husslahatenne kristaana
4
1 otanshayn qalle adantanne jiiaytot ahayla deyin?
hadat se sohaan ila orr adishshu ilan hinemu?
2 hadannkishshan;
hekoddu male amm akkannikishshanemu;
ikannikkishshan iqqimessenno hadann,
hekoddu male amm akkatta fottikishshanemu,
ollenn jiixin orr adin;
lamm oot inn Mooha dinkamatta diinnishshan maalla,
hin inn fadishshan amm akkannikishshanemu.
3 et Mooha dinkamannishshane,
dinkamaann mitaatila dapiyyu,
oot inn hin inn dinkamatten masmasunt sohaann qara nakasa qaap nayqin dinkamannishshan maalla kida.
4 inn iyyaan amaantet dap,
arpallayaa!
nam husslah hoxsaanniyyu olishsh Mooha koddaayy inxuftanemu?
setep lamm nam husslah hoxsaanniyyu dahenn olishsh Moohaat koddin.
5 lamm hin matsaafa miilot,
"laaffot Mooha hin iyyat innu day ikkimin iyyaseeh kinnaanninoss maxashanumin" kidiyyu kat aypotassemu?
6 hekoddu male,
matsaafa miilot,
"Moohot fojampayyaa qar hittinnin,
dippatayyaass daayyayy daannin."
hekidin;
daayy hin Moohot daaniyyu lamm,
heikk qareell taw.
7 semmaalla Mooha acacama,
hor taapiloos shiitaa,
inn kapa all feelannina.
8 Mooha kettop dehaadaa,
iyyanno inn kapop dehaannina.
inn jupampayyaa,
kiyyashayn jiqadaa,
inn iyyaan qaap lakk qap,
mutsuraann miilisadaa!
9 taajamaa,
dappiyyaa,
pooyaa,
holsinaayn pooyti oohamu,
masmasunshayn dappeti oohantu.
10 Mooha turi lahaat iqqapaa.
iyyanno errop inn qapina.
11 kafoot,
orr keya diiyyaa.
nam nam keyiyyu shokette horat nam qari quuriyyu,
halitt Moohaat keyin.
halitt qarassenno horat quurin,
halitt set qarass et horat quurishshu koddo,
horat quurampayt kidamint male,
amm iyy halitt se lushanniyyomu.
12 iyy halitt daanniyyonne horat quuriyyu lamm,
iyy dinisaassenno allpatisaassenno fottiyyu Mooha shokkooh kida;
kat att ayno hin nam qari horat quuriyyu?
korsa foojampayyaa daassam
13 inn iyyaan,
"aw shokenne paarre huss shokkopin anninna,
ullassenno pari kallaanninna,
heranninna,
kodashshet lekitenno orqudop qapanninna" kidiyy illushadaa!
14 maana maalla,
paarre iyyaan koddina amm heuftanemu.
kiyyashinn lamm maanaalle kishsh?
kiyyashinn qum torrayya okkoot kapa helpaasseeh akkaanniyyu,
ukkanna tawiyyop kishsh kida.
15 sed kapeeshsh,
"et hinaat pold kodditu innu kinnaanno,
hin shoke hinetin erkanninna" kida inn fadusinn.
16 inn lamm sedep kida kapeeshsh foojaynenn ieskinnin.
fooj sedep kiyyu dahenn nayqunt kida.
17 sedep lamm,
nam iyaan dikk erkasa upu illo erkasa diinniyyoss,
erkasa diittaay iyyass juppot koddin.