hitaym betsiroos lakkiyya
1
1 simoon se betsiroos kidamiyyu erkamampaytanne nam hitaym heka Yesus kristoos kodd kapa,
inn iyyaan amaantet se serkisant innu tsilluma moohaaynotenne heka dinisampaytaaynu heka Yesus kristoos kapin akkannep kishshu akkadess;
2 moohaanne poldaaynu Yesus ufunaattan dikkuma Moohaatenne andot inni lekenii.
hembantanne pahila Mooha
3 Mooha se serkooyyanne dikkumooyyin innu hemb ufnaattaaynu minann irrot moohumaayy,
iyaan kiyyatassenne Mooha huura innu fadusinniyy dahenn innu dayy.
4 serkooyyannenne dikkumooyyann irraxateshayy se kaant serka qaftun akkann;
hin kapann inn patet se hadat nayq minann are husslah qara kishshu kela passattaan iyyaan qaap Mooha qap kodditen.
5 sed minann ikkim hin arkanneett kiyy uqqari inni padawaminan kokkaadaa,
amaantet qarass dikkuma,
dikkuma qarass ufunat,
6 ufunat qarass ittur tooyatta,
ittur tooyatta qarass duupattan kokkaatta,
duupattan kokkaatta qarass Mooha acacaman kallaatta,
7 Mooha acacaman kallaatta qarass orr man shokkoohatep olliqaapatta,
orr man shokkoohatep olliqaapatta qarass hoxsunt padawadaa.
8 et hin inni lekane poldaaynu Yesus kristoos ufunaattan ikkim iyyaan erkama dapenne qunda dap kodda diinnintaness inn kodinan.
9 nam hin dap lamm indamalishsh akkan por seka kiyy akka diinniyyu;
jupposhayy hekat tureeshsh qalle miilayyenno immashshass patisad kida.
10 semmaalla kafoot,
hembamaaynenne pahisamaayn qimisaass se tur qarin tawnniyyaa kokkaadaa;
et sedep koditane amm apure kohaytisamihhintanemu.
11 paana sedenn daamum se parpar ulla kallaanninu heka poldaaynotenne heka dinsampaytaaynu heka Yesus kristoos qallep kalot patt inni daassamina.
12 et hin ufunaattan illo shaakket se inn qapattenin qintan kallaattan nafenno oot sedet inn qaapusisa qara amm ikkanneesh kidinhinamu.
13 hak antu husslah qara kiyyoss helpa mitt inn qiqqimsot afa fadusinniyyop ani kinnaannin.
14 qum poldaannu Yesus kristoos pat ani pahiyy mittass ikkimin shakar kidinu toxtin husslah qara qeeddaminu henxup.
15 ammann lamm antu maalla kokkaanniyyu,
etin toxtin inn kapa reehadu kanna ikkim helpa mitt hin immashshi oorsatta fottintaness kida.
maanyet serka kristoosset
16 helpaan innu oot irrot poldaaynu heka Yesus kristoosenne lakkiyyaa mitaataayy inni lelle,
innu mashshaynu kaanussaayy indan akkaaynoss maanyet male amm torrot shonkum namatin qaapawsantin dakayn inni lellemu.
17 helpaan nass,
"meetaaw antu hoxsaanniyyu iyyin masmasiyyu hin iyy!"
kidiyyu Mooha appa se serka kaan qapu kapa iyyi deye,
serkaanne kaanussa iyy kapa akkad.
18 helpaan innu utet se miilt qara iyy olle kinno,
nass se moontalleett dey innu mashshaynoss hendakayn.
19 lel hin himampayyan lelam pat innu pah;
semmaalla hak lashsh qeehannintu,
iskitt parashot mutsuraann qalli otawinoss,
qum op ispa se poorinnat ila kiyyu helinniyyanep innanno lel sed eti helittan kid hedikk.
20 heikk qareell sed ufunaatta inn fadusinnin;
lel him hin matsaafa miilot qalle kiyyu amm iyy nam heikk hasayy qari qall furinniyyomu.
21 maana maalla,
amm him shokkooh naf has namatin hedeyemu;
hekoddu male,
orrat sinkuma laaffot miilotatenn Mooha qara him qeeddaden illo ishaamen.