hitaym bawloos
orr filibisiyoosess
1
1 bawloosenne tsimotoos hin aylamma Yesus kristoos kodd kapa,
miilampayyaan Yesus kristoosin kiyy sapara filibisiyoos qalle kallaanniy,
qimaayyaanne erkamampayya pil dahenness,
2 Mooha appaaynonne poldaaynu Yesus kristoos kapa has dikkanne andot inni koddenii.
aypila bawloos
3 helpaan antu inn qaapanniyo dahenn moohaawun aypisannin.
4 helpaan antu Mooha inni dinkamiyo dahenn masmasuntannin inn dinkamin.
5 maanaasse,
helpa hiraytaate hirten illo hak ammannet lel masmasunt lelan erkamaawoss an olle kinnaatten.
6 Mooha hin erkamaan dikk kiyyashayn qall hir hak lashsh dexema Yesus kristooseti ikkim kaysinninu shaakketass henxup.
7 ootaayn sedep qaapatta an fadusinnin;
maanaasse,
antu mutsuraawu qalle innin qap;
ammann antu hidalle kiyyonno koddo hidamaawu turannenno lel masmasuntati ellaassenne qimisaass,
dahetaaynen an olle dikkuma Mooha qootatten.
8 ikkim antu hoxsunt Yesus kristoosin ashshann inni darrayiyu,
Moohot maanyeshawu.
9 hoxsunshinn ikkim ufunatanne qallqaapattan se turi qareell kaanan annintossin Mooha dinkamin.
10 dinkamaawonno,
ikkim iyaan dikk ufunaattan pahisannintan illo hak lashsh dexema kristoset iyyaan miil haasutta male kiyy koddintaness kida.
11 paana sedenn kiyashinn it qunda tsilluma se Yesus kristoosin akkaanniyyun innaakoott koddaan,
iyyaan serkanne aypila Mooha akkusinniyy koddintan.
hidama bawloos lel masmasunt qallipaldayy
12 ammann kafoot,
hin an qari paiyy,
lel masmasunt paldaattan anta koddaayy ikkim ufunaannintanessin fadin.
13 semmaalla hidamaawu kristoos maalla koddaayy,
orr man Daam lushiyonne orr pil kapassenno dahenn heufunasham.
14 lamm hidamaawu minann kafaaynu hin Mooha amaan ila orr lek nahaanne huura male lel Mooha ishaamaass kokkila akkaden.
15 orr shakkan innu tawa kidaanne maxashannumin ishaamiyyane,
shakkan lamm qaap dikkann sohaden illo oot kristoos ishaamin.
16 orr hin ikkim antu lel masmasuntati elllu ar haayamaawu oot iyyaa upan maalla,
hoxsuntann lel Mooha lelin;
17 orr shakkan lamm innu tawa kidaan qaap dikkin kodda male ihhoxsaattann,
antu hidanalle kiyyu nafe ikkim rakkot an qari lekintu fadan oot kristoos ishaamin.
18 et koddonno,
amm rakkot hekishshamu;
maanaasse,
paahnaytisaannenno koddo shaakketannenno koddo paana heikketen kristoos lelamiyy.
semmaalla antu henmasmasin.
ittureeshanno masmasinhina.
19 maana maalla,
hin an qari paxiyy,
dinkamaaynenne qarqaarsa laaffot Yesus kristoosin por dinaatep anin antaayy henxup.
20 akkan shokkooh nafenn ikkimin lilmaatta diinninonne etin kiyyatin kinnaadu shoke toyu nafenno,
qum tureeshshatep kristoos ammannenno an ili serkisamass hadat qintenne irraxatetin qap henkidin huura male ishaamin.
21 anass kiyyashiwu kristoos;
toxtanno anass shooht kida.
22 hekoddu male etin kiyyatin kinnaado erkamaan qunda qapin erkannina;
kallaattanne toxt ila hekann ikkimin pahisanninu amm henxupamu.
23 hin lakkenn ikkaanessin rakkannin kida;
oot kristoos olle kallaattot heikk qara tawu maalla,
anta kristoos olle kallaattan fadin.
24 hekoddu male kiyyatin kinnaattaawu innass ikkaaness fadusinnin.
25 sed ishshaakan,
amaanteshinn ikkim kaanintonne inn masmasintaness ikkimin inn olle olanninu henxufnaad.
26 helpan qalleeshsh mitaatu,
inn kapi olanniyyo masmasunt inn an minin Yesus kristoos qara qaftan innass lekint.
27 hehikk qareell lel masmasunt heka Yesus kristoosess paana pahin kallaadaa,
essete etin deyu inn akku koddonno etin inn kapa sekaadonno,
inn mutsura shakkanoohanne amaantet lel masmasuntat nam shokkoohap qiman ellishane dakayan fadin.
28 akkan shokkooh nafen orr se inn shiittiya tura naha diiyyaa;
hin ishshaak Mooha kapa ikkim iyyaa patinan iyyaa daassam,
innoss lamm ikkimin dininnu innu daassam kida.
29 maana maalla,
kristoos amaanaaha kodda male ikkim iyy maalla rakkot qeeddannintanessenno dayy hin inni daassam.
30 sootant se inn an qari akkiten,
ammannenno uqqalle kinnaattawu inn dakayishshan,
inn qara paiyye.