kiyyat awshittet kristoosin akkaannishshu
3
1 sedeeshsh et inn kristoos olle toxtalle sohattene,
hin por se kristoos ulla miskitt Mooha qari lae,
ele moontalle kiyy kann fadaa.
2 lashsh min hin ele moontalle kiyy qari qaapayn haayadaa male,
hin are husslah qara kiyy qaapatta diiyyaa.
3 maana maalla,
inn hetoxten;
kiyyashaynenno kristoos olle Mooha ilass dekatt.
4 helpaan kristoos hin kiyyashayn kodd deyiyyo,
innanno iyy olle serkan akkaannintan.
5 semmaalla hadat husslah se inn ila kishshu dahenn all ikayaa;
iyaanno arpalum,
oshum,
puudda,
hadat nayqat,
shooqum.
shooqum tsootsa shoomattaat kida.
6 hinep kikkiyy minann orr se acacama diinniyyu qarass jiiayta Moohaat deyina.
7 sed tureeshsh innanno mashshayn hinep kikkiy erkasaann kallaannin.
8 ammann lamm jiiaytaanne,
miiranne,
shonkumanne,
otittaanne ishaamaan nam deesanniyy dahenn kapayn qalle allsekayyaa.
9 oot inn nam pahayt erkamooyy olle uuwaatap furitten allkashshen maalla,
eerpa olli ishaama diiyyaa.
10 lamm nam awshitt se uumampaytayy pahanatta ufunatin awshumiyyu uuwatten.
11 paana sedenn otant nam kiriketenne nam ayhuta,
otant nam karasametenne iyy karrasama diiy,
otant nam kollinat qapotenne se kollinat dap,
otant ayletatenne nam aylet kodda diiyy ila reehaytet amm hekishshamu;
kristoos dahennenne dahenn ilanno kida.
12 sedeeshsh inn orr moohan pahisamenne miilampayyaan,
hoxsasham koddaaynenn,
olli mutsurotaanne dikkuntanne dippatumanne etantumanne duupatta uuwadaa.
13 mashshmashshayn orr fotta;
inn ila nam shokku et akkan iyyat nam shokku qari inxijawusanniyyu qafnaado olli all diiyyaa;
qum kristoos all inni diiyyep olli all diiyyaa.
14 sed dahenn qareell hoxsunt se orqudop heikk qapan shokkohum qimisan deyishshu uuwadaa.
15 andot kristoos se inn meella dakint shakkaah koddan ihhembanten mutsuronn qalli daamuntu;
iyyaan aypisanniyyanno koddaa.
16 lel kristoos innaakotin inn qalle kinnaadu;
qall ishshaaka dahennin shokkushokkotayne orrkokkolliyyaa;
orrkorsaa;
laaletanne wosesanne,
nass laalet miiltetennenno mutsuroonn qalle qeedda Mooha aypisattan illaaladaa.
17 Yesus kapin Mooha,
appa aypisattan lelanne erkamaan inn erkannishshan dahenn mahh pold heka yesusin erkayaa.
korsa orr Mooha amaaniyyu daassam
18 inkawwa!
appa manayneti accaaccma;
hin pold kapa iyaan dikka.
19 appada!
inkawwa manayni hoxsaadaa;
iyyaan nannayq iyyaa kodda diiyyaa.
20 medda!
heikketin lemmaanni accaaccma;
hin iyaan Mooha masmasusinniyyaa.
21 lemma!
meddaann irraxatet all quura tura jiiaytan iyyaa miirasa diiyyaa.
22 inn aylamma!
piddampayyaann heka husslahati acacamaa;
inn acacamintan nam masmasusisaasseeh akkaatta kodda male,
Mooha huuran mutsuraallell koddu.
23 iyaan inn erkannishshan dahenn afa nam erkannishshanep kodda male,
qum inn Yesus poldi erkannishshanep mutsuraann qalle sohashshisan erkayyaa.
24 poldat ikkim heriy,
tayma koddinu inni daanninu heufutan;
hin inn erkannishshan kristoosess kida.
25 oot qar quura Mooha kapa teeken maalla,
nam iyaan nayq erkanniyyu oot erkamaayy hin nayqatess horatayy qeeddannina.