Lewi 13

Gà dukw məməta kwiye ba

1 BATSAH kwa ŋa a gwaɗa a gà Musa nda Haruna: 2 « Na meslesle duwa aà kwiye ba mburma, dukw məməta ana mimbwirɗwiɗwe mimbwirɗwiɗwe, kige tsa məvaha dukw ana herre ya, aka təv ana gà dukw ata tàa neye gà dukw məməta kwiye ba, kamala mbəlak ba ya ka, tə da à wele ata aka miɗ mala məbatsa duwa a Mbulum Haruna, kige tsa a bəra kəla ŋgar ŋgiɗ ilik. 3 Mala məbatsa duwa a Mbulum a semete a tseke mbəlak ata a kwiye ba ya. Na bəla gà ŋguz ana i təv a ata ya, aka ne herre dite aka le biye a kwiye ba ka, taŋa ka, dukw məməta mbəlak ba. I dəba ana mala məbatsa duwa a Mbulum aka samata kamala taŋa ya ka, a tsik a parakka ka, wele ata aka ne dukw zlaŋgatsak. 4 Ama tsaatsa ka, məvaha dukw ata a kwiye ba ya, a pàt herre, dite aka le biye a kwiye ba tsa, aka ne a gà ŋguz herre tsəka, mala məbatsa duwa a Mbulum a tike a ŋgat pam aà gà mburma ya, mehinne təsəla. 5 Aà mehinne matəsəla ŋana ka, mala məbatsa duwa a Mbulum a me a aka masamata ŋgat. Aka samata kuɗa ka, na məvaha dukw ata aka mbəɗ tsa. Dite aka səkah aà məvaha kwiye ba tsəka, a tike a wele ata ŋgwal ŋa tsiye pam aà gà mburma ya biy mehinne təsəla asa. 6 Aka mandəvandəv kwaskwa ata ka, a semete a məvaha dukw ata asa, aka pər ka, aka nikiɗ dite aka səkah tsəka, mala məbatsa duwa a Mbulum a tsike a parakka ka, wele ata ka, dukw zlaŋgatsak ihər tsa. Na aà ŋgat ka, dukw məməta ana mimbwirɗwiɗwe mimbwirɗwiɗwe ya pəra. Wele ata a bere a aà gà petek ŋgar a pəra, tsam ka, dukw zlaŋgatsak a ge a ihər asa tsa. 7 Ama na bəla dukw məməta ana mimbwirɗwiɗwe mimbwirɗwiɗwe ya , aka səkah i dəba ana mala məbatsa duwa a Mbulum a samata ŋgat akahər ata, dite a gwa parakka ŋgat dukw zlaŋgatsak ihər tsiye ka, wele ata a mbiɗe a gər a təv mala məbatsa duwa a Mbulum asa. 8 Mala məbatsa duwa a Mbulum a semete a ŋgat sik ilik asa dzekwiŋ, i təv ana aka samata dukw məməta ana mimbwirɗwiɗwe mimbwirɗwiɗwe ya, aka səkah aà məvaha kwiye ba ka, a tsike a parakka ka, wele ata ka, i dukw zlaŋgatsak. Taŋa ka, mbəlak ba.

9 Araha mendzikiɗe ba dukw ŋgiɗ naha asa, na bəla wura dukw məməta ihər a ndzikiɗ ba mbəlak ba ka, tə da aà ŋgat aka miɗ mala məbatsa duwa a Mbulum. 10 Mala məbatsa duwa a Mbulum a semete a ŋgat, na bəla meslesle duwa riŋ ihər aà kwiye ba ŋgar a ndza herre, gà ŋguz ana ikəka ya ka, tə ndza herre, dite ta ŋgete a ka, a slu ba ɗekɗek kwiye ikəka tsəka, 11 taŋa ka, mbəlak ba ana aka ndza hinne ya. Mala məbatsa duwa a Mbulum a gweɗe a parakka ka, wele ata ka, i dukw zlaŋgatsak. A ge a ŋgulum asa tsa na ti tike a ŋgat pam a gà mburma ya, aɗaba are a ŋgatar ba lele na ŋgat ka, i dukw zlaŋgatsak a. 12 Tsaatsa, na dukw məməta mbəlak ba aà kwiye ba ŋgar ndurtsutstswa, daga ara ika dala gər ŋgar a, tsikw aka dəba sik ŋgar, kamala ana mala məbatsa duwa a Mbulum a ŋgetere a ya, 13 mala məbatsa duwa a Mbulum a semete a ŋgat fit lele. A ŋgetere a kuɗa ka, dukw məməta mbəlak ba ata ka, aka ləm a aka gà kwiye ba ŋgar fit, ba ŋgar i bəɗ a fit ka, aka ne herre, a gweɗe a parakka ka, wele ata ka, i dukw zlaŋgatsak tsa. 14 Ama a pat ana tàa ŋgat a a slu ba ŋgar kwiye ikəka tsiye ka, wele ata ka, i dukw zlaŋgatsak. 15 Mala məbatsa duwa a Mbulum a semete a təv slu ba ŋgar ata kwiye ikəka tsiye, a gweɗe a parakka ka, wele ata ka, i dukw zlaŋgatsak. Slu ba ana kwiye ikəka tsiye ka, dukw zlaŋgatsak. Taŋa ka, mbəlak ba ŋgiɗ pam. 16 Ama na bəla təv slu ba ŋgar ata, a ŋgatar ba ya, aka ne herre asa ka, i fata ya, say wele ata a mbiɗe a gər a təv mala məbatsa duwa a Mbulum asa. 17 Mala məbatsa duwa a Mbulum a semete a ŋgat, aka ŋgatar ka, dukw məməta mbəlak ba ata aka ne herre ka, a gweɗe a parakka, ŋgat ka, i dukw zlaŋgatsak tsa. Wele ata ka, dukw zlaŋgatsak ihər tsa.

