hitaym yayqoop
1
1 yayqoop se erhayt Moohaatenne heka pold heka Yesus kristoos kodd kapa hitaymaan,
mayt israaelet hundann lakk hin husslah qari pulpulami hitam.
andot inni kodditu.
amaantetanne qall ishshaak
(mati. 13,55; mar. 6,3; erka. 15,13; kalaa. 1,19)
2 kafoot,
ekkawusamaanne rakkot hawhawi kishshu,
et inn qari paxishsho ikkaani masmassa.
3 maana maalla,
ekkawusama amaanteshayn ikkim duupatta akkannintan inn koddaadd heufutan.
4 duupattan kokkaattaann,
iyyaan akkan shakkanooh naf qara kelawa male kaysilan paiy purnatin innaakodd ikkim koddintan iyy inn kaysiy koddu.
5 inn ila nam ufunat iqqoj et kinnaado,
he Mooha dinkamadu;
moohaanno iyyass daannina;
maana maalla,
iyyat Mooha dikk,
iyy daayyaayy nam se dinkamanniyyu tuhayta male patt daanniyyu kida.
6 hekoddu male nam qaapayy lakk kodatta male,
amaantetin dinkamadu;
nam qaap lakk qapu kaahatta pakatet se tuquuranish haayaatin seseyiyu paahnaann.
7 nam sedep kiyyu lamm Mooha kapa akkan shokkooh naf afa akkanninop iyyass inkinnaanni.
8 maana maalla,
oot iyyat nam qaap lakk qapu,
iqasheshayyenneno ihenkelsiyyu kodd maalla kida.
masmasunt teekampaytatenne hekat shorokitt
9 inn ila iyy teekampayt kodd oot Moohot iyy kaaninninu maalla hemasmasu.
10 iyy shorokitt kodd lamm,
oot Moohot lahaat iyy qapinu maalla hemasmasu;
maana maalla,
oot iyyat qum pulal ayhittatep allipatinu maalla kida.
11 et lashsh ototin yaanto,
ayhitt sett kokinin,
pulalayyeno all yeinnin,
sommuma pulal settetenno all tawwannin.
qum sedetep shorokitt qaap erkama shorokumayyetenn all qishawin patin.
ekkawusama nam qari deyiyyu
12 help ekkawusamaate nam qimin duupanniyyu,
iyy hartood;
maana maalla,
qoyqoyt kiyyat parpar se Moohot lelaayy kanni orr se iyy hoxsaanniyyu daanniyyu qeeddannina.
13 helpa namat ekkawusamiyyo,
"Mooha an ekkannin" kida diiyyu.
maana maalla,
Moohot amm iyaan nayqin ekkawusamiyyamu;
amm namanno ekkanniyyamu;
14 namat ekkawusamiyyu,
mashshayyess hadat nayqatin tishamiyyonne qapamiyyo kida.
15 sekanna hadat pisamishsh juppot haayin;
juppot hin et kaantokuless,
toxt haayin.
16 kafaawu,
inn eepuma diiyyaa.
17 daayy dikkanne daayy innaakot kodd dahenn Mooha kapaah kida;
sedenno akkaanniyyu Mooha se qum kaatunaatep oohamaanne mimmitaatot kapa teek appa attumat kodd kapa kida.
18 iyyat uumaayy ila ikkim innu qart koddinnoss qaapad illo lel shaakketatin ikkimin meedaayy koddinnu innu kod.
se op dakayen erkaman akkisa
19 inn iyyaan hoxsasham,
kafoot!
hin immashshipatissatta diiyyaa;
namat dahenn iyy dakaya shakar kid,
jiiaytaanne ishaama shikaarsad koddu.
20 maana maalla,
jiiayta nam,
amm tsillot Moohot kiyyat nam qalle fadiyyu erkusinniyyamu.
21 semmaalla oshshumanne nayqunt lekisa all diittan,
lel se Moohot nafseshaynin dinisa mutsurann qalli ullidih mutsuraan dikkin qeeddadaa.
22 lel Mooha iyyaan erkama qara nakanniyy koda male,
iyyaan patin idapusinniyy illo dakayaaseeh dakayiyy kodda diiyyaa.
23 nam lel Mooha dakayaseeh dakayiyyu illo erkama qara nakasa diinniyyu,
qum nam se miintayy kaawwat ila tooyanniyyotep kinnaannin;
24 maana maalla,
et namat miintayy kaawwat ila tooyu illo alldiiyyo,
paahnashiyy ashshann qar ikkim kishshu esseteeh immashshipatisannin.
25 hekoddu male nam halitt Mooha se aylum nayqunt qalle patt sohashshinniyyu illo kaysila qarin pausinniyyu tooyan qimiyyu illo lel settenno immashshipatisatta male erkama qara nakanniyyu iyy hartood.
26 nam arrapayy lushatta male,
"antu moohan amaanin" kidiyyu mashshayyess ieepuminn;
amaanteshayyenno aypot kida.
27 amaantet Mooha appa turi patandapat daftenne it miilt koddishshu,
"meddaan lemmooddu qarin rawenenne,
inkawaan irishada qarin raaweness rakkoshaddu ila hesa,
mashshayyessenno oshum husslah ila lushatta kida."