medda Mooha koddaaynu
4
1 amman antu sedepin kidin,
taymampayt meumiyyo mehadda dahenn hekkooyy koddan nafenno amm aylet kendaashsh hawwi hekiyyamu.
2 hekoddu male hak horaan appaayy qap painaness amfaattawaanne orr se iyy kamminniyy kannaatt kiyy.
3 settep lamm helpaan innu laaffot moohaati meuminkinno tampet husslahati piddamaannin aylet koddin makess;
4 hekoddu male helpaan Moohot qap kaysaadene Moohot meetaayy se iskattet qara dalad halitt kannaatt kiyyu innu hit.
5 iyyat sed erkay,
iyyaan halitt kannaat kiyy qayaassenne innonno ikkimin medda Mooha koddinu kodaass kida.
6 oot innu meddaayy koddin maalla,
Moohot laaffot meetaayy se,
"aappu,
appoyy" kidishshu Mooha hembishshu mutsuraannu qallep hit.
7 semmaalla sed kannaashsh att meet male amm ayletemu;
et meet koddito lamm att taymampayt Moohaat kida.
bawloos orr kalaatiyaatess baaqqur
8 se tureeshsh Mooha ufunaatta diittaayn minann iyyaan Mooha kodda diiyyess aylet koddan piddanten;
9 ammann lamm Mooha ufunaatten;
seqareell lamm Moohot inn hexup;
kat illo ashshannass por tampawwa tashampayyaanne awta dap kapop mitaatten?
ashshannass lakkiyya ayleshaddu kodda fadin?
10 lashsh ila,
leha ila,
sapanadda ila,
parada ilanno reehaan dikkinnin serkinnin.
11 otanshayn ili erkaman payyahaawu aypot koddinamu henkidin huurin.
12 kafoot!
antu inn paahnaadep innanno an pahannaadaa henkidin inn dinkamannin;
amm inn an qar hekaltenemu.
13 antu hiraym qara lel masmasunt inni lel baaq ila kinnaattaawu minin koddaayy heufutan.
14 baaqaawu ekkawusamaap inni koddu nafenno amm an hettuffatten shoke heohiyyattenemu;
laaddu afa hitaymiyya Mooha qeeddannishshanep an qeeddatten;
settep lamm afa Yesus kristoos qeeddannishshanep an qeeddatten.
15 masmsunt inn sed tureeshsh qaftan ahap ant?
et inn fottamishsh kida ikkim indoonn naf qeeddaxaten ani daannaxateness henxup.
16 kat illo oot antu shaakket inni lel maallan olishsh inni koddemu?
17 orr shakkan ikkaaness inn fadin,
hekoddu male iyyaa inn fadiyyan amm dikkuntassemu;
qaapaaddu ikkim inn innu ketta reehamintan illo qaapaaddop kiyyu qafnannintaness kida.
18 hekoddu male helpaan antu inn olle kiyyooh kodda male iyyaan helpamitt akkan heikketin qimiyy et kodditan kid hedikk.
19 meddoot!
hak kristoos inn ila akkaanninoss amannenno ootaayness laashaminkiyy.
20 maana maalla,
iyaan antu inni koddinu dapaann henrakkad,
etin ammann otanshayn ila kinnaad illo paana pilin inni ishaama kid,
ashshann ani dikkannaat.
paahnat akkaarenne hekat saara
21 inn iyyaan halitt kannaat kallaatta fadiyy,
intu ani lelaa;
hin halitt leliyyu dakayshshanemu?
22 matsaafadda miilot qalless,
"aprihaam medda lakk qap;
shokku aylet qara dalad,
shokku lamm inkot man it shadd kaltu qara dalad" hekidant tsaafant.
23 hekoddu male meet ayleti kollinnat sohaatenn dalad,
meet heka it se shadd kaltu lamm lel irraxatet se Moohot idayyenn dalad.
24 sedenno paahnat kida;
iskatt hin lakk paahnat kaka lakket kida;
shokkiyyot akkaar se utet siinaate deit;
itanno se aylumi medda haayishshu kida.
25 akkaaret utet siina se huss arrap qalle kishshoss paahnat kida;
semmaalla yerusaalem ammanet paahnaannin;
it meddoodd olle hak ammannet aylum ila kishsh.
26 yerusaalem hin erra kishshu lamm it shadd kaltu kida;
it innu dahenness inkot.
27 matsaafa qarass,
"hed se medda haaya diinnishshu qofolishshet masmasii!
hed se haayin laashama ufunaatta diitt ililii;
iskattet se irishsh qaftu qara tawos meddaa leki qafta"
hekidant tsaafant.
28 kafoot!
innanno qum isaaqep medda irraxatetat kida.
29 lamm qum essete hin sohan dalad se irrot laaffot moohaatin dalad kann ariyyep awenno settep kida.
30 hekoddu male matsaafa miilot maana kidin?
"oot meet ayleti meet it se shadd kaltu olle taya diinninu maalla,
aylet sett meetadd olle alli ariyii!"
hekidin.
31 semmaalla kafoot,
innu medda it se shadd kaltot male amm heka ayletatemu.