18 Araha dukw ŋgiɗ naha asa. Na bəla wura duwa aka slesler aka paha, 19 ama təv meslesle məvaha dukw ata ka, duwa aka slesle aakara, a ndza herre nda nduzzwa ka, wele ata a de a təv mala məbatsa duwa a Mbulum. 20 Mala məbatsa duwa a Mbulum a semete təv ata dukw məməta ihər a. Təv ata, aka təmar biye a kwiye, gà ŋguz tàa neye herre ka, a gweɗe a parakka ka, wele ata ka, i dukw zlaŋgatsak. Taŋa ka, dukw məməta mbəlak ba ŋgiɗ na a sikehe a à medzere a ika meslesle dukw ata ya. 21 Ama na mala məbatsa duwa a Mbulum aka samata ŋgat, aka le aà ŋguz herre ŋa tsa, mbəlak aka le biye a kwiye ba tsa, a riŋ a gise a akaba ahəm ka, a tike wele ata tsək aà mburma ya biy mehinne təsəla. 22 Na dukw məməta mbəlak ba ata aka səkah aà məvaha kwiye ba ka, mala məbatsa duwa a Mbulum a gweɗe a parakka ka, wele ata ka, i dukw zlaŋgatsak. Taŋa ka, medzibe mbəlak ba ŋgiɗ pam. 23 Ama na biy tsa, məvaha dukw ata aka mbəɗ tsa, dite aka səkah tsəka, taŋa ka, girɗe meslesle dukw ata pəra. Mala məbatsa duwa a Mbulum a gweɗe a parakka, wele ata ka, i dukw zlaŋgatsak tsa.

24 Araha mendzikiɗe ba dukw ŋgiɗ naha pam asa: Na bəla wura akwa aka wànà ŋgat, na bəla məvaha dukw ata i təv məwana ŋa ata ya, aka pàt herre kige tsa nduzzwa magawaŋa nda herre ka, 25 mala məbatsa duwa a Mbulum, a semete a təv məwana ŋa ata. Na gà ŋguz ŋa, tàa ndzaya herre, dite aka ŋgat a biye aà kwiye ŋgar, taŋa ka, dukw məməta mbəlak ba ŋgiɗ, na a dzahərba i təv ata akwa a wànà ya. Mala məbatsa duwa a Mbulum a gweɗe a parakka ka, wele ata ka, i dukw zlaŋgatsak. Taŋa ka, mbəlak ba ŋgiɗ pam. 26 Ama i təv ana mala məbatsa duwa a Mbulum a samata, aka le aà gà ŋguz tàa ndza herre tsa, təv mbəlak ŋa ata aka ge biye a kwiye tsa, a riŋ a gise a akaba ahəm ka, mala məbatsa duwa a Mbulum a tike a mala dukw məməta ata tsək aà mburma ya, mehinne təsəla. 27 Aà mehinne matəsəla ŋana ka, mala məbatsa duwa a Mbulum a semete a təv mbəlak ata, na aka səkah aà kwiye ba, a gweɗe a parakka wele ata ka, dukw zlaŋgatsak ihər. Na ihər ka, dukw məməta mbəlak ba. 28 Ama tsaatsa na, aka samata təv ata ka, aka mbəɗ tsa, aka səkah tsa, dite a riŋ a gise a akaba ahəm, taŋa ka, makwakura mbəlak akwa pəra. Mala məbatsa duwa a Mbulum a gweɗe a parakka, wele ata ka, i dukw zlaŋgatsak tsa. Na ihər ka, girɗe mbəlak akwa pəra.

