Dukw zlaŋgatsak gà asləka
15
1 BATSAH kwa ŋa a gwaɗa a gà Musa nda Haruna: 2 « Tsikum a gà Isərayel : ‹ Na bəla wura didwe aka zlalara ihər a nda dukw gà tsir a ka, aka ne à ŋgat dukw zlaŋgatsak. 3 Didwe ata aka zlalara ihər a, kige tsa a zlalara ihər a tsa. Gà dukw ata sula ya ka, aka ne à wele ata dukw zlaŋgatsak. 4 Zləma sləlah ana wele ata aka həna aaka ya, təv mendzena aka ndza aaka ya, tàa neye gà dukw zlaŋgatsak. 5 Na bəla wura aka ləm a sləlah ata ka, say a bere a, aà gà petek ŋgar a. Dite ŋgat ŋa a bere a ba ŋgar i bəɗ a fit. A ndze a i dukw zlaŋgatsak ŋa haa hawa. 6 Na bəla wura ŋa, aka ndza aka təv mendze wele ata, duwa a zlalara ihər a ka, a bere a ba ŋgar fit i bəɗ a, a ndze a i dukw zlaŋgatsak tsikw a hawa. 7 Na bəla wura aka ləm a wele ata duwa a zlalara ihər a ka, say a bere a aà gà petek ŋgar a, dite a bere a aà ba ŋgar i bəɗ a fit. A ndze a i dukw zlaŋgatsak ŋa tsikw a hawa. 8 Na bəla wele ata duwa a zlalara ihər a, aka tif tisle aà wele ana dukw zlaŋgatsak ihər tsiye ka, say wele ata a bere a aà gà petek ŋgar a, dite a bere a ba ŋgar i bəɗ a fit. A ndze a i dukw zlaŋgatsak ŋa tsikw a hawa. 9 I təv ana wele ata duwa a zlalara ihər a, aka da a mesiweye ya ka, lidza ana a dza aka duwa a ndza aaka ya ka, aka ne dukw zlaŋgatsak. 10 Na bəla wura aka ləm aà zləməŋa dukw ana wele ata, aka ndza aaka ya ka, aka ne aà ŋgat dukw zlaŋgatsak mbaŋa. A ndze a i dukw zlaŋgatsak ŋa tsikw a hawa. Na bəla wura aka zla aà gà dukw ata ya ilik ka, say a bere a aà gà petek ŋgar a, dite a bere a ba ŋgar i bəɗ a. A ndze a i dukw zlaŋgatsak ŋa tsikw a hawa. 11 Na wele ata duwa a zlalara ihər a, aka ləm aà wura aka bara ahər zukw tsəka, say wele ata a bere a aà gà petek ŋgar a, dite a bere a ba i bəɗ a fit. A ndze a i dukw zlaŋgatsak ŋa tsikw a hawa. 12 Na wele ata duwa a zlalara ihər a, aka ləm aà mesigire dwaɗwa ka, say ta keɗe a iɗəm à mesigire ata ya. Na ta papəz dukuməŋa, biy dizl ka, say ta bere a ihər a nda yam a.13 I təv ana wele ata dukw zlaŋgatsak ihər a, didwe a zlelere a ihər a asa tsiye ka, say a veve a mehinne təsəla dzekwiŋ, na dite a bere a aà ba dukw zlaŋgatsak a. A bere a aà gà petek ŋgar a, dite a bere a ba nda yam ana a ŋgəzawa uwaɗ uwaɗ a, i fata ya kuɗa ka, a ndze a i dukw zlaŋgatsak asa tsa. 14 Aà mehinne matsamakər ŋana ka, a gese a gà maadagwar sula, kige tsa gà ɓəza huɗgum sula, ti dze a a mala məbatsa duwa a Mbulum ika miɗ BATSAH kwa ŋa, ika biye hərmaga ga petek mayahaba gər. 15 Mala məbatsa duwa a Mbulum a vile a ɗiyeŋ ŋgiɗ ilik, biy matawala fəla məpəla à bakal, a vile a ɗiyeŋ ŋgiɗ aaha biy matawala fəla ana tə dulawa ya. Kərga taŋa na, a ge a dukw ana biy məpəla aà bakal wele ata ika miɗ BATSAH kwa ŋa, a gəra dukw ana a zlalara ihər a.
16 Na bəla yam ba aka zlalara a wura ya ka, say a bere ba ŋgar fit i bəɗ a, a ndze a i dukw zlaŋgatsak ŋa tsikw a hawa. 17 Yam ba ata aka ləm aà petek, kige tsa, aà petek mehinne ana nda kwiye ya ka, say ta bere a aà dukw ata ya fit kweleŋ, a ndze a i dukw zlaŋgatsak ŋa tsikw a hawa. 18 I təv ana gà asləka nda məkəs tàa həna ya ka, say ta bere a ba tar i bəɗ a sula məma, ti ndze a i dukw zlaŋgatsak ŋa tsikw a hawa ›.
