korsa lemaanne medda daassam
6
1 medda,
oot inn heka pold kodditen maalla lemmaann acacamaa,
hin iyaan fadusinniyaa.
2 acac hin,
"appaytenne inkotayt serkiyii" kidiyyu,
acac turaqatta iyy lel irraxatet uqqalle kiyyu kida.
3 et sed erkatto,
"heikk hedess seninan;
are husslah qarassenno par lekess kallaanninta."
4 innanno lemma,
korsaanne halitt pold kollisan kammiyaa male meddaan miirasa diiyyaa.
aylammaanne poldalla
5 inn aylamma,
orr se poldalla inni kodd serkisaanne huuran iacacamaa;
afa kristoosi erkannishanep mutsuraan dikkin iyyaa acacamaa.
6 inn acacamintan,
qum erkamampayya kristoos hin has Mooha mutsurallell kaysinniyatep male amm nam masmasusisaas shoke inxakkaattaasemu.
7 nam kodda male afa pold se moontalle kiyyu erkannishanep has dikkin erkayaa.
8 aylet koddo pold koddonno namat mashamashayyess erkamooyy hin dikkass pold se moontalle kiyyu kapa ikkim heriyayy qeeddanninu heufutan.
9 innanno poldalla,
moontalle pold miint tooya diinniyyu innassenno iyyaassenno kinnaattaayy immashshxoorsattan miishsha male iyaan dikk aylammaanni erkayaa.
mehadda adant
10 hin hatess poldanne irroshayy se kaantin iyyaan kokkaanniy koddaa;
11 ikkim shonkum taapiloos shiitta fottintanes mehadda adant heka Mooha dahenn uuwadaa.
12 maana maalla,
adanshinnu nam olle kodda male,
peashisampayya sapan poorinnat sedetenne hayyotanne irrampayya husslah,
sedep kidaanno adampayya laaffot oshshittet se moontalle kishshu olle kida.
13 semmaalla lashsh se nayqate ikkim irrot olishsh mini ella fottintanessenne heikk kaysisan qima ella fottintaness mehadda adant heka Mooha dahenn qeeddadaa.
14 sedeeshsh shaakket qum sinnaaratep surrayn qalli hidattan,
tsillot qum silf ippatin dekaatep uuwattan,
15 lel masmasunt heka andot lukkoonn keli qum hopaatep kodattan dikkisattan ellaa.
16 hin dahenn qari padawan koopila amaantet hin inn qastet taapiloos se apittap haalawishshu dahennin liqisa fottintan qapadaa.
17 kullet dinaatenno iqari haayadaa;
pillaw laaffotatenno qapadaa;
iyanno lel Moohaat.
18 lashsh min sinkum laaffot miilotatin dinkamanne fadet Mooha dehayyaa.
paana sedenn qimiyaa miilampayyaass Mooha dinkamaa.
19 helpaan antu ishaamiyyo hin dekam heka lel masmasunt huura male patapahisan ishaamass lel fadusinniyyu ikkim ani daassaminu Mooha ani dinkamaa.
20 ammann antu erkamampayt sansalan hidam kodd,
lel masmasunt sed maalla kida;
semmaalla qum it an qara fadamishshu mitti ikkimin huura male ishaaminu Mooha ani dinkamaa.
paanussa muutayta
21 tikiqos kafittaaynonne erkamampayt amaanam heka pold heka Yesus hin hoxsasham iyaan antu qalle kiyyonne ikkimin maana kodiyu dahenn inni lelina.
22 semmaalla ikkim iyaan innu qalle kinnu ufunaannintanenne inn kokkisaassin iyy inn kapop hit.
23 Mooha appa kapanne poldaaynu Yesus kristoos kapa andotanne hoxsunt amaantet olle kafaaynu kodditu.
24 hoxsunt orkanna mitama diinnishun iyyaan poldaaynu Yesus kristoos hoxsaanniyy dahenness has dikk heka Mooha iyyaa olle kinnaadu.