kollisampayya eerpa
2
1 hekoddu male qum sapan olote himampayya eerpampayyaa otant siip ila kiyyanep,
lamm otanshayn ilanno kollisampayyaa eerpampayyaa kinnaanninan;
iyyaa kollila eerpa hin nayquntin deyiyy ikkim deketi pulpulaminaness kodinan;
pold se diikayyin iyyaa qay nafenno marmattaann esseteeh nayquntin iqqari deynan.
2 orr lekenno paanaaddu se nam deesanniyyu kannass anninan;
erkamaaddu minann paana shaakket otamina.
3 kollisampayyaa eerpampayyaa hin kodashsheti hanhamaaddon torrot se iyyaa mashshaddu dikkiyyen ishaamaann inn daminan.
iyyaass horat sapan lek tureeshsh dikkisant;
patetanno iyyaa lushin.
4 Moohot hitaymiyyaan juppot erkayy nafi mutsurootta male ikkim didim keli poorinnat ili lashsh horat luushanninani kod.
5 settep lamm helpaan Moohot nooh se tsilluma kollinniyyonne orr pil nam tapp hin iyy olle kiyy diniy,
husslah se orr Mooha huura diinniyyu uqqalle kiyyan qarass haq patetatin deyiyyo amm husslah se olotess hemutsuroodemu.
6 lamm orr se Mooha huura diinniyyoss ikkim paahnat horati koddinaness sapara kamooraatenne heka sotom hak qassanninan tardat koddinan horat qari quur.
7 hekoddu male loots tsillampayt se erkamaaddu hin nam deesanniyy hanshashawan kallaanniyyu diniyy;
8 tsillampayt settenno otanshaddu ila kallaanniyyo erkamaaddu hin nayq akkaanne dakayya minann lashsh min nafseshiyy baaqurishsh.
9 et hin dahenn sedep koddane,
ikkim poldat orr se iyyi acacaman kallaanniyy ekkawsama kela dininninonne juppampayyaanno ikkim ashshann horsinninonne lashsh horatatessenno ikkim ashshann luushan olashinninu heup.
10 karakutt iyyaan hadat oshshittetin hin soha fadiyyan kann anniyyanne hin hayyotum Mooha tuffanniyy lashsh hortat lushaan ulli olashinnin.
kollisampayyaa eerpa hin oot iyyaa iyyaan deesot dapenne foojampayyaa kodden maalla,
hayyot moontall otaass amm huuriyyanemu.
11 hitaymiyya irrotanne qimussan iyyaa qara tawnaadan nafenno pold turass amm otittan iyyaa kasasiyyanemu.
12 kollisampayyaa eerpa hin lamm iyaan iyyaa ishshaaka diinniyyan otin;
iyyaa qum horet se qapama illo qalama dalattep iyyaan ullinhaash hinnat iyyaalli uumantin kallaanniyyanne qaap dapep kiyyan;
qum horet all patishshop iyyaanno all patinan.
13 oot iyyaa nayqunt erkayyen maalla heriy nayqunshaddot qeeddanninan;
masmasunshiddu,
kallapalle taarottaanne hasaddukodda kida;
hasaddukoddaaddu sedenn,
helpaan iyyaa inn olle damoti dehaanniyyane hasaddukoddaaddon erkama soha heka nam paasaaten,
iyyaan liilt dapenne nam deesanniyy erkannin.
14 inda arpalumat qapan;
amm juppot erkasa qara mitaatiyyanemu;
orr se amaantetin qima diiyyessenno paasin;
kodashshet ollenno hanhamin;
orr hin orr pisham kida.
15 iyyaa paana se pah all diiyyen illo qishshawen;
paana meet pior heka palaxam se kodashshet hoxsaattan nayqunt erkayy qallin antaan patindapen.
16 palaxam lamm oot jupposhayetess hetusham;
harret ishaama diinnishshu namap ishaamaan yaar himampayt sett ellashshitt.
17 orr hin aykaan haq dap kokiyyenne urrashshet kotan tuqquuramishshop kiyyan;
poorinnat nayqatenno iyyaa dikkisam.
18 iyyaa ishaama fooj,
iyaan awta dap ishaamaan orr se patindapatin kallaatta ila passanniyy ikkim hadat sohaatin nyauurinan sossopan ippaasin.
19 iyyaa mashshaddu aylamma nayqunt kodditete orr pilass,
"shayn kallaannintan" hekidin irraxatet iddaannin.
maana maalla,
nam pushmaad,
se impushess aylet koddin kida.
20 et iyyaa poldaaynonne dinnsampayitaayinnu Yesus kristoos ufunattan oshshum husslah qalle passaden kanna,
qall mitaatan oshum settin qapaman pushmaadane,
kallashaddu hekat tureeshsh qareell hekat kanneeshsh innayqat koddint;
21 iyyaa paana tsilluma ufunaaden kanna,
acac se miili qara ippateesh mitaata kapa,
et paana tsilluma ufunaatta diittan kallaadan kid iyyaa hedikk.
22 paahnat hin,
"herrot uqqoshayy ilop mitaatin."
settep lamm,
"maashat et jiqanto jooqqa ilop mitaatin kankalannin."
kidishshu iyyaa qarass kaysaatt.