29 Araha mendzikiɗe ba dukw ŋgiɗ naha asa, na bəla asləka mburma kige tsa məkəs, na dukw məməta mbəlak ahər i gər, kige tsa aà mazəgumət ka, 30 mala məbatsa duwa a Mbulum a semete a təv mbəlak ata. Na bəla aka le biye a kwiye, gà ŋguz ŋgar tàa ndzaya za kəla za kəla, aka ndara iɗəm a kwaram kwaram ka, mala məbatsa duwa a Mbulum a gweɗe a parakka ka, wele aaha ka, i dukw zlaŋgatsak. Taŋa ka, mandzawa, dukw məməta kwiye ba ana a gewa a mburma i gər a, kige tsa a mazəgumət a. 31 Na biy tsa, i təv ana mala məbatsa duwa a Mbulum aka samata təv dukw məməta mbəlak mandzawa ata, aka ŋgat a biye a kwiye ŋgar tsa, gà ŋguz ŋgar tə ndza liviŋ liviŋ tsəka, mala məbatsa duwa a Mbulum a tike wele ata tsək aà mburma ya biy mehinne təsəla. 32 Aà mehinne matəsəla ŋana ka, mala məbatsa duwa a Mbulum a me a aka masamata təv dukw məməta ata asa. Na mandzawa ata aka səkah tsa, gà ŋguz riŋ ikəka za kəla za kəla tsa, mbəlak ata aka le biye a kwiye ŋgar ɓav tsəka, 33 wele ata a zeze a ikaba ambəz pəra, ama a miseke a aà təv dukw mandzawa ata. I dəba ŋa ya ka, mala məbatsa duwa a Mbulum a tike a wele ata masula ŋa tsək aà mburma ya mehinne təsəla. 34 Aka mandəvandəv kwaskwa ata ka, mala məbatsa duwa a Mbulum a me a aka masamata təv mandzawa ata. Na mbəlak, aka səkah aà kwiye ba tsa, dite aka le aɗəm biye tsəka, mala məbatsa duwa a Mbulum a gweɗe a parakka ka, wele aaha ka, i dukw zlaŋgatsak tsa. A bere a aà gà petek ŋgar a pəra, tsam ka, dukw zlaŋgatsak a de a ihər a. 35 Ama i dəba ana mala məbatsa duwa a Mbulum, a gwa wele aaha ka, dukw zlaŋgatsak ihər tsiye, mandzawa ata aka səkah aà kwiye ba ŋgar ka, 36 a me a aka masamata dər ahəɗ asa. Na mandzawa ata aka səkah aà kwiye ba ka, mala məbatsa duwa a Mbulum a yehe a meme na ŋguz ŋgar a ndzaya tsa. Wele ata ka, i dukw zlaŋgatsak. 37 Ama na aà are ŋgar, mandzawa ata aka mbəɗ tsa, ambəz aka sləlara ikəka ya, liviŋ liviŋ, aka mbəl i mandzawa ŋgar ata ya ka, taŋa ka, wele ata ka, i dukw zlaŋgatsak asa tsa. I dəba ŋa ya, mala məbatsa duwa a Mbulum a gweɗe a parakka ka, ar i dukw zlaŋgatsak tsa.

38 Araha mendzikiɗe ba dukw ŋgiɗ naha asa: Na bəla asləka, kige tsa məkəs, gà məvaha gà dukw ana herre ya, aka dzara aà kwiye ŋgar a ka, 39 mala məbatsa duwa a Mbulum a semetiŋa. Na bəla məvaha dukw ata aka ndza herre tizlzle tsəka, dukw məməta ata a dzahərba ya ka, mawura ba ŋa hinne tsa. Wele ata ka, i dukw zlaŋgatsak tsa.

40 Na ambəz aka ndara i gər wura ya ka, ŋgat a ne ka, mala maàvuwah, ŋgat ka, i dukw zlaŋgatsak tsa. 41 Na bəla wura ambəz aka ndarra i gər a, ndaka miɗ a ka, ambəz a ge a ika yam are ŋgar asa tsa. Ŋgat ka, i dukw zlaŋgatsak tsa. 42 Na bəla wura ambəz aka ndarra i dala gər a, dite məvaha duwa nduzzwa magawaŋa nda herre aka pàt ika dala gər ŋgar, kige tsa ara ika yam are ya ka, taŋa ka, dukw məməta mbəlak ba ŋgiɗ pam asa na a dzahərba i təv ata ya. 43 Mala məbatsa duwa a Mbulum a semetiŋa, na aka le a meslesle duwa nduzzwa zakw zakw ka, a ndzikiɗ ba ka, dukw məməta mbəlak ba, 44 wele ata ka, mala mbəlak ba, dite ŋgat ka, i dukw zlaŋgatsak. Say mala məbatsa duwa a Mbulum a gweɗe a parakka ka, wele aaha, i dukw zlaŋgatsak, agəra dukw məməta ŋgar ata, ika dala gər a.

