Lewi 14

Məbara aàba dukw zlaŋgatsak gà ɓəzla mbəlak ba ya

1 BATSAH kwa ŋa a gwaɗa a Musa: 2 « Araha na dukw ana mehitse dər ŋa, mala mbəlak ba, a zezeme a a pat məbara aàba dukw zlaŋgatsak ŋgar a: Ti de a à wele ata a təv mala məbatsa duwa a Mbulum, 3 mala məbatsa duwa a Mbulum a dere a i təv mandzəba ya, a semete a mala mbəlak ba ata. Na mala mbəlak ba ata aka mbəl i dukw məməta ŋgar ata ya ka, 4 mala məbatsa duwa a Mbulum a gweɗe a ta magasara gà ɗiyeŋ a sula nda mesife ya, gà na gà dukw zlaŋgatsak tsiye, nda dizl seder a, nda slewize ana a ndza ndizze ya, àha slambah izup, biy wele ata a bere a aàba dukw zlaŋgatsak a. 5 Mala məbatsa duwa a Mbulum a gweɗe a ti zle ɗa a ɗiyeŋ ŋgiɗ ilik, aka gər gah ana ta ŋgar nda dwaɗwa maraha ŋa nda yam ana tə təfara i biye yam ana a ŋgəzawa uwaɗ uwaɗ hiywe ya. 6 A zle a ɗiyeŋ ŋgiɗ ata a riŋ nda are ya, dizl seder, slewize ana a ndza ndizze ya, àha slambah izup, a tsilwiɓe a dər akaba a yam ata magawaŋa nda məmbəz ɗiyeŋ ata tə lah mezler ɗa ya. 7 A gwetsekeye a à məmbəz aà mala mbəlak ba ata a bere a aàba dukw zlaŋgatsak a, sik təsəla. A gweɗe a parakka wele aha ka, dukw zlaŋgatsak ihər asa tsa. A pil a à ɗiyeŋ aha a riŋ nda are ya, mibeba a kusak. 8 Wele ata a bere a aàba dukw zlaŋgatsak a, a bere a aà gà petek ŋgar a, a zeze a aàba ŋguz a fit, dite a bere a ba ŋgar, tsam ka, dukw zlaŋgatsak a ge a ihər asa tsa. I dəba ŋa ya, a mbiɗe a gər a təv mandzəba tar, ama a ti ndze a ka, a bəra tsakalak aà mekiriwe ga petek ŋgar a, mehinne təsəla. 9 Aà mehinne matəsəla ŋana ka, a me a aka mazaza ambəz ŋgar, gumət ŋgar nda gà ŋguz gwiɗgwiɗ are nda gà asiŋ gà ŋguz ana aàba ŋgar a. I dəba ŋa ya ka, a bere a aà gà petek ŋgar a, dite a bere a ba ŋgar, tsam ka, dukw zlaŋgatsak a ge a ihər asa tsa.

