attumat ila kallaatta
5
1 sedeeshsh qum meddaan hoxsashametep iyyaan paahnat Mooha kanni anniy koddaa.
2 qum kristoos innu hoxsaad illo kiyyatayy daayyanne laaqqaan Mooha masmasusinniyy,
dinnahunt sommi qap kod innu maalla tarpiyy dayyep innanno hoxsuntin kallaadaa.
3 oot arpalumat shoke ooshshumat shoke shooqumat miilampayya sena diinniyyu maalla hinep kikkiyy erkasa diiyyaa,
ishaamooddu naf inn raanta dakaysamattaass amm fadusinniyyamu.
4 sed kapeeshsh aypila Mooha dehayaa male,
ishaama eepum iyaan qudayta koddiy shoke shoraan nayq amm inni fadusinniyyanemu;
hinep kikkiy amm iyaan inni seniyyamu.
5 arpalayt koddonno nam erkama oshum erkanniyyu koddu shoke shooqum koddonno (oot shooqumat qum tsootsa shoomatta kodd maalla) daamum kristosenne heka Mooha qalle iyy tayma dap koddaayy ufunaadaa.
6 sed qara sohattan orr se acac Mooha qeeddatta diinniyyu qarass oot jiiayta Mooha deyinu maalla,
aynonno ishaamaan aypot koddenn inn inxeepumusinnin.
7 semmaalla orr se acac Mooha qeeddatta diinniyyu olle kinnaatta diiyyaa.
8 turann inn poorinnat ila kallaanin makess,
ammann lamm oot inn heka pold kodditen maalla,
inn attumat kida;
semmaalla orr attumatatep kallaadaa.
9 qunda attumat,
tsillumanne shaakketanne erkamaan dikk dahenn kida.
10 semmaalla iyaan pold masmasusinniy ikkim maana kodden kann fuqaa.
11 erkama poorinnat hin qunda dap attumat ilop sohashiyaa illo qarapulaa male olle kinnaatta diiyyaa.
12 maana maalla,
hin iyyaa deketi erkanniyyan ishaama nafessenno nam deesannin.
13 heikk et attumat ilop sohadane pissaddu shaakk ufunashamin.
14 hin patpahin akkaanniyy dahenn attumat kida;
semmaalla kida it;
"hed se peanniyu hayii!
iyaan raaw ila sohadu!
kristoosenno hedess attumannina."
kidant.
15 semmaalla ikkim ashshann kallaannintan itur tooyatan qallqaapadaa;
qum orr ufunat qapotep kinnaadaa male iyyaan ufunat dapep kallaatta diiyyaa.
16 lashsh henayqaatte,
sapan sed hekayn kodadaa,
iyaan dikk erkayyaa.
17 semmaalla has Mooha ikkim maana kodd qallqaapadaa male eepuma diiyyaa.
18 ukot woynetatin taarootta diiyyaa;
hin nam nayqinnine;
sekapeeshsh laaffot miilotin innaakoodaa.
19 laaletanne wosesanne daassot laaffot miilotin kodditin ollin ishaamadaa;
wosesanne laalet mutsuroonn qalle qeeddan pold aypisadaa.
20 mahh poldaaynu heka Yesus kristoosenn heikketess Mooha appaaynu lashsh min aypisadaa.
korsa inkawaanne appada daassam
21 oot inn kristoos serkinnishshan maalla,
mashshimashshayni olli acacamaa.
22 inkawa!
qum inn poldi acacamishshanep appa manayneti acacamaa;
23 qum kristoos mashsh maapar kristaana koddep appat inkot manayyetess mashsh kida.
lamm kristoos maapar kristaana se dakinshayy kodditess dinnsampayitaad.
24 semmaalla qum maapar kristaana kristoosi acacamiyyop inkawaanno appa manaddoti heikketin acacamenii.
25 appada!
qum kristoos maapar kristaana hoxsaad illo ootaaddi itarpiyy dayyep innanno inkot manayn hoxsaadaa.
26 kristoos maalla sedep kod,
maapar kristaana miilisaass kida;
iyyat miiliyenno lelaayyennenne haqin jiqaann kida.
27 paana sedenn it usaaxt shoke miina hojoorisott shoke akkan nayq qari akkaatta diinniyyu,
it miilt,
haasutta daftenne it sommati kodan porayyep dehasaass kida.
28 settep lamm qum appada ihoxsaanniyanep inkot manaddu hoxsaatta iyyaa fadusinnin;
nam inkot manayy hoxsaanniyyu iiss hoxsaannin.
29 nam dakintayy hittinniyyu amm apure hekiyyamu;
sekapeeshsh qum kristoos maapar kristaanaati erkayyep iyyanno dansinnin lushin.
30 innonno meella dakint kristooset.
31 "sed minan namat appayyenne inkotayy alldiinnina illo dakusotayy olle senina,
iyyaa lakkaddun soha shakkanooh koddinan" hekidant tsaafante.
32 ari ilas iyaan kaan dekam kida;
antu sedepanno kidiyyu oot kristoosenne oot maapar kristaanaati paahnat kodaann kida.
33 hekoddu male hin mashshmashshayness inn tooyusinnin.
semmaalla appat inkot manayy qum iyyat ihoxsaanniyyop hoxsaadu;
inkotanno appa manadd serkittu.