hiyyayt tufatta amm fadusinnishshamu
2
1 kafoot!
inn iyyaan yesuus kristoos se pold serka koddin,
amaaniyy,
nam shokkoss ishokku qara taw kidan otant orr qalli rehaytet koda diiyyaa.
2 pahanatass nam lakk por se inn ulli orqudiqapamishshanep deyen;
iyy shokku shorokitt uuwaat somm uuwadd tsuqaan warwariyy sorumad;
iyy shokku lamm,
teekayt uuwaat kakkaaxant ussaatott uuwad;
3 se uuwaat somm siriyadess serka daattan,
"toare,
por se sommi laiyii" et kidishshan illo teekaytass,
"att toayteesh ellii shokene toayteet hussall laiyii" kidisshhan koddo;
4 inn iyyaan rehaytet kodiyyanne qariqatta erkanniyy koddaayn akkikishshanemu?
5 inn iyyaan hoxsasham kafaawu,
dakayaa!
Moohot ikkim amaantetin shoroht koddinanessenne irraxatet daamumaayy se iyyat orr se iyy hoxsaanniyyu day ikkim taynaness hiyayya husslah inpahisanemu?
6 inn lamm hiyayya tuffanninpa!
hin inn qar kaliyy por horatatepanno inn tishiy shorohotin hinemu?
7 mahha Mooha se serkisam,
inn inhembamishshan,
iyyaan otusinniyy iyyaapa.
8 qum matsaafa miilot,
"nam dahenn qum att ihoxsaannishshop hoxsaadu."
kidiyyop lel matsaafa miilot et kaysittane,
hin erkama dikk kida.
9 hekoddu male et otant siip qalli reehaytet kodishshan koddo,
juppot erkannin;
halitt Mooha qar tarpaaynenno inn tuhusinnina.
10 namat halitt Mooha ila et shokku qeppiyyu illo shakkan dahenn kaysiyyu nafenno,
qum iyyat dahenn all qeppiyyep dihamin.
11 maana maalla,
Mooha se,
"arpaluma diiyii" kid,
iyyeeh,
"ikasa diiyii" kid.
et arpaluma diittu nafenno,
oot att ikatt maalla,
halitt se heqeppitt.
12 ishaamaannenno erkamaannenno halitt Mooha se shayy kallaatta nami daanniyyonn iyyaan horat qari quuramintu koddaayn ufunaadaa.
13 maana maalla,
halitt Mooha nam,
nami mutsurootta diinniyyoss,
Moohot amm imutsuronniyyamu hekidin.
nam mutsurottot lamm,
horatann pushin.
amaantetanne erkama
14 kafoot!
namat et,
"amaantetin qap" kidiyyu illo amaanteshayy erkama dikkin akkisa diinniyyo,
maana ikkoddinta?
kat amaanteshiyy iyy dinisa fottintamu?
15 paahnatass orr iyaan iyyaa uuwanninanenne daminan dap et kinnaadane,
16 innanno lamm iyyaan iyyaa fadusinniyy iyyaa daatta male,
"andotin aanaa!
aasadaa!
duttanaa!"
et iyyaa kiditan kida,
kat maana iyyaa koddint?
17 amaantet erkama dikk male kishshu it toxt kida.
18 hekoddu male nam,
"att amaantet qaft,
antu lamm erkama dikkin qap" kidiyyu et kinnaado "amaanteshayt erkama kenda reeh ani akkiyyii,
antu lamm amaanteshawu erkamaawonnin hedi akkinnina" henkidina.
19 att,
"Mooha shokkooh kiyyaattaayy" amaanin,
sedenno hedikk!
amaana et koddito,
qayyanno amaaniyy,
huuraannenno tura helshannin.
20 att eepayt!
amaantet erkama daft tuyy koddaadd akkikishshamu?
21 helpaan appaannu aprihaam meetaayy isaaq nyerki koda Mooha dehayye,
iyyat tsilluma akkad erkamaannin hinemu?
22 sed ila amaanteshayyenne erkamaayy ikkim ollin kiyyanenne,
amaanteshayyenno ikkim erkaman kaysaatt akkikishshamu?
23 lel matsaafa miilot hin,
"aprihaam Mooha amaan,
amaanteshayyenno tsillot kodit iyy dihant."
kidiyyu hekaysaad;
sedenn lamm aprihaamet moyishsh Mooha kidam.
24 semmaalla namat tsilluma akkanniyyu amaantetanneeh kodda male,
erkamannenno koddaayy akkikishshamu?