hitaym bawloos
orr qolaasiyaatess
1
1 bawloos se has moohaatin nam hitaym heka Yesus kristoos koddenne kafittaayy tsimootos kapa,
2 kafaaynu hin sapara qolaasiyaate kallaanniyy,
kristoosin miilampayyaanne iyyaan amaanam koddess hitaymaan hitam.
Mooha,
appaaynu kapa has dikkanne andot inni koddenii.
aypilaan bawloos orr qolaasiya minin Mooha dehayy
3 helpaan innu Mooha inni dinkaminkinno,
Mooha,
appa poldaaynu heka Yesus kristoosin lashmin aypisannin.
4 maana maalla,
amaantet inn Yesus qara qaftanenne oot hoxsunt se inn miilampayya dahenni qaftan hendakayn.
5 amaanteshaynenne hoxsunshinn irraxatet se moontalli dikkisant inn luushishshu qarass dihant;
oot irraxatet sedetenno helpaan lel shaakket hin lel masmasunt kodd turqatta inn kapin pae hedakayten.
6 lashsh se inn lel masmasunt dakaytenenne shaakketum dikkuma Mooha ufunaatteneeshsh hiran,
qum lel masmasunt hin otanshayn ili erkayyep,
husslah qara dahenn qunda kodattaann kamma qara kiyy.
7 ebafiranno lel masmasunt sed innass helel.
iyyat se hoxsasham poraaynua ili koddiyyu erkamampayt kristoos iyy amaanam koddene innu olle erkanniyyu kida.
8 settep lamm iyyat ikkim inn laaffot miiltin mashshimashshayn orr hoxsaannishshan innu lell.
9 semmaalla lashsh se innu sed dakayneeshsh hiraann,
qalliqaapattaanne ufunat se laaffot miilot inni daannishshonne has Mooha ufunaattot ikkim inn ili innaakinoss Mooha kaassattaanne dinkama amm all henxelashshinnemu.
10 settep lamm kiyyat poldi senishshu kallaattan ikkim iyy masmasusinnintani,
erkamaan dikk erkasan ikkim qunda dalinitan illo Mooha ufunaattan kamman aanintanesin Mooha dinkamin.
11 heikk dahenn dupattan ikkim fottintani iyyaan dikkisad koddaass Mooha irroshayy se kaantin qimussa inni dayyu.
12 lamm Mooha appa,
se ikkim daamum attumat qalle miilampayya olle por qootannintani inn kaysiyy masmasuntin aypisada.
13 iyyat irrot poorinnat kela innu passiyy illo ikkimin daamum metaayy se hoxsasham qallep kalinnu innu kod.
14 iyyannin qaaxamaann illo allhattot jupposhaynu akkann.
Yesus kristoos heikk qareell kiyy
15 kristoos Mooha se akkaatta diinniyyoss paahnatayy shaakk kida.
iyyat uuma heikk turann kiyy.
16 semmaalla hin moontanne huss qara kiyy,
hin akkaanniyyanne akkaatta diinniyy dahenn,
sheedda daamumatenno koddu poldumanne peashshilaanne hayyotumanno iyyann uumamen;
Moohot akkan heikk uum iyyannenne iyyass kida.
17 iyyat heikk turann kiyy;
akan heikk orqaqqapaden ellen iyyann kida.
18 iyyat man kristaana se dakinshayy kodditess mashsh;
iyyat heikketess turiqatta koddaass,
hiraymanne toxt ila sohattaannenno qart.
19 sedenno oot Moohot ikkim moohumaayy innaakotin kristoos ila kinnaanninnu fad maalla kida.
20 lamm iyyann hin moontalle kiyyanno hussalle kiyyanno dahenn iolle araars;
diik meetaayy se masqalet qari tiqamenn andoti kod.
21 tureeshsh inn Mooha ketta sekaatten kallaannin;
qaapaynenne erkamaann hin nayq minann inn olishshadaayy kida.
22 ammann lamm miilampayyaanne iyyaan diddikk,
haasutta dap kodan itturop inn dehasaass,
meetaayy dakint sohaatin toyaayyenn Moohot iolle inn araars.
23 sedenno et irraxatet amaantet se lel masmasunt qara akkaatt qari dihamaanne senan sesseya male qiman kallaannishshane kida;
lel sedenno se inn dakaytenenne se orr husslah qara kiyyu dahenni ishaamam kida;
an bawloosenno lel masmasunt sedetees erkamampaytin kodd.
erkamaan bawloos nam hitaym koddan erkayy
24 ammann rakkot se antu ootaayni qeeddanniyyonn masmasinkiyy;
oot man kristaana se dakinshayy kodditeti rakkot kristoos qeeddad qara iyaan kellawiyy sohaawonnin qar kaysinnina.
25 lel Mooha dahenn ikkimin inni ufnusinninoss hayyotum se Mooha kapa ani daassamenn erkamampayt man kristaanaatin kodd.
26 lel Mooha sedenno,
sapan se tarpe se nam tura dekam olad illo ammann lamm Moohot miilampayya dahenness qar akkiyy kida.
27 iyaan Moohot miilampayyoyyi ufunaytisa hinnaadenno,
shorokum serka hin ulli dekam iyaan ashshann kaan koddaaddu otant siip qalli akkisaass kida.
hin dekamenno kristoos inn qalle kinnaattaayy kida;
iyyanno irraxatet serka se innu lushanninkinnot.
28 innonno namat dahenn kristoos ufunaattan iyy palh ikkim koddinu dehasaassin nam heikketi qall ishshaak dahennin kollisaane korsan oot kristoos ishaamin.
29 oot Moohot irrotayy se kaantin anilin erkanniyyu maalla,
irrot sedenn erkamayn ikkim kaysanninanessin ananno sootantin payyahin.