kristoos amaanan tsilla
3
1 inn orr kalaatiyaa,
iyyaan qall qaapatta diinniyy!
Yesus kristoos masqalet qari rahhamaayy patpahisam inni lelampa;
ikkim inn shaakketass inxacacamin aynu inn tur ship?
2 akkan shokkoohin inn kapa dakaya fadin;
inn laaffot miilot qeeddatten halitt kaysisaanemu?
shoke lel masmasunt dakaya illo amaanaanne?
3 kat inn orr qall qaapatta diinniyyomu?
laaffot moohaatenn hiratten illo qaap sohaatin kaysinnimu?
4 rakkot inn lel masmasunt minin qeeddatten dahenn aypot koddit hattemu?
et sedep koddo shaakketass aypot koddit kida.
5 Moohot laaffotayy inni daanniyyu shammot otanshayn ili erkanniyyu oot inn halitt kaysittenessemu shoke oot inn lel masmasunt dakayten illo amaantenesse?
6 lel se "aprihaaam Mooha amaan illo amaanteshiyy tsilluma idihant."
kidiyyu qaapadaa.
7 semmaalla orr amaaniyyu medda aprihaam koddaaddu ufunaadaa.
8 matsaafot,
ikkim Moohot siip amaantetin tsillampayya kodinu turiqatta akk illo,
"siipat dahenn hed kapann qoraminan."
kid lel masmasunt turaqatta aprihaami lel.
9 semmaalla orr amaan dahenn aprihaam se amaan olle qoraminan.
10 "nam acacaddaan matsaafa halitt qara kiyy dahennin qima kallaata diinniyyonne erkasa diinniyyu dahenn iyy pisham."
oot it kidant tsaafant maalla,
"orr halitt kaysisaannin tsillinna."
kidiyyu dahenn iyyaan pisham kida.
11 lamm oot it,
"tsillampayt amaantetann kallaannina."
kidant tsaafant maalla,
halitt kaysisan aynonno ikkim Mooha turi tsillampayt kodda diinninoss patpahit.
12 halitt amm amaantet qarass ellemu;
sekapeeshsh,
"nam acacada halitt kayisinniyyu iyy halittin kallaannin."
hekidant tsaafant.
13 "nam qoyr qari rahham toyiyu iyy pisham" oot it kidant tsaafant maalla,
kristoos innu maalla nam pisham kodd,
pishaym halitt kela innu passiyy.
14 hin kodden,
qorana hin Moohot aprihaam dayy Yesus kristoos kapin ikkim orr ayhuta kodda diiyi painossenne ikkimin innonno laaffot miilot se Moohot "innassin daannina."
kid amaantetin qeeddanninnoss kida.
halittanne lel irraxatetat
15 kafoot!
kollinnat nam paahnati inni dehayyonu.
nam lakk et ollisenane amm nam pil all oohiyy shoke qari padawiyyamu.
16 aprihaamenne hottaayyessenno Moohot lel irraxatet helel.
matsaafot amm afa orr lek leliyyop hottadaattassenno kidiyyamu;
sekapeeshsh afa nam shokkoohi leliyyop hottaaytessenno hekidin;
hin hottaayt kidam kristoos kida.
17 antu sedepin kidin;
halitt hin par tseet afurenn hund halpatt kanna daassam,
amm kakaan Moohot turaqatta kal all oohan lel irraxateshayyi allpaqinninamu.
18 tayma halittann koddiyyan kid,
lel irraxatet se Moohot dayyin koddaaddu allhataayy;
hekoddu male Moohot lel irraxateshayyetenn tayma aprihaami day.
19 kat halitt maanaass daassam?
halitt padawam,
hak hotta aprihaam hin irraxatet iddaassant deynoss erkama nayq ikkim maana kodden akkisaas kida;
halitt hin erkama qara nakay,
hitaymiyya kapin nam otantalle kiyyu harki daassamaann kida.
20 nam otant ila kinnaannin araarsiyyu kaf lakkess male amm kaf shokkoohassemu;
hekoddu male Moohot shokkooh.
halitt maanaass daassam
21 illo kat halitt lel irraxatet se Moohot dayy qari hittinnimu?
erraytu!
halitt iyy kiyyat uxila akkaannishshu koddaass daassam kid,
halitt kapann tsillumat akkaannaay.
22 hekoddu male,
matsaafa miilot,
husslah dahenn juppotann piddam hidam hekidin.
hin kodden,
irraxatet yesuus kristoos amaanan akkaannishshu,
ikkim orr amaaniyyu dahenness daassamintoss kida.
23 amaantet deya turann hidana halitt kelan kinn makess;
hak amaantet hin patpahintossenno luushayt halitt kelan kinnaann.
24 paana sedenn ikkimin amaantetin tsillinnoss haka kristoos deyinu halitt amfaattoshaynu kodd.
25 ammann lamm oot amaantet deit maalla,
amfaan halitt kela kinnaattaannu hehat.
26 Yesus kristoos amaanaan dahetaynenn medda Moohaat kodditen.
27 inn iyyaan ahalisaman kristoos olle shakkanaah kodd dahenn kristoos heuuwatten.
28 oot inn dahetaynen kristoosin shakkanaah kodditen maalla,
ayhutishsh shoke kirikishsh,
aylet shoke pold,
diirt shoke iskatt kidan reehaytet amm hekishshamu;
29 semmaalla inn heka kristoos kodditene lamm hotta aprihaam kodditen;
lel irraxateshayyetenn inn taymampaya kida.