por toxtateeshsh por kiyyatatep tarpa
2
1 inn nayqunshaynenne jupposhayn minan iyyaan raaw makess.
2 essete kallat husslah it se nayqat kallaatten.
settep lamm iyy se hayyotaddaan hayya qara kiyy peashshinniyoss acacamin.
settenno laaffot oshshittet se ammann orr se Mooha acacama diinniyyu qari erkannishshu kida.
3 innonno dahenn sed tureeshsh otanshaddu ila iyyaan has sohoonnotenne qaap mashshaynu kanni antan hadat sohaatin kallaanniy;
qum orr shokkotepanno uumaynun iyyaan miir Mooha kela kiyy kida.
4 hekoddu male oot lekusa mutsurootta Moohaatenne hoxsunt iyyat innu qaponno it kaant koddit maalla,
5 innu iyyaan jupposhaynun raawes kristoos kapin kiyyat day;
innanno dinatten,
dikkumaayyan kida.
6 Moohot Yesus kristoos olle toxt ila innu sohashshiyy illo erra moontalli iyy olle innu laxashshiyy.
7 iyyat sedep kod,
dikkumaayy hin iyyat Yesus kristoosin innu akkiyenne shorokum daayyaayy se heikk qara tawu sapan se deyyiyo innu akkisaass kida.
8 Moohot dikkumaayyann amaantetin inn diniyy.
sedenno daayy moohaatenn male amm erkamoonnannemu.
9 namat erkamooyyann infoojiness dinot amm erkamaannemu.
10 innu uuma Mooha,
iyyaan erkamaan dikk hin Moohot turaqatta ulli dikkiyy erkasa Yesus kristoos kapin uumam kida.
shokkohum kristoos kapin akkaanniyyu
11 semmaalla inn iyyaan tureeshsh dalashoshaynin ayhuta kodda diiyy,
orr se harka namatin karrasamin iyyaan karrasama diiy kidamiy koddaayyin qaapadaa.
12 essete inn iyyaan siip israaelet kodda diiy,
kaka lel irraxatetati keessumma kodd,
husslah qari irraxatet dap,
kristoos ketta reehhad,
Mooha male kallaanniy koddaayn immashshi oorsadaa.
13 ammann lamm inn iyyaan tureeshhsh allsekaad Yesus kristoos olle kinnaatten,
diikaayyin dehaatten.
14 kristoos andoshaynu.
iyy hana jiiayta hin innu reehiy allpaqiy,
orr ayhutaatenne siip se ayhuta kodda diiy shakkanoohi kod.
15 iyyat siip se lakk ila siip awshitt iyy olle kinnaanninu uumaass acacanne tampet halitt sohooyyin allhattiyy illo andoti kod.
16 masqalet qari toyaann olishum allhattiy;
lakkaddun dakint shakkaah kodan Mooha olle araars.
17 illo dey inn hin all sekaadessenno orr ayhuta hin dehassenno andot lel masmasunt torr.
18 iyy kapannin innu dahenn sinkum laaffot shakkaahatin Mooha appa kapop dehatta fottinna.
19 semmaalla inn miilampayya olle orr huss shokkoohatenne orr man Moohaat male sedeeshsh amm inn kessummaanne patayyaamu.
20 inn sheeht orr hitaymatenne hekat himampayya qarass dihanten;
daka sheeht settetenno Yesus kristoos kida.
21 manat dahenn iyyann ollinqapaman man miilot heka pold kodda kammin;
22 innanno lamm man Moohot laaffotayyin ulli kallaanniyyu koddaass ollin soorumamintan.