gər vugul ata ya. I fata ya ka, a ta gwaɗa mburma ilik madalawa vugul ata a dala. 22 Vugul ata a zle a akaba gà bakal gà Isərayel tserdze, a ti de a dər aka mandazla a dala.
I təv ana Haruna aka tə slər aba vugul ata a dala ya ka, 23 a mbiɗera gər a huɗ ga petek mayahaba gər a. A ndzike a ika ba gà petek leŋ ana a dza aka ba akahər ana a da a təv ata tsəɗaŋŋa ndeyndey ya. A dze a aà ba a fata ya. 24 A de a bara ba a təv ana tsəɗaŋŋa ya. I dəba ŋa ya, a me akaba aà gà petek ŋgar, dite a ti dere a a bəra ya, aà ma da medze gà dukw matawala fəla ana tə dulawa ya, biy ŋgar ŋa, dite nda biy mayahaba gər gà mburma. Kərga taŋa ya na a geye a gà dukw ana biy məpəla à bakal ŋgar a, nda biy gà mayahaba gər gà mburma ya. 25 I dəba ŋa ya, a dulwe a gà təv məŋgəl gà dukw gənaw ata, tə dza aà məpəla à bakal a, aka gər təv madula aaka duwa.
26 Wele ata a witeha vugul a Azazel a dala aka mandazla ya ka, say a bere a aà gà petek ŋgar a, dite a bere a ba ŋgar, na dite a mbiɗe a gər a təv mandzəba ya. 27 Ti ndzikere a , gà mbuluv sla nda vugul ata tə dza aà matawala fəla məpəla à bakal a, a bəra i təv madzəba ya, ti de a à məmbəz ŋa a təv ata tsəɗaŋŋa ndeyndey a, biy mazla ikəka dukw zlaŋgatsak a. Ta wene a gà bagwa ŋa, gà slu ŋa, nda gà dukw huɗ ŋa. 28 Wele ana a dulwe a ya ka, say a bere a aà gà petek ŋgar a, dite a bere a ba ŋgar, na dite a mbiɗe a gər a təv mandzəba tar a.
29 Araha na məpala ahəm ana ki zezemwim a hiywe ya: Nda mehinne kurwa kiye matəsəla ŋa ka, ki gwim a ndəra dite ki gwim megemir tsa, a kurum gà ɓəzla kwite nda gà slele ana tar mandzaŋa ika magər kurum a. 30 Aɗaba pat ŋa ata ka, ta ge a gà dukw ana biy məpəla à bakal ika gər kurum a, aà məbara a kurum dukw zlaŋgatsak a. Kamala taŋa ya, a pat ata ka, kurum ka, gà dukw zlaŋgatsak bakal asa tsa, na ika miɗ BATSAH kwa ŋa ya. 31 A ne aka kurum a ka, kamala pat Sabba ya, pat mesifikaba ana ki gwim a ndəra ya. Taŋa ka, məpala ahəm ana a ndze a aà biybiy ya.
32 Aka miɗ mba ka, wele ana a geyewa gà dukw məpəla à bakal a ka, a ta ge a ka, mala məbatsa duwa a Mbulum ana tàa tike a akahər a, tàa mbəɗar mal a gər, biy mene à ŋgat batsah mala məbatsa duwa a Mbulum avukw dede ŋgar a. A ti dze akaba a ka, gà petek leŋ ana tsəɗaŋŋa ya. 33 A ti tewele a, gà dukw məpəla bakal biy təv tsəɗaŋŋa ŋana ndeyndey ya, biy ga petek mayahaba gər, dite nda biy təv madula aaka duwa. A ti tewele a gà dukw məpəla à bakal, biy gà ɓəzla məbatsa duwa a Mbulum, dite biy gà mayahaba gər gà Isərayel fit tserdze. 34 Taŋa ka, məpala ahəm ana mehitse dər ŋa, aà biybiy ya. Say ki zezemewimiŋa biy məpəla à bakal kurum gà Isərayel fit tserdze, sik ilik i huɗ mive ya › . »
Ta gəs ahəm aà gà məpala ahəm ana BATSAH kwa ŋa a tsik a Musa ya.