2
1 ootaaynenne oot orr se lotoqiyya kiyyanne orr se miintawu akka male kiyy nafess sootant ashshann qint ikkim antu sootiyyu ikkim ufunaanintanesin fadin.
2 antu sootiyyonno ikkim mutsuraaddu kokkisattaanne hoxsuntin ollin kinnaanninan,
por ufunaat qintetep dahenn painanessenne kristoos se dekot Mooha kodd ikkim ufunaanninaness kida.
3 shorokum qall ishshaakaatenne heka ufunaat sedenno Yesus kapass dekad.
4 antu maalla sedep kidiyyu,
nam shokkooh naf inn sosopan inn eepumusisa tura kida.
5 etin sohan inn ketta reehadu nafenno,
laaffotann inn ollenn kiyy;
kallat Mooha masmasusinnishshun kallaataaynenne amaantet se qint inn kristoos qara qaftan akkaawonnenno masmasinkiyy.
kiyyat se kristoos kapin akkaannishshu
6 Yesus kristoos pold heamaantenne iyyin kallaadaa;
7 iyy sheehti kodada qari dihamaa;
hittin torpadaa;
kollinnat se inn kollitenenne amaanteshaynin qima kallaadaa;
aypilaan kaan Mooha dehayaa.
8 kollila kristoos qara kodda male,
halitt namat soorumad,
hin ullanhaash kiyy,
heka husslah kodd,
ufunatanne eepumisisa aypotatin namat inn qapa tura illushadaa.
9 maana maalla,
moohumat dahenn innaakotin kinnaanniyyu dakint kristoos ila kida.
10 innanno kiyyat innaakot akkatten,
se peashshilaanne hayyotum dahenn qarin mashsh kodd kristoosenn kida.
11 oot inn iyy amaanten maalla hekarrasanten;
karrasama settenno,
qaap soha se juppampaya kodd pata all furisaass,
se kristoosin erkawusam male,
amm iyy hark namatin erkkawusamemu.
12 helpaan inn ahalisantene,
kristoos olle mookanten;
iyy ollenno toxtalle sohatten;
inn toxt ila sohattenenno irrot Mooha se kristoos toxtalle sohashshiyyin amaanaynenn kida.
13 juppot erkasaaynenne sohaann heka juppot karrasama diitta minann inn iyyaan rawi makess;
ammann lamm Moohot kristoos olle iyyaan kiyyat qapass inn kod;
jupposhaynonno dahenn all innu hattiyy.
14 iyyat kuur tsaafa se halittin ulla kiyyu,
se innu kasasiyyonne innu shiittaalle kiyyu,
allpatiyy;
masqalet qarassenno daai illo innu ketta allsekayy.
15 irrampayyaanne hayyotum masqalet qarass push illo mehadda adanshaddu pata furiyy illo ikkim iyyaan poojam koddinan akkaanninan kod.
16 semmaalla,
damot shoke ukot,
lashsh shoke halahat leha,
shoke lashsh sampata serkisa minann aynonno horat inn qari quura diiyyu.
17 hin dahenn iyaan ittureesh deyaalle kiyyass kaatta;
hekoddu male hin shaakket kodd akkaanniyyu kristoos kida.
18 nam shokkooh naf dippataytap kinnaattan hitaymiyya Moohaat shoomattaanne raaetin akkin kidan qaap sohaatin aypoti foojan heriya male all inn hattisa tura illushadaa.
19 nam sedep kiyyu kristoos se mashsh kodd ketta iyy reehad kida;
qum mashshat meella dakint dahenn ripan qapiyyu kamminniyyop moohaanno shokkohum kristaana qum qaapayyetep shokkooh kodiyyu kamminniyyu kristoosenn kida.
kollinat patin daft qara ittooyaadaa
20 inn kristoos olle toxten illo halitt husslah heka turaqatta qara reehattene;
maanaass ammann afa husslah ketta reehatta diittenep koddan,
21 acacadaan,
"qapa diiyy,
kapin koda diiyy,
qappatta diiyyii" kidiyi pidamin?
22 hin dahenn oot iyaa acacadaan kollinat nami qari kodam kodden maalla,
et erkama qara nakayin kanna iyaan all pata dikkisam kida.
23 acacada hin amaantet op hinnatayyin isseeshsh sohashshiyyenenne dippatum pahenne dakint naypisan iyyaan ufunat qapap kiyyan;
hekoddu male hadat soha dawuraas amm fottiyyanemu.