bawloosenne orr hitaym shakkan
2
1 par hundann afur kanna lakkiyaassin parnapaas olle yerusaalemep mitaat,
tiitonnenno iolle annad.
2 antu aan,
qum Moohot ani akkiyy mittass kida.
hin antu tureeshsh erkayyenno koddu hin antu ammann erkanniyyonno aypot kodda allhata tura lel masmasunt se antu orr ayhuta kodda diiyi leliyyu sinkiyyaasseehin hawwi ufunaytiyy.
3 tiitu se an olle kiyyu kirikkishsh nafenno ikkim karrasaminu amm iyyi hekoomenemu.
4 hekoddu male eerpampayyaan deketin otanshaynu ilop kal karatiddu ikkim tiitu karrasaminoss faden;
orr hin maalla otanshaynu ilop deketin kalen,
shayy kallaatta se innu Yesus kristoos kapa qafnu aysa illo aylamma innu kodaass kida.
5 innu lamm shaakket lel masmasunt ikkim inn ili qiminu kallaanninoss helpa qojess nafe amm iyyaass owwo henkidinemu.
6 orr hin sinkiyya pahanaanniyy akkaanniyy lamm,
oot Moohot iyy miint tooyan nam qari qatta diinniyyu kodd maalla,
kinnashiddu pahaytet amm an rakkusinnishshamu;
orr hin sinkiyyaa kidamiyy lel masmasunt se antu leliyyu qarass amm akkan awshitt iyyaa padawen hekiyyamu.
7 laaddu qum Moohot ikkim betsiroos lel masmasunt orr ayhutaat lelinu hitep,
ikkimin ananno orr ayhuta kodda diiyi lel masmasunt lelinu hitaayy ishshaaken.
8 semmaalla Mooha hin,
ikkim betsiroos orr ayhutaat nam hitaym koddinu erkanninu kod,
ikkimin ananno orr ayhuta kodda diiyess nam hitaym koddinu erkanninu kod.
9 sinkiyyaan qapayyaap kinnaannin akkaanniyy kerra yayqoopenne betsiroosenne yewannis Moohot daayy erkamaan haw kiyy ani daattaayy helpaan iyyaa ishshaakene innu olle kinnaattaaddu ufunaytisaass harkaaddu ananne parnapaasi qapen;
innu orr ayhuta kodda diiy kapop antaass,
iyyaa lamm orr ayhuta kapop anta senen.
10 iyyaanno,
ikkimin hiyayyaan otanshaddu ila kiyy qaapanninosseeh innu qari haayaden;
hin lamm iyaan antu kokkaanniyyu erkanniyyu kida.
bawloos antsokiyaas betsiroos shiitt
11 helpaan betsiroos antsokiyaap deye oot iyyat patin dap maalla ilinhaashin shiitt.
12 orr karaddu iyyaan yayqoop hit antsokiyaap deyaaddu tureeshsh iyyat otant orr ayhuta kodda diiy ila hin amaan olle dammin kida;
iyyaa deyen kanna lamm,
"otant orr se ayhuta kodda diiy ila iyyaan amaan karrasama iyyaa fadusinnin" orr se kidiyyu huuraan ikannaash mitaat orr ayhuta kodda diiy kenda reehad.
13 orr ayhuta ila kristaana karatiddu huurra betsiroos kannass mitaaten;
parinapaas nafenno huura hir.
14 erkamaaddu shaakket lel masmasunt olle anta diittaaddu helpaan antu akke betsiroosessin,
"att nam ayhuta kodditete kallat ayhutaatin kodda male et kallat orr se ayhuta kodda diiyetin kallaannishshu koddo,
iyyaan ayhuta kodda diiy ikkim halitt ayhutaatin kallaanninani maanaass ikkoomin?"
henkid illo iyyaa dahenn ilaashsh iyy tush.
ayhutaanno siip pilanno amaantetanneeh dininan
15 innu dalashotaynonn ayhuta male,
amm juppampayaan Mooha male ullaash kallaaniyyapin kinnamu;
16 hekoddu male namat tsillampayt koddiyyu Yesus kristoos amaanaan male halitt lushattan ikkim kodda diitt henxufn;
innonno halitt lushattan kodda male kristoos amaanan ikkimin tsillampayya koddinnossin Yesus kristoos amaann;
nam soha uuwwad dahenn erkama halitt lushattan amm tsillampayt kodda fottiyyamu.
17 etin innu kristoos kapin tsillampayya kodda fadinu illo lamm mashshaynu juppampayya koddino,
settekul kristoos juppot innu erkusinnin kidaamu?
erraytu!
18 halitt se antu all paqiyy etin mitaattinniyyu erkanniyyu koddo antu mashshawoss iyy halitt se qar tarpiyyu koddaawun ufunaytinnin kida.
19 antu Mooha kallaattaasin kid halitt kapin afan toxtin reehadep kodd makess.
20 oot antu afan kristoos olle rahhamep itooyiyyu maalla,
sed kanneeshsh kristoos an ila kallaannin male amm an iissin kallaannimu;
ammannenno antu sohaawun kallaanniyyu kiyyat se meet Mooha se an hoxsaadenne ootaawu ittarpiyy dayy amaanan akkaattenn kida.
21 dikkuma Mooha amm aypoti allkashinhinamu;
et namat halitt lushattan tsilliyyu koddo kristoos aypotass toy kidapa.