Lewi 27

Məpəla gər dukw ana kə gwa i sida ya, i vile a ya

1 BATSAH kwa ŋa a gwaɗa a Musa: 2 « Tsik məpala ahəm a aaha a gà Isərayel: ‹ Na wura aka tsik duwa i sida ya, a vile a ka, mburma na a BATSAH kwa ŋa ka, a sle a aà mipile a gər ŋa nda siŋgwe. 3 Araha na dukw ana ki pile a ya, tits aà dukw melive kur siŋgwe ana i ga tsəɗaŋŋa ata ya:

Biy asləka mburma ana gəs aà mive dzik səla ya, haa a da a mive dzik ndilik a ka,

kur siŋgwe dzik əzləm.

4 Biy məkəs ka,

kur siŋgwe dzik makər.

5 Biy gà ɓəza ana gəs aà mive əzləm a, haa a da a mive dzik səla ya ka,

kur siŋgwe dzik səla, na biy kəla asləka ŋa ya,

kur siŋgwe kurwa, na biy dəm ŋa ya.

6 Biy gà ɓəza ndirkiz ana gəs à kiye ilik a, haa a da a mive əzləm a ka,

kur siŋgwe əzləm, na biy kəla asləka ŋa ya,

kur siŋgwe makər na biy dəm ŋa ya.

7 Biy wele ana a za mive dzik ndilik a ka,

kur siŋgwe kurwa gər ŋgar əzləm na asləka ya,

kur siŋgwe kurwa, na məkəs ŋa ya.

8 Na wele ana a gwa i vile a duwa i sida ya, a sle a aà mipile a gana ana ti tsik a fit tsəka, a hitse a aà wele ata, aka miɗ mala məbatsa duwa a Mbulum. Mala məbatsa duwa a Mbulum, a sese a gana ŋa ka, tits aà dukw ana wele ata a gwa i sida ya, a sle a aà melehire a ya.

9 Na bəla wura aka gwa i sida ya, a vile a dukw gənaw ana ta vəlawa dukw taf ŋa a BATSAH kwa ŋa ya, zləma dukw gənaw ata, ta vile a a BATSAH kwa ŋa ya ka, aka ne pam biy Mbulum. 10 Wura a sle a aà mimburuɗwe nda dukw gənaw ŋgiɗ tsa, mege ŋgwal ŋa, nda ana ŋgwal ŋa tsiye tekeɗe ya. Ama na tàa mburuɗ aɗəm nda biy ŋgiɗ ka, gà dukw gənaw ata sula ti dze a pam biy Mbulum. 11 Na bəla a dəɗ ka, aka gər dukw gənaw ana a ne dukw zlaŋgatsak, biy məvəla dukw taf ŋa, a BATSAH kwa ŋa ya tsiye ka, ta gisere a dukw gənaw ata ya, aka miɗ mala məbatsa duwa a Mbulum a. 12 Mala məbatsa duwa a Mbulum, a tsike a gana dukw gənaw ata, tits aà metikaba ŋgar. Ti zezem a gana ana a tsik a. 13 Na wele ana a tsik duwa i sida ya, a waya a məmburɗwa dukw gənaw ŋgar ata ka, a pile a gana ana mala məbatsa duwa a Mbulum a tsik ahər a, dite a sikehe a aaka a siŋgwe dukw ilik i huɗ dukw əzləm a, biy siŋgwe dukw gənaw ata ta hitse dər a.

14 Na bəla wura a vile a ga ŋgar, a ne a dər pam biy BATSAH kwa ŋa ka, mala məbatsa duwa a Mbulum a ge a gana ŋa tits aà metsehine ga ata, bəla ŋgwal ŋa, kige tsa ŋgwal ŋa tsiye. Ti zezem a ka, gana ana a tsik a. 15 Na bəla mala ga, a ne à ga ŋgar pam biy Mbulum a, a buruɗwe a ga ŋgar ka, a pil a ka, tits aà gana ana mala məbatsa duwa a Mbulum a tsik ahər a, dite a sikehe a aaka aà dukw ilik i huɗ dukw əzləm biy gana ga ata, aka gər siŋgwe ga ata, i dəba ŋa ya, ta mere a a ga ŋgar ahər.

