korsa shorohoti daassam
5
1 ammann inn shorohot,
hooyaa dakassadaa!
oot rakkot kaant inn qari deyishshu maalla,
ullupaa pooyaa!
2 shorokumaann dahenn puutayyotaann all patt,
uuwawaannanno piletann all damamen,
3 worqeshaynenne pirreeshayn hejaljalooden,
jaljaloshaddonno maanyet inn qari koddint.
qum jaljalot silf damishshop,
shorokumaann apittap dakinshayn doohinnina;
lashsh muutaytaatess shorokum orqud ulli tuulatten.
4 oot inn orr se ulayn qalle erkama koddi kalisot daatta diitten maalla,
toare nass ullupittaaddot dakaysamaann,
ullupittaaddonno lapitt Mooha se dahenn fottiyyu qallenn paiy.
5 kallashinn inni senaaddenne masmasuntin kallaattaaynenn qum horm qalot meeriisamep mutsuraann kappisatten.
6 tsillampayt qarass eerpaann horat quurten;
ikatten;
iyyanno amm inn heshiittemu.
helpa miidamaate duupattan dexema pold lushatta
7 kafoot,
haka dexema poldaaynoti duupattan lushadaa.
ul peehampayt roop kashanatenne heka hakayt duupattan lushattaann qunda erkamoyy hin dikk huss qara akkannin.
8 innanno sedep duupadaa,
oot dexema pold dehaaden maalla,
irraxatetin kokkaadaa lushadaa.
9 kafoot!
horat inn qari quurama tura shokku shokkotayne orr qari kumulliyatta diiyyaa.
toare,
dexema horat quurampayt hedehaaden.
10 himampayyaan mahha moohaatin him lel helpa miidamaate duupattan rakkot qeeddattaaddu paahnat inni kodditu.
11 lamm orr se duupattan qimess,
"iyyaan hartood" henkidin,
iiyoopet ashshann ikkim duupad hedakayten.
moohaanno muutayta kela ikkim ashshann dikkunt iyyi erkayy heakkiten.
sedennenno Moohot,
iyy nami mutsuroonniyyone kardall pald koddaayy heakkiten.
12 kafoot!
heikk tureeshsh,
moontannenno hussannenno kodditu maanaannenno kakatta diiyyaa.
et ishaamaann shaakket koddane,
"heyye" kidaa;
iyaan kodda diinniyy koddane,
"iyyokku" kidaa.
et ishaamaann sedep kodda diyyane lamm,
horat inn qari quuramina.
dinkam amaantetin kodd
13 inn ila nam rakkot ila kiyyu et kinnaado,
Mooha dinkamadu.
iyy masmasunt qapu et kinnaado,
laaletin aypila Mooha dehayyu.
14 inn ila nam baaqiyyu et kinnaado,
sinkiyyaa man Mooha hembu illo iyyaa mahh moohaatin tifin iyy roopen,
Mooha idinkamenii.
15 dinkam amaantetin dehaad,
baaqampayyaa dininnin.
moohaanno baaqampayt baaqayy ila dininnina,
et juppot erkayyu koddonno all idiissamint.
16 semmaalla ikkim dinintaness jupposhayn olli putsiyadaa,
shokku shokkotayne Mooha olli dinkamaa.
dinkam tsillampayyaa erkamaan lek erkasaass irrot kaant qapa.
17 eliyaas qumaaynop nam.
iyyat ikkim roopat inrroopiness qimiyy Mooha dinkamad.
roopanno husslah qari par halpattann paka roopa diiy.
18 lamm qar oor Mooha dinkam,
moontanno roop daatt,
hussanno unt palhayy.