dippatum kristoos qafnaatta
2
1 shokkohum se inn kristoos olle qaftan minann,
korsana koddo,
hoxsuntin orr kokkokisa koddo,
laaffot miilot olle shokkohum qafnaatta koddo,
iyyaan dikk olli qaapattaanne olli mutsurootta koddonno,
2 hoxsunt shakkaahanne mutsura shakkanoohanne qaap shokkoohin kinnaattan masmasunshawu kaysiyyaa.
3 dippatumin innaakkoottan ikkim orr shokku inn kapa aakani dihadaa male,
ihhoxsaattaan shoke "aynu an qara tawa" kidan foojan akkan shokkooh naf koda diiyyaa.
4 iyyaan nam heikketi koddina tooyaa male iyyaan inn fadusinniyyaaha tooya diiyyaa.
5 qaap se Yesus kristoos qalle kiyyu inn qallenno kiyyaadu.
6 iyyat heikketin Mooha;
hekoddu male Mooha mitti kinnaattayy all hayya ikkim iyyi fadusisa diinnishshu amm hedihademu.
7 laaddu iyy akkan dapess ikkod,
ayletap kodd,
nam kodd dalad,
qum namat kinnaad akkaad.
8 dippatumin iddeesayy,
hak toxtatess,
settenno hak masqalet qara rahhama tooyastess owo kid.
9 sed minann Moohot por serkaan kaanet iyy haay,
mahh mahhada heikk qareell kiyyu iddayy.
10 semmaalla hin huss qaranne moontallenne huss kanneett kiyyanno dahenn mahh yesusess shoomanninan.
11 lamm arrapat dahenn Yesus kristoos pold koddayy lelaan Mooha appa serka daannina.
orr husslahati attumat kodda
12 moyshadot,
qum inn iyyaan helpa mitt acacamiyy kodditenep,
antu inn kapa kiyyooh kodda male,
amman antu ayye kinnaatta diiyenno,
se qareell tawnisan dinaayn kaysisaass huuranne helshattan kokkaadaa erkayyaa.
13 ikkim hasaayy se dikk erkasa hinnaannintanessenne erkamaan kaysinnintaness hin inn ila erkanniyyu Mooha kida.
14 akkan heikk kumuliyattaanne shiitta male erkayyaa.
15 sedenn dalashot se kellatenne nayq ila medda Mooha iyyaan miil haasutta male kiyy deesot dap koddintan qum iskaatep husslah qari otawintan.
16 lel Mooha se kiyyat daanniyyu et qapattane patt feela diittaawwonne patt tashsha diittaawoss,
lashsh dexema kristosete innannin foojina.
17 hekoddu male laaqqaanne erkamaan inn amaantetin dehannishshan qarass,
et kiyyashawonno laaqqaap tiiqant kid,
masmasinkiyy;
dahetayn ollennon masmasin.
18 settep innanno masmasaa,
an ollenno masmasaa.
tsimootosenne efrotitsu
19 helpa deha tsimootos inn kapop hita illo iyyaan inn qalle kishshan dakayan masmasaass,
Yesus kristoos poldin irraxatetin qapa.
20 iyy male nam qumaayyep andoshayn qaapanniyu amm henqapamu;
21 orr pil dahenn hasaddu kaysisa fadin male amm heka Yesus kristoosemu.
22 lamm kiyyat tsimootos it dikk koddaadd heuftan;
maanaanne,
iyyat qum meet appayy olle erkanniyop lel masmasuntat an olle erkayy.
23 semmaalla maana qarin ikkim antu painninu etin ishshaaku kanna,
shakar kida iyy inni hitaass irraxatetin qap.
24 ikkimin ananno lamm mashshawu shakar kidinu deynu ikkim poldat ani hesinu henxup.
25 lamm efrotitsu se kafittaawonne erkamampaytanne nam adant an olle kodd,
inni hita an fadusisaayy henxufnaad.
iyyat erkamampayt se an fadusinniyyu inn sed tureeshsh an hitten kida.
26 iyyat dahetayness darrayy;
oot inn baaqaayy dakayten maallanno baaqurin.
27 iyyat shaakketass hebaaq toxti dehaad;
hekoddu male Moohot iyyass mutsurodd,
iyyasseeh kodda male,
an qarassenno dappet qari dappet padawama tura ani mutsurood.
28 semmaalla et iyy akkitane,
ikkim masmasintanenne dappeshiyu hoshilintoss iyy inn hitan ikkaani fad.
29 oot iyyat poldin kafittaayn kodd maalla,
masmasuntin qeeddadaa,
orr iyyap kiyyonno serkiyaa.
30 iyyat iyaan inn an erkasa fotta diitten kaysisa maalla kid,
kiyyatayy naf satatta male erkama kristoos maalla toxt qarin paxiy.