korsa muutayta
4
1 semmaalla,
inn iyyaan antu inn hoxsaanniyonne inni darrayyiyu,
inn hin masmasunshawonne serkaawu kodd kafoot,
poldin qimaa kallaadaa.
2 ewotiyanne sintsikii,
mashshamashshaddu qum ishartanne ankashetap poldin ikkim olli seninanessin iyyaa korsin.
3 hed se amaanam an olle erkamampayt kodd,
ikkim iskatt sed hesintossin hed dinkamin;
iyyaa erkama lel masmasuntatess an olle ellen;
an olleeh kodda male,
qelemintsoosenne erkamampayya pil hin mahhadaaddu matsaafa kiyyat qari tsaafam ollenno kida.
4 helpa mitt poldin masmasunt inni kodditu!
qaran oorine,
"masmasunt inn kodditu!"
5 dikkumaann nam heikk turi akkaadenii,
dexema poldi hedehaaden.
6 akkan heikk dinkamanen,
fadattaannenne aypila olle hin inn fadannishan Mooha dehayyaa male,
akkan shokkooh nafin baaqura diiyyaa.
7 lamm oot inn heka Yesus kristoos kodditen maalla,
andot Mooha hin qaapatta nam qareell kishshu mutsuraannanne qaapayn lushintta.
8 ammann kafoot,
hin shaakket kodd dahenn,
hin serka qap dahenn,
hin tsillot kodd dahenn,
hin miil dahenn,
hin hoxsasham dahenn,
hin iyaan dikk kodd dahenn,
dikkuma koddo shoke aypilaanno hinep kikkiy,
qaapadaa.
9 hin inn an qara kollitenenne qeeddatten,
inn dakaytenenne akkiten erkayyaa,
Mooha andotatenno inn olle kinnaannina.
aypila bawloos
10 antu poldin ikkaaness masmasinkiy.
maanaasse,
qum inn sed tureeshsh ani qaapannishanep ani qaapatta hirten;
sed tureeshshanno anass heqaapatten male,
amm inni hekodditemu.
11 antu maalla sedep kidiyyu,
amm oot antu dap maallaamu;
hin antu qapu an kaynan kida henkoll.
12 dapaanno henxup,
qafnaattanno henxup;
qafnaattaannenne dapaannenno,
duttanaannenno tuffaannenno,
paana heikketenn kallaatta henkoll.
13 kristoos se irrot an daanniyonn heikk fottinhin.
14 hekoddu male rakkoshawu an olle qootattaaynen iyaan dikk erkatten.
15 sed qareell inn orr filibisiyoos mashshayness,
helpaan inn turaqatta lel masmasunt qeeddannishshan,
antu meqtooniya sohanniyo,
inn pateeshsh maapar kristaana pil daattaanne qeeddattan an olle kinnaatta diittaddu,
heuftan.
16 helpaan antu teseloonqe kiyyonno qar oorten an qarqaarten.
17 sedep kidaawonno iyaan inn fadusinniyy inni puraass male,
amm qarqaarsaayn fadaassemu.
18 hekoddu male qarqaarsa an fadusinniyooh kodda male se qareell ani hitten;
settenno efrotitsu qara henqeeddad.
qarqaarsaann qum laaqqaan dinnahunt somm qap Moohot qeeddanniyyu immasmasiyyot kida.
19 moohaawu lamm shorokumaayy se kaan mittass hin inn fadusinniyy dahenn Yesus kristoos kapin inni daannina.
20 moohaaynu appaynoss haka parparat serka koddenii.
ameen.
paanussa muutayta
21 orr Yesus kristoosin miil dahenness,
paanussa dehayaa.
kafaawu hin an olle kiyy paanussa inni dehannin.
22 miilampayyaan saparaan qalle kiyy dahenn paanussa inni dehannin,
karakutt orr man Daam romaa (qeesar) paanussa inni dehannin.
23 has dikk heka pold heka Yesus kristoos laaffoshaayn olle kinnaadu.
ameen.