10 Aà mehinne matsamakər ŋana ka, wele ata a gesere a gà ɓəza hagwala ya sula, gà na dukw metire aà tar tsiye, kəla təmaŋ ana mive ilik dukw metire ihər tsiye, makərɗa gufa kiliw tswiɗ mahəlaɓa ŋa nda mal, àha mal mezehe liter, biy dukw taf gà dukw mezime ana ta ge ara i dala ya. 11 Mala məbatsa duwa a Mbulum ana a tewele a dukw zlaŋgatsak wele ata ya, a hitse a à wele ata nda gà dukw taf ŋgar aka miɗ BATSAH kwa ŋa, aka biye hərmaga mada ga petek mayahaba gər. 12 Mala məbatsa duwa a Mbulum, a zle a kəla hagwala ŋgiɗ ilik, a vile a aà matawala fəla məpəla gər dukw bakal, nda mezehe mal liter, a dze a gà dukw taf ata a BATSAH kwa ŋa, nda mege dər gà dukw ana ta pàtawa dər a. 13 A zle a ɗa a kəla hagwala ata, a təv ana ti zleyewar aɗəm ɗa a gà dukw gənaw ana tə dzawa biy matawala fəla məpəla à bakal a, kige tsa, gà dukw matawala fəla ana tə dulawa ya, kamala megweɗe ya ka, a təv ana tsəɗaŋŋa ya. Gà dukw matawala fəla məpəla gər dukw bakal ka, bəŋa biy gà ɓəzla məbatsa duwa a Mbulum, kamala dukw matawala fəla məpəla gər dukw bakal a, tar ka, tsəɗaŋŋa ndeyndey. 14 Mala məbatsa duwa a Mbulum, a tife a məmbəz dukw gənaw məpəla gər dukw bakal ata, a ge a aà təv mandəfa zləm ahər mezime wele ata a bere a aàba dukw zlaŋgatsak a, a ge a aka gà mandagwam ahər mezime nda mandagwam sik ahər mezime ŋgar asa mbaŋa. 15 I dəba ŋa ya, mala məbatsa duwa a Mbulum a mbiɗe a mal zaakwa aka huɗ ahər gula ŋgar. 16 Mala məbatsa duwa a Mbulum a dzeke a aɗəm a matəsəla ahər mezime ŋgar, dite a gwetsekeye a dər sik təsəla aka miɗ BATSAH kwa ŋa. 17 I dəba ŋa ya, mala məbatsa duwa a Mbulum a ge a mal ana a zereha akahər a, aà təv mandəfa zləm ahər mezime wele ata, aka mandagwam ahər mezime ŋgar, dite aka mandagwam sik ahər mezime ŋgar, aka gà təv ana a geye ahər məmbəz dukw matawala fəla məpəla gər dukw bakal ata ya, 18 a mbiɗe a mal ana a zeha akahər ŋgar a aka gər wele ata, kərga taŋa ya na a ge a dukw ana ta gewa biy məpəla à bakal ika gər wele ata ika miɗ BATSAH kwa ŋa ya. 19 I dəba ŋa ya, mala məbatsa duwa a Mbulum, a vile a dukw matawala fəla məpəla à bakal. Dite a ge a gà dukw ana ta gewa biy məpəla à bakal a ika wele ata a bere a aàba dukw zlaŋgatsak a. I dəba ŋa ya a zle a ɗa a dukw gənaw ana ta vəl biy matawala fəla ana tə dulawa ya. 20 Tsam ka, mala məbatsa duwa a Mbulum a dwile a dukw matawala fəla ana tə dulawa ya akaba nda gà dukw taf gà dukw mezime ana ta ge ara i dala ya, aka gər təv madula aaka duwa a Mbulum. Dite mandəvandəv ŋana asa ka, a geye a gà dukw ana ta geyewa biy məpəla à bakal a, aka gər wele ata, dite dukw zlaŋgatsak a ge a ihər asa tsa.

21 Na bəla wele ŋa mala matawak, gà dukw ŋgar riŋ hinne tsəka, a gisere a kəla hagwala ya, biy matawala fəla məpəla gər dukw bakal. Mala məbatsa duwa a Mbulum, a vile a a BATSAH kwa ŋa nda mege dər gà dukw ana ta pàtawa dər biy məpəla à bakal wele ata. A ndzike a gufa kiliw makər, magawaŋa nda mal, taŋa ka, dukw taf gà dukw mezime ana ta ge ara i dala ya, nda mezehe mal liter asa mbaŋa. 22 Dite a dze a gà maadagwar sula, kige tsa gà ɓəza huɗgum sula, kamala ana ahər ŋgar a le ahər a. Ɗiyeŋ ata ilik a ne a dukw matawala fəla məpəla à bakal, ilik ŋa aaha a zeha ya, a ne a dukw matawala fəla ana tə dulawa ya. 23 Aà mehinne matsamakər ŋana ka, wele ata a ndzikaha gà dukw taf ana ta bere a dər aà ŋgat dukw zlaŋgatsak a, a mala məbatsa duwa a Mbulum aka biye hərmaga ga petek mayahaba gər, aka miɗ BATSAH kwa ŋa. 24 Mala məbatsa duwa a Mbulum, a zle a ihər kəla hagwala matawala fəla məpəla gər dukw bakal ata, àha nda mal ata ya. Dite a vile a à BATSAH kwa ŋa, nda mege dər gà dukw ana ta pàtawa dər a. 25 A zle a ɗa a kəla hagwala məpəla gər dukw bakal ata, i dəba ŋa ya, a tife a məmbəz ŋa zaakwa. A geye a aà təv mandəfa zləm ahər mezime wele ata a bere a aàba dukw zlaŋgatsak a, a ge a aka mandagwam ahər mezime ŋgar, dite aka mandagwam sik ahər mezime ŋgar. 26 I dəba ŋa ya, mala məbatsa duwa a Mbulum, a mbiɗe a mal zaakwa aka huɗ ahər gula ŋgar. 27 I dəba ŋa ya asa, a dzeke a matəsəla ahər mezime ŋgar a mal ata, a gwetsekeye a aà mal ata sik təsəla ika miɗ BATSAH kwa ŋa. 28 Asa ka, mala məbatsa duwa a Mbulum a ge a mal ana ika ahər a, aà təv mandəfa zləm ahər mezime wele ata, aka mandagwam ahər mezime ŋgar, dite a ge a aka mandagwam sik ahər mezime ŋgar, aka gà təv ata a geye ahər məmbəz dukw matawala fəla məpəla gər dukw bakal a. 29 I dəba ŋa ya, mala məbatsa duwa a Mbulum a mbiɗe a mal ata a ze akahər ŋgar a, a gər a wele ata, kərga taŋa ya na a ge a dukw ana ta gewa biy məpəla à bakal ika gər wele ata ika miɗ BATSAH kwa ŋa ya 30 I fata ya asa ka, mala məbatsa duwa a Mbulum, a zle a aà gà maadagwar a, kige tsa aà gà ɓəza huɗgum a ilik, kamala dukw taf ana wele ata a ŋgat a. 31 Mala məbatsa duwa a Mbulum a vile a, biy matawala fəla məpəla à bakal wele ata, a bere a aàba dukw zlaŋgatsak a. I dəba ŋa ya, a vile a ɗiyeŋ ŋgiɗ aaha, biy matawala fəla ana tə dulawa ya, dite nda dukw taf gà dukw mezime ana ta ge ara i dala ya. Kərga taŋa ya na a geye a gà dukw ana ta gewa biy məpəla à bakal ika gər wele ata ika miɗ BATSAH kwa ŋa ya . »

