arrap lushatta
3
1 kafoot,
innu hin kollisampayya kodd ikkaaness horat ikkimin qeeddanninnu heufutan.
semmaalla inn ila iyyaan lek kollisampayya kodda diiyyenii.
2 innu helpaan leken patindapin;
nam ishaamaayyin patindapa diinniyyu et kinnaado,
iyyat nam dakintayy dahenn lushatta fottenne ippall kidamin.
3 fart ikkim innu dakaynoss kilkan kapi kodannin,
fart settenenno por innu hinnop mitaasannin.
4 pahanatass koonkot et iyy kaan koddu haayyan tuqquuramiyyu koddu nafenno,
nam hin annusinniyyu iyaan qojenn por iyyat fadiyyop mitaasannin.
5 sedep lamm arrapat dakint ila heqoj male,
iyaan kakkaanenn foojin.
mur kaan apitt qojenn doohin.
6 arrapat mashshayyess apitt.
arrapat meel dakinshaynu ila qum husslah se nayquntin innaakoodetep kiyy;
dakintanno dahin oshshumusinnin;
qum apitt parparatepanno nam doohinnin;
mashshayyessenno apitt kahanametin doohinn.
7 uuma husslah qara kiyyonne pinanaanne hampiranne,
uuma kardin soohiyyonne pinana pakatetatenno dahenn et kollinniyane pahiyyan;
lamm pahasenno hepahen.
8 hekoddu male aynonno koddo arrap pahisa amm hefottemu.
arrapat iyy nayq,
haysatta dap,
qoric nam ikanniyun ulli innaakod kida.
9 arrapaaynu sedennin moohaaynu appaaynoss aypila dehanninn,
ukkanna lamm nam se paahanat moohaatin uumamin pishinn.
10 arrap se shokkooh qara aypilaanne pishayma sohannin.
kafaawu,
amm sedep kodda fadusinnishshamu!
11 ayka shakkanooh ila haq sommanne haq nayq urqiyamu?
12 kafawu,
kat daysha dalot ekert daliyyamu,
shokenne woynet dalot dayshsh dalishshamu?
lamm ayka nayq ila haq somm akkataass fottamiyyamu?
ufunat moontallettenne ufunat husslah
13 inn ila nam qallixishshaakaanne ufunat qapu ayno?
erkamaan iyyat qallixishshaakaanne dippatumin kaysiy kallashayy se dikkatin akkiyyu.
14 et mutsuraann qalle maxashanumanne ihoxsattot kinnaanniyyo fooja diiyyaa.
shaakket qarassenno erpotta diiyyaa.
15 maana maalla,
qallixishshaaka sedep kiyyu amm heka moohaatemu.
heka husslahatenne,
heka sohaatenne,
heka qayyat kida.
16 por se maxashanumanne ihoxsattot kiyyu ila,
orrqari sohattaanne erkama nayq kinnaann.
17 hekoddu male,
qallixishshaaka Mooha kapa akkaanniyyu turiqattass imiil;
ukkannass lamm iyy andot hoxsattaanne dikkuntanne orqara dakayaanne allihattotanne qunda erkamaan dikkatin innaakood,
qariqattaanne ippeepa qalle teeken kida.
18 orr andot hoxsaanniyyu andot peehin,
qunda tsillot orqudop qapannin.