shokkohumat kristoosenn
4
1 semmaalla an se pold erkasa minan hidam,
oot Moohot inn hemb maalla,
hembanta se inn ihembanteness ikkim kiyyat senishshun kallaannintanessin inn dinkamannin.
2 shokkushokkotayne hoxsuntin olli duupattan helpa min dippatumanne etantumanne orrfottan kallaadaa.
3 andotin orqapattan shokkohum se laaffot Mooha daannishshu lushaa kokkaadaa.
4 helpaan inn hembantene qum inn irraxatet shakkaah hembantenep dakint shakkaahanne laaffot shakkaah kiyy.
5 settep lamm pold shokkooh,
amaantet shakkaahanne ahalila shakkannooh kiyy.
6 lamm iyy dahenn qareell kiyyu,
dahenn erkanniyyu,
dahenn ila kallaanniyyu,
iyy dahenn qarin appa kodd,
Mooha shokkooh kiyy.
7 hekoddu male paana se kristoos daatta quur qarass shokkushokkotayno daayy dikkumooyyi innoss hedaassam.
8 sedenno,
qum se it,
"helpaan iyyat erreel fayyade iyyaan lek pooj illo inxaan;
orrassenno daayyada dayy."
kidantep kida.
9 kat lel hin,
"erreel fayyad" kidiyyu maana kida?
husslah sed qalle didim kelopa lekatta pateeshsh hepil maana akkinnin?
10 hin "lahaat lekkad" lamm se moontanne huss dahenn innaakisa moont qareell errop fayyad kida.
11 iyyanno shakkan orr hitaym,
shakkan himampayya,
shakkan lel masmasunt lelampayya,
shakkan orr se amaaniyoss shinkayya,
shakkan kollisampayya ikkim koddinaness daayyada iddayy.
12 iyyat maalla sedep kod,
maapar kristaana hin dakint kristoos kodd,
ikkim qiminan kaaninan,
miilampayya,
erkama kristaanumati dikkisaass kida.
13 settep lamm shokkohum se meet Mooha ufunaattan amaantetin akkaanniyyu qarin paxan,
qum kristoos iyy akkan shokkooh naf qara kellawa diiy koddep ikkimin innonno iyyaan akkanat innu qara kellawa diiy koddinnoss kida.
14 sedeeshsh ururum orratenne nam paasaaddu minann,
kota kollila hin patin nam dapusisa dikkisamin amm meddaan henkelsiyap koddinhinnamu.
15 sekapeeshsh shaakket hoxsuntin ishaaman por kristoos se mashsh koddetep heikketin kamminaa.
16 meella dakint hin hawhawi kiyy kristoosenn orqapaden;
dakintanno dahenn ripaann orqapatt;
semmaalla meella dakint mashshamashshaddoss erkamaan iddaassam erkasaan dakint dahinn kammin;
hoxsuntannenno qimin.
kallat awshitteti kristoosin akkaannishshu
17 sedeeshsh qum orr se Mooha amaana diinniyyu qaapaddun aypot koddetep kallaatta diiyyaa!
ittooyadaa henkidin mahh poldatin inni lelin.
18 iyyaa qara qaapaaddu hepoorinnaw;
ufunaatta diittaaddonne mutsuraaddu iiji kodattaaddu minann kiyyat se Moohot daanniyyu ketta hereehaden.
19 oot qaapaaddu qalle deesot patt maalla,
iyaan nam deesanniy dahenn erkasaass hadat sohaaddoti all itarpiyyen dayyen.
20 inn lamm oot kristoos,
amm sedep kollitenemu.
21 ootaayy shaakketass hedakayten;
oot inn hekaayy kodditen maalla,
sheeht shaakket se iyyin kishshu hekkolliten.
22 semmaalla qaap kerdayt se hadat nam sossopan juppot ilop kalinnishshun nayqaad,
inn turin qalle kallaatten allpatiyaa.
23 qaapaayinenne mutsuraannanno awshumenii.
24 nam awshitt se tsillumanne miiluma shaakketatin paahnat moohaatin uumam uuwadaa.
25 semmaalla eerpa ishaama diiyyaa;
oot innu meella dakint shakkaah koddin maalla shaakket olli ishaaminaa.
26 orrijiixiyaa!
hor,
jiixaytaynin juppoot erkasa diiyyaa;
jiixaytaayn alliddiitta male lashsh inn qarass inpei.
27 filta ullin luuma taapilosi daatta diiyyaa.
28 nam turin hashiyu sed kanneeshsh hasha diiyyu;
sekapeeshsh kodashshet iyyat orr rakkanniyyu daanninu qafnatta harkooyyin erkamaan dikk erkayyu.
29 kapaayn qalle lel nayq sohatta diiyyu;
hekoddu male orr dakayiyyu masmasusisaassenne lel kokkila koddinu namassenno fadusinniyyu ishaamaa.
30 laaffot Mooha se miilt,
lashsh qaxamaati maatam inn qari attamant dappusisa diiyyaa.
31 olli haddawaanne miiranne jiixaytaane oriqari sohattanne otittanne nayqunt piletenno dahenn inn ketta allsekaattu.
32 sed kapeeshsh iyyaan diddikkanne orryeyiyanne olli mutsuroonniy koddaa;
qum Moohot kristoosin jupposhayn all inni diiyyep innanno allhattu olli kikkidaa.