hitaym bawloos
orr efesoonetess
1
1 bawloos se has moohaatin nam hitaym heka Yesus kristoos kodd kapa,
miilampayyaan Yesus kristoosin kiyy,
amaanam,
sapara efesoon qalle kiyyass hitaymaan hitam,
2 Mooha appaaynonne Yesus kristoos pold kapa has dikkanne andot inni koddenii.
qoran kristoosin akkaanniyyu
3 se qoran laaffot se moontalle kiyyu dahennin kristoos kapin innu qor,
Mooha,
appa poldaaynu heka Yesus kristoos aypisamu.
4 iyyat ikkimin miilampayyaanne iyyaan haasutta dap koddan iyy turi akkaaninnoss husslah uumama turin kristoos kapin innu pahisad.
5 Moohot dikkumooyann Yesus kristoos kapin ikkimin meddooyy koddinu turaqattiy hoxsuntayyin ulliquur.
6 iyyat maalla sedep kod,
serka daayy se iyyat meetaayy se hoxsashamin patt innu dayy ikkim aypisaminaness kida.
7 Moohot dikkumooyy hin lek qara sohattaann diik meetaayyetin innu qay,
innu diissama jupposhaynu akkann.
8 dikkumaayyanno qall ishaakaanne ufunat dahennen lekiyy innu tiiq.
9 Moohot qaapaayy se dikk iyyat turaqatta kristoos kapin erkasa qaapaden,
hasaayy se dekam ikkimin ufunnaanninnu kod.
10 qaap moohaatenno et hooraan paxane uuma se moontallenne hussalle kiyyu dahenn orqudop qapan hayyotum kristoos keli kodaass kida.
11 Mooha hin akkan dahenn ikkim hasayyin koddinan kodiyyu,
qum se iyyat turaqatta innu qaapad mittass,
ikkimin kafaayy koddinnoss kristoosin innu pahisad.
12 sedenno,
innu hin turaqatta kristoos irraxatet kodann ikkimin serka Mooha aypisanninos kida.
13 innanno lamm helpaan inn lel shakket heka masmasunt se heka dinaayn kodd dakaytene kristoos hexamaanten illo laaffot miilot se Moohot irraxateti inni dayyen maatamat inn qari kodam.
14 laaffot sedenno,
serkooyyi aypila koddaas haka Moohot hin hekooyy kodd qayinoss,
taymaan innu qeeddanninnoss qaptet kida.
dinkam bawloos orr efesoness
15 semmaalla ananno inn Yesus pold amaanaaynenne hoxsunt se inn miilampayya dahenn qaftanin dakay illo
16 helpaan antu Mooha dinkamanniyyo immashshi inn oorisattan inn minin aypila iyyi dehasa amm all hendiyyemu.
17 appa serka,
Mooha poldaaynu heka Yesus kristoos ikkim sed qareell ufunaannintaness laaffot qallishaakaatenne hekat raaet ikkim inn daanninossin Mooha inni dinkamin.
18 settep lamm irraxatet ashshann kishshoss ikkim hembantenenne tayma hin serka kodd miilampayya tayinan iyaan ashshann kaan kodaaddu ikkim ufunaannintaness inda mutsuraann ikkim inni qahisaminanessin Mooha dinkamin.
19 irroshiyy hin heikk qara tawtu innu hin amaaniyyassenno it ashshann kaant koddaadd ikkim ufunaannintanessin Mooha inni dinkamin.
irroshayy se kaant sedenno iyyat erkaman akkiyy,
20 kristoos se iyyat toxt ila sohashshiyy moontalle miskittaayy qari laxashshiyyenn kida.
21 iyyat laxashshiyyenno peashilaanne hayyotum,
irrotanne poldum dahenn qareell,
settep lamm husslah qarasseeh kodda male huss deyiyyu qallessenno mahh serka iyy mahhada dahenn qarreell kiyyu iddaattaann kida.
22 Moohot akkan heikket ikkim hayyotumaayy kannaat peashinninu ikkod;
maapar kristaanatessenno heikk qareell mashshi kod.
23 maapar kristaana dakint kristoossenne kristoos se heikk dahenn innaakiyyossenno innaakoshayy kida.