Dukw zlaŋgatsak gà məkəs
19 ‹ Na məkəs meŋge huɗ ihər ka, a ndze a i dukw zlaŋgatsak ŋa mehinne təsəla. Na wura aka ləm ahər ka, a ndze a i dukw zlaŋgatsak ŋa tsikw a hawa. 20 Zləməŋa təv mehinne ana məkəs ata meŋge huɗ ihər a, aka həna aaka ya, təv mendzena aka ndza aaka ya ka, aka ne dukw zlaŋgatsak. 21 Na bəla wura aka ləm a sləlah ata ka, say a bere a aà gà petek ŋgar a, dite a bere a ba ŋgar i bəɗ a fit, a ndze a i dukw zlaŋgatsak ŋa tsikw a hawa. 22 Na bəla wura aka ləm a təv mendzena a ndza aaka ya ka, say a bere a aà gà petek ŋgar a, dite a bere a ba ŋgar fit i bəɗ a. A ndze a i dukw zlaŋgatsak ŋa tsikw a hawa. 23 Na bəla tsa duwa ika sləlah ata, wura aka ləm ahər, kige tsa, ika təv mendzena a ndza aaka ya ka, aka ne dukw zlaŋgatsak tsikw a hawa. 24 Na bəla wura aka həna a məkəs ata, məmbəz meŋge huɗ ŋgar ana a zlelere a ihər a, aka ləm ahər ka, wele ata aka ne dukw zlaŋgatsak, biy mehinne təsəla mbaŋa. Dite ku mege sləlah wara na aka həna aaka ya ka, aka ne dukw zlaŋgatsak.
25 Na məmbəz a zlalara a aà məkəs ŋa ya, mehinne diŋ, aka ndze a təv meŋge huɗ ŋgar zukw tsa, kige tsa aka za i gər a gà pat meŋge huɗ ŋgar ana a ndzawa ihər a ka, ŋgat i dukw zlaŋgatsak, i huɗ gà mehinne ata məmbəz a zlelere a ihər a, kərga na a ndzawa i meŋge huɗ ŋgar a dukw ŋgar. 26 Akahər ana məmbəz a zlelere ihər a ka, zləməŋa sləlah ana aka həna aaka ya, zləməŋa təv mendzena aka ndza aaka ya ka, gà dukw ata tàa neye a gà dukw zlaŋgatsak, kamala na ŋgat a ndzawa i meŋge huɗ a. 27 Na bəla wura aka ləm aà gà dukw ata ka, aka ne dukw zlaŋgatsak, say a bere a aà gà petek ŋgar a, dite a bere a ba ŋgar fit i bəɗ a. Dite asa ka, a ndze a i dukw zlaŋgatsak ŋa tsikw a hawa.
28 I təv ana məmbəz ŋgar ata aka ndala ihər a ka, say məkəs ata a veve a mehinne təsəla, na dite dukw zlaŋgatsak a ge a ihər asa tsiye. 29 Aà mehinne matsamakər ŋana ka, a gesere a gà maadagwar sula, kige tsa gà ɓəza huɗgum a sula. A de a dəraha a mala məbatsa duwa a Mbulum, aka biye hərmaga ga petek mayahaba gər. 30 Mala məbatsa duwa a Mbulum a vile a ɗiyeŋ ŋgiɗ ilik, biy matawala fəla məpəla à bakal məkəs ata, a vile a biy ŋgiɗ aaha, biy matawala fəla ana tə dulawa ya. Kərga taŋa na, a ge a dukw ana biy məpəla à bakal məkəs ata ika miɗ BATSAH kwa ŋa, agəra dukw ana a zlalara ihər, a ne aà ŋgat dukw zlaŋgatsak a.
31 A kurum gà Musa nda Haruna, ndzəkum ikaba gà Isərayel nda gà dukw ana ti newa aà tar dukw zlaŋgatsak a. Kamala taŋa ya ka, ta mete a tsa, agəra ana tàa ne dukw zlaŋgatsak aà ga petek gà ana ika magər tar a tsiye › . »
32 Kərga taŋa ya na məpala ahəm ana i hitse dər, aka gər wele ana didwe aka zlalara ihər a, kige tsa yam ba aka dara ihər a, aka ne à ŋgat dukw zlaŋgatsak a, 33 nda gà aka gər məkəs ana meŋge huɗ ihər a, aka gər asləka, kige tsa məkəs ana duwa aka zlalara ihər a, dite asa ka, aka gər wele ana aka həna à məkəs ana i dukw zlaŋgatsak a.