tsillot shaakket
3
1 sedeeshsh,
kafoot,
poldin masmasaa!
se antu turin inni tsaaf etin qar ooru inni tsaafo amm faakinhinnamu,
hor illushattass inni koddinta.
2 herrada qara illushadaa,
erkamampayyaani nayq qara illushadaa,
eerpampayyaan dakint qar quuratta (karrasama) kollinniy qara illushadaa.
3 oot innu iyyaan sohan kodda male laaffotin Mooha shoomanniyy,
Yesus kristoosin ieskinniy koddin maalla,
innu iyyaan shaakketin karrasam kida.
4 et sohan fooja koddo,
antu akkan lekenn fooja fottinhina;
nam heka sohaatin fojiyu et kinnaado antu iyy qaran taw.
5 karrasama koddo,
antu dalade lashsh lakkushiyassin karrasam,
israaelet ila antu israaelishsh,
kaf israaelet ila mayt piniyaam,
ipret ila iprishsh miil,
tampet lushaassenno antu ferasishsh.
6 et oot halitt lushaat maxashanuma koddo,
antu iyy maapar kristaana kannaxarinniyu,
et halitt lushattan tsillum akkatta koddo,
antu haasutta malen kiyy makess.
7 hekoddu male iyaan antu infoojiyu dahenn kristoos maalla iyaan awta dapepin tooy.
8 sed qareell,
oot iyaan poldaawu Yesus kristoos ufnaatta qara taw kinnaatta diiyen maalla,
dahenn iyaan awta dapepin tooyin,
iyy maallan kid heikk dap.
kristoos akkattaass,
heikk iyyaan op man talla all ushuqiyanepin tooy.
9 antu maalla sedep kod,
halitt lushattan tsilluma antu qapu alldiittan,
kristoos amaanan tsillumaan Mooha kapa deyiyy amaantetin akkattan ikkimin iyy olle kinnaanninoss kida.
10 ikkimin kristoosenne irrot toxt ila sohattaayy ufunaanninu,
rakkoshayyenno qootanninu illo toxshayyep kishshu toyinoss hadanninkiyy.
11 toxt ila sohatta qarin paxaassenno hadanninkiyy.
por kaysilaatep feela
12 sed dahenn henxakkad shoke kaysila qarann hempaiyy,
amm kida fottinhinamu;
hekoddu male,
kristoos hekayyess an kodad;
ananno se iyyat maalla hekayy an kodad hekoyyu kodattaassin kokkaannin.
13 kafoot,
ananno mashshawoss sed henqapad kida amm fottinhinamu;
hekoddu male akkan shokkun kodin,
hin an kanneeshsh kiyy immashshapatisattan hin an tureesh kiyy qapa kokkaannin.
14 oot Moohot Yesus kristoosin hembanta kaanin an hemb maalla,
por kaysilaatepin heriyawu qeeddatta feelin.
15 semmaalla innu hin kiyyat laaffotatin qimm dahenn sedep qaapatta innu fadusinnin;
akkan karaddon et qaap hawahaw kikkiyyu qafnaattane,
Moohot innass patapahinnina.
16 hekoddu male kiyyat se innu qallin painnin kallaannaa.
17 kafoot,
kiyyashawu paahnat inni kodditu,
qum kiyyashinnu paahnat inni kodditep orr qumaaynop kallaanniyy tooyaa.
18 qum antu sed tureeshsh helpa leke inni lelepanne,
ammannenno ilmaman inni leliyyop,
orr lek kallaataddon,
rahhama krsitoosess olishshada kodden.
19 muutayta orr sed patet;
kardaaddu Mooha kodaden;
iyaan iyyaa deesanniyy serkooddu kodaden;
qaapaaddonno heka husslahat kodd.
20 innu lamm hussaannu moontalle kiyy,
dexema dinnsampayitaayinnu heka poldaaynu heka Yesus kristoosenno darayyannin lushannin.
21 iyyanno irrot se iyyat heikketin peashshisa fottiyyonn,
ikkim dakinshaynu se deesawt dakinshayy se serkisant pahanaannintu,
oohina.