irraxatet dexema pold
3
1 moyshadoot!
hin antu inni tsaafiyyu hitaym lakkiyyaa kida;
antu hitaymada hin lakk inni tsaaf,
ikkim qaap somm qafnaannintan inn hayisaassenne qaapusisaass kida.
2 lamm ikkim lel se himampayya miilampayya sed tureesh lelenenne acac poldaaynotenne heka dinisampaytaaynu se orr hitaym hin inn kapop hitam kapin inn akkatten immashsh oorsannintanessin fadin.
3 heikk tureeshsh sed qaapadaa;
helpa muutaytaate beejjanppayyaan hadashaddu se nayq kanni antan beejjiyyanniyy deyina.
4 iyyaanno,
"irraxatet se poldat deyinhin kid aha kishsh?
hak appadaannu raaweneeshsh,
uuma hiraym qareeshsh hiran heikk dahenn ullaah kiyyan" hekidinan.
5 orr hin,
moont sapan lek tureeshsh lel moohaatin uumamaadd,
hussanno haq ilanne haqin soorumamaayy heufunaattete marmannin.
6 husslah se essete kiyyonno haqann limam allipat.
7 moontanne huss hin ammann kiyy lamm hak lashsh horat se orr Mooha huura diinniyy uqqari allipatinanetess,
apittass lel settin ulli lushaminan olanninan.
8 moyshadoot!
inn lamm pold kapa lashsh shakkaah qum par kum,
par kum lamm qum lashsh shakkaah koddaayy,
akkan sed immashsh patisatta diiyyaa.
9 qum orr shokku olannina kidiyyan qaapanniyanep poldat amm lel irraxateshayy kaysisa olanninamu;
iyyat olanniyyu,
ikkim namat dahenn juppot qara mitaatinu nam shokkooh naf pata diinninu fadaann inn maalla duupannin.
10 lashsh pold qum keraatep inn ketta deyint;
awisette moont nass kaanenn tarpint;
uumot dahenn apittann doohin allpatina.
hussanne hin uqqara kiyy dahenn doohinan;
11 et illo hin dahenn sedep allpatiyyan koddo,
miilumanne Mooha huuran kallaattot ashshann inni fadusisa diinnina?
12 inn iyyaan lashsh Mooha darrayyin lushanniyyanne ikkim shakar kidinu deynu erkanniyy koddaa;
lashsh sette moont apittann doohint allpatint;
uumaanno hoolila apittatenn moojina;
13 hekoddu male innu moont awshittetanne huss awshitt se tsilloot uqqall kishshun irraxatet lelaayyetin lushannin.
14 semmaalla moyshadoot!
lashsh hin uqqari koddinan et lushattaalle kinnaattane,
poldat deesot shoke haasutta male andotalle inn qara paxaass kokkaadaa kallaadaa.
15 poldaannu duupanniyyu ikkim inn dinintani koddaayy ufnaadaa;
kafittaaynu se hoxsasham bawloosenno ufunat se iddaasant mitt iyyat inni tsaaf sed kida.
16 iyyat hitaymaayy dahenn qalless oot hinet hetsaaf;
hitaymaayy ilanno iyaan nam rakkusinniyy nami kala diinniyy kiyy.
orr ufunat iqojjenne errall yeesawiyy qum iyyaa matsaafadda pil kap shorkanniyyanep matsaafadda miilot kapanno shorkannin;
iyyaa hin kodiyyan pateshaddoss kida.
17 inn lamm moyshadoot!
oot inn sed turaqatta ufnaatten maalla,
patindapat orr nannayqatin tishaman ellisheshayn se qint qara sunka tura illushadaa;
18 sed kapeeshsh dikkuma poldaaynotenne heka qoricaaynu heka Yesus kristoosennenne iyy ufunaattan kaanaa.
ammannenno hak parparatessenno serka iyy koddenii!
ameen.