45 Wele ana dukw məməta mbəlak ba ata ihər a ka, a dzekebe a ka, makwayaɗa petek, a zliɗe a gər tsa, a kehe a tipis ŋgar, a tsik a ŋgəlakəkka: ‹ Iye i dukw zlaŋgatsak! Iye i dukw zlaŋgatsak! ›. 46 A ndze a i dukw zlaŋgatsak dukw ŋgar, na dukw məməta ata ihər hiywe ya. Aɗaba taŋa na a ndze a ka, tsək aà mburma ya, ika dəba təv mandzəba ya . »

Magudufuŋ ana gewa aà gà petek nda bagwa ya

47 « Na bəla magudufuŋ aka pàt aà gà petek ana, ta ŋgar nda gasgas təmaŋ a, kige tsa nda slewize leŋ a, 48 aka ge aà sla petek leŋ, kige tsa, aà sla petek ana ta ŋgar nda gasgas təmaŋ, kige tsa, aà bagwa, kige tsa aà dukw ana ta ge nda bagwa ya. 49 Dite dukw ata a ndza ka, kwizir kwizir zakw zakw, kige tsa nduzzwa zakw zakw ka, taŋa ka, gà təv aruwaŋ magudufuŋ, a da dər ka, ki pete a aà gà sla petek nda bagwa ata a mala məbatsa duwa a Mbulum. 50 Mala məbatsa duwa a Mbulum a semete a gà təv aruwaŋ ata, i dəba ŋa ya ka, a tike a dukw ata aruwaŋ ihər a, tsakalak biy mehinne təsəla. 51 Aà mehinne matəsəla ŋana ka, a me a aka masamata sla petek ata asa. Na təv aruwaŋ ata aka səkah aà dukw ata ka, taŋa ka, magudufuŋ ana a sle a aà mede a ihər a asa tsiye, dukw ata ka, aka ne dukw zlaŋgatsak. 52 Mala məbatsa duwa a Mbulum a wene a iɗəm petek ata ya, sla petek ana maŋgaraŋa nda gasgas təmaŋ a, kige tsa, biy leŋ a, kige tsa asa ka, dukw ana ta ge nda bagwa ya. Ti sle a aà mege ihər aruwaŋ magudufuŋ ata ya tsa. Taŋa ka, biy mewene iɗəm dukw ata ya.

53 Ama na i təv ana mala məbatsa duwa a Mbulum aka samata sla petek, kige tsa bagwa, aka ŋgat a təv aruwaŋ ata aka səkah tsəka, 54 a gweɗe a ta bara aà dukw ata aruwaŋ ihər a, i dəba ŋa ya, a tike a tsakalak mehinne təsəla asa. 55 Mala məbatsa duwa a Mbulum a semete a dukw ata ta bara ihər a ya asa. Na təv aruwaŋ ata aka mbəɗ tsa hiywe ka, ku mege aka səkah tsa tekeɗe ya ka, dukw ata ka, dukw zlaŋgatsak. Ta wene a iɗəm a, ku mege a gəs ka, nda huɗ ŋa, kige tsa nda bəra ŋa tekeɗe ya. 56 Ama na bəla i təv ana mala məbatsa duwa a Mbulum aka samata təv aruwaŋ ata, aka nikiɗ, i dəba ana, ta bara ihər ya ka, a sese a ihər təv tseke aruwaŋ ata aà petek ata ya, kige tsa aà bagwa, nda gà tsa aà sla petek ata ya. 57 Ama na aruwaŋ ata aka pàt aà petek ata i dəba ŋa ya asa, aà sla petek ata ya, ku mege dukw ana ta ge nda bagwa ya, taŋa ka, magudufuŋ ata aka səkah aà məpàta aba asa. Ta wànà iɗəm dukw ata aruwaŋ ihər a. 58 Na bəla tàa bara aruwaŋ magudufuŋ aà sla petek a, kige tsa aà bagwa ya, aka da ihər a ka, ta me a aka məbara ŋa masula ŋa asa. Tsam ka, dukw zlaŋgatsak a ge a ihər asa tsa . »

59 Araha na gà məpala ahəm aka gər gà təv gà aruwaŋ magudufuŋ ana a gewa aà petek, kige tsa aà dukw ana ta ŋgar nda gasgas təmaŋ a, nda gà tsa, aà petek ana ta ŋgar nda slewize leŋ a, aà sla petek kige tsa, aà dukw ana ta ge biy bagwa ya. Gà məpala ahəm aaha na ta vile a vatwa aà megweɗe ka, dukw aaha ka, dukw zlaŋgatsak ihər tsa, kige tsa dukw zlaŋgatsak a.