32 Kərga taŋa ya na, məpala ahəm ana mehitse dər ŋa, aka gər mala dukw məməta mbəlak ba ana, gà dukw ŋgar riŋ hinne tsa, na aà matawala dukw zlaŋgatsak ŋgar a.

Magudufuŋ ana aà dəduŋ ga ya

33 BATSAH kwa ŋa a gwaɗa a gà Musa nda Haruna: 34 « I vile a a kurum a, ahəɗ kwite Kanana aà mene biy kurum. I təv ana kàa dum a fata ya ka, biy tsa na yàa ge aruwaŋ magudufuŋ aà ga kurum ilik ika awiya ahəɗ ata ka, 35 say mala ga ata a ti tsik a mala məbatsa duwa a Mbulum: ‹ Yàa ŋgata a mendzikiɗe ba aruwaŋ duwa aà ga ga › . 36 Mala məbatsa duwa a Mbulum a gweɗe a ndzəkumara iɗəm gà dukw ana i ga ata ya kweleŋ, na ələk ŋana a ti semete a aruwaŋ ata ya. Kamala taŋa ya, na gà dukw ana i ga ata ti ne a gà dukw zlaŋgatsak tsiye. I dəba taŋa ya na, mala məbatsa duwa a Mbulum a pitse a a ga ata, a semete ya. 37 A semete a aruwaŋ ata kalkal lele. Na aka ŋgat a gà biye riŋ ihər aà ga ata, kwizikw kwizikw tə ndzaya kwizir kwizir zakw zakw, kige tsa nduzzwa zakw zakw dite aka geye biye a dəduŋ ga ka, 38 mala məbatsa duwa a Mbulum a dehe a, a hitse a aka biye hərmaga ga ata, dite a hindike a a ga ata biy mehinne təsəla. 39 Aà mehinne matəsəla ŋana ka, mala məbatsa duwa a Mbulum a mbiɗe a gər aka masamata ga ata asa. Na bəla aruwaŋ ata aka səkah aà dəduŋ ga ata ka, 40 mala məbatsa duwa a Mbulum a gweɗe a ndzəkum ihər gà kur ata aruwaŋ aà tar a, dite kà dzum aà tar diriŋ i huɗ kwite ya, a təv ana ti yahawar aɗəm gər a gà dukw zlaŋgatsak a. 41 Ta gegere a ɓwilwim ana nda huɗ ga ya fit, ti nde a aà ahəɗ ɓwilwim ata ta gagar a, a bəra diriŋ i huɗ kwite ya, a təv ana tə ndawa aɗəm aà dukw zlaŋgatsak a. 42 I dəba ŋa ya, ti ndzike a gà kur ŋgiɗ, ta mbwirɗe a a təv gà na tə lah mendzehara iɗəm a. Ta hileɓe a dwaɗwa ŋgiɗ awiya ŋa, aà makupa dər dəduŋ ga ata.