16 Na bəla wura a sese a aà guvah ŋgar a, a ne a dər pam biy BATSAH kwa ŋa ka, ta ge a gana ŋa, tits aà wur dukw ana ti slige a aɗəm a ya, kur siŋgwe dzik əzləm kəla aà wur urga kiliw dərməka makər (300). 17 Na a ne aà guvah ŋgar ata pam biy Mbulum, a viye mive maŋgayaba ka, ta pile a aka gana ana ti tsik ahər a. 18 Na bəla a ne à guvah ŋgar ata pam biy Mbulum, i dəba mive maŋgayaba ya ka, mala məbatsa duwa a mbulum a nikiɗe a a siŋgwe ŋa, a tsik a siŋgwe ŋa ka, tits aà gà mive ana a zeha ya, tsikw aà viye maŋgayaba ana ika miɗ a. 19 Na wele ata a ne à guvah ŋgar pam biy Mbulum, aka waya məmburɗwa ŋa ka, say a pile a ka, siŋgwe ana mala məbatsa duwa a Mbulum a tsik a ahər a, dite a sikehe a aaka à dukw ilik i huɗ dukw əzləm a, biy siŋgwe guvah ata ya. I dəba ŋa ya, guvah a mere a ahər ŋgar. 20 Na aka mburuɗ guvah ŋgar tsa, tàa kal dər a misle ŋgiɗ ka, a sle a aà məmburɗwa guvah ŋgar ata asa tsa. 21 Wele ata a səkəm guvah ata ya, a miyake a dər aà mive maŋgayaba, guvah ata a ne pam biy BATSAH kwa ŋa, a ne a ka, biy mala məbatsa duwa a Mbulum aà biybiy.

22 Na wura a ne a à guvah ŋgar ana meleke gà tsir ŋgar tsa, a səkəm mesikime pam biy BATSAH kwa ŋa ka, 23 mala məbatsa duwa a Mbulum, a ge a gana guvah ata ka, tits aà gà mive ana a zeha, tsikw aà mive maŋgayaba ya. A pat ŋa ata, na mala guvah a vile a siŋgwe ata ya, siŋgwe ata ka, a ne a pam biy BATSAH kwa ŋa. 24 Ama aka ndze ahər mive maŋgayaba ata ka, guvah a me a ahər a mala guvah ana malahalah ŋa ya, ahər a wele ana a ne ba ahər ŋgar a.

25 Gà gana gà dukw ata tserdze ya ka, ti live a nda dukw melive kur siŋgwe ana i ga tsəɗaŋŋa ata ya, kur siŋgwe ilik ka, anini dzik səla (20).

26 Wura a sle a à mene a à malahalah dukw gənaw ŋgar, pam biy BATSAH kwa ŋa tsa, aɗaba gà malahalah gà dukw gənaw fit tserdze: Gà sla, gà təmaŋ, gà awak ka, tar ka, gà biy BATSAH kwa ŋa, dukw ŋgar. 27 Na dukw gənaw ŋa dukw zlaŋgatsak ka, ta buruɗwe a ka, aka gana ana ti tsik ahər a, dite ti sikehe a dər aaka duwa ilik i huɗ dukw əzləm a biy gana dukw ata. Na aka mburuɗ tsəka, ta kele a dər aka gana ana ti tsik ahər a.

28 Asa ka, i təv ana wura a vile a, mburma, dukw gənaw, guvah ana dede ŋgar a miyakar dər a, a BATSAH kwa ŋa a biybiy ya ka, ti sle a aà mekele a dər tsa, dite ti sle a aà məmburɗwa ŋa, ɓav tsa asa. Gà dukw taf ata tə dza a BATSAH kwa ŋa aà biybiy ya ka, tàa neye tsəɗaŋŋa ndeyndey. Taŋa ka, bəŋa biy BATSAH kwa ŋa. 29 Ku mege ka, mburma tekeɗe, ti sle a aà mimburuɗwe a asa tsa, say ta kiɗe a iɗəm a.

30 Say ki vilwim a dukw ilik i huɗ dukw kurwa ya, a BATSAH kwa ŋa, ika gà dukw kurum ana kə geywim ara i dala ya ya, dite ika gà mawa gà dizl ɗaf kurum a. Taŋa ka, tsəɗaŋŋa pam biy BATSAH kwa ŋa. 31 Na bəla wura a waya məmburɗe ihər a əŋgal ka, a pile a gana dukw ata, dite a sikehe a aaka a dukw ilik i huɗ dukw əzləm a. 32 Biy dukw ilik i huɗ dukw kurwa ya,i gà dukw gənaw, gà sla, gà təmaŋ, gà awak a ka, ti zle a ka, mala ana zəva aka dəɗ aaka ya, taŋa na a ne a pam biy BATSAH kwa ŋa ya. 33 Mala dukw gənaw a sle a aà mipele a nda meziwe gà gər ŋgar, gà dukw gənaw ana gà ŋgwal ŋa ya, nda gà na gà ŋgwal ŋa tsiye tsa. Ama na aka mburuɗ nda biy ŋgiɗ ka, gà dukw gənaw ata sula ya ti ne a ka, pam biy BATSAH kwa ŋa. A sle məmburɗe a tar asa tsa › . »

34 Gà taŋa na gà məpala ahəm ana BATSAH kwa ŋa a tsikar a Musa ika gər kwite Sinay, aà məma dər a gà Isərayel a.