43 Na aruwaŋ magudufuŋ ata aka pàt aà ga ata ya asa i dəba ana tàa ndzaha gà kur, tàa gagar ɓwilwim ana nda huɗ ga ya, ta kup a ka, 44 mala məbatsa duwa a Mbulum a mbiɗe a gər a masamata ŋa asa, na biy tsa aruwaŋ ata aka səkah a ga ata ka, kamala megweɗe ya ka, magudufuŋ ata a de a ihər a asa tsa. Taŋa ga ata ka, i dukw zlaŋgatsak. 45 Say ta mbezle a a ga ata, ti ndzike a gà kur ŋa, gà aram ŋa, gà dwaɗwa ana ta kup dər a tserdze. Ti de a dər diriŋ a bər a, aka dəba huɗ kwite, a təv ana tə dzawa aɗəm aà gà dukw zlaŋgatsak a.

46 Na wura aka da a ga ata i huɗ gà mehinne ata ta həndək a ɗəm a ka, wele ata aka ne dukw zlaŋgatsak tsikw a hawa. 47 Na wura aka həna i ga ata, kige tsa, aka zəm iɗəm ɗaf ka, a bere a aà gà petek ŋgar a.

48 Ama i təv ana mala məbatsa duwa a Mbulum, aka samata təv aruwaŋ ata, aka fər aruwaŋ ata aka səkah tsa, na i dəba ana tàa mbər mekwipe dəduŋ ga ata nda awiya dwaɗwa ya ka, a gweɗe a parakka ka, ga aaha ka, dukw zlaŋgatsak ihər tsa, aɗaba aruwaŋ ata ka, aka da ihər a. 49 Aà məbara dukw zlaŋgatsak aà ga ata ya ka, mala məbatsa duwa a Mbulum a ndzike a gà ɗiyeŋ sula, dizl seder, àha nda slewize ana a ndza ndizze ya, dite nda slambah izup. 50 Mala məbatsa duwa a Mbulum, a zle a ɗa a ɗiyeŋ ŋgiɗ ilik, aka gər gah ana ta ŋgar nda dwaɗwa maraha ŋa nda yam ana tə təfara, i biye yam. 51 A zle a ɗiyeŋ ŋgiɗ ata a riŋ nda are ya, dizl seder, slewize ana a ndza ndizze ya, àha slambah izup, a tsilwiɓe a dər akaba yam ata magawaŋa nda məmbəz ɗiyeŋ ata malahalah ŋa ti zler ɗa ya. A gwetsekeye dər sik təsəla a ga ata. 52 Kamala taŋa ya, na a bere a dukw zlaŋgatsak aà ga ata ya, a ne a dər ka, nda məmbəz ɗiyeŋ, nda yam ana a ŋgəzawa uwaɗ uwaɗ a, nda ɗiyeŋ ata a riŋ nda mesife ya, dizl seder, nda slambah izup, nda slewize ana a ndza ndizze ya. 53 I dəba ŋa ya ka, a miyeke a a ɗiyeŋ aaha a riŋ nda are ya, mimbebe a dala a kusak diriŋ, aka dəba huɗ kwite. Kərga taŋa ya na, a zle a dukw bakal ika ga ata ya, dukw zlaŋgatsak a ge ihər asa tsiye . »

54 Kərga taŋa ya, na məpala ahəm ana mehitse dər ŋa, aka gər gà dukw məməta mbəlak ba ana pampam a, nda mandzawa, 55 aka gər magudufuŋ ana a petek a, kige tsa gà magudufuŋ ana aà dəduŋ ga ya, 56 aka gər gà meslesle duwa, aka gər məvaha dukw məməta ana mimbwirɗwiɗwe mimbwirɗwiɗwe ya, aka gər gà məvaha gà dukw ana a pàt herre ya. 57 Məpala ahəm ata mehitse dər ŋa, a ɗif a ka, aà dukw ana dukw zlaŋgatsak tsiye, kige tsa aà dukw ana dukw zlaŋgatsak a. Taŋa ka, gà məpala ahəm ana aka gər magudufuŋ a.