hitaym bawloos
orr kalaatiyaatess
1
1 an bawloos se orrann shoke nam shokkun kodda male Yesus kristoosenne Mooha appa se toxt ila iyy sohashiyyin nam hitaym koddenne,
2 kafaawu hin an olle kiyy daahen kapa maaparadda kristaana hin huss kalaatiya qalle kiyy hitaymaan hitam.
3 appaaynu Mooha kapanne poldaaynu Yesus kristoos kapa has dikkanne andot inni koddenii.
4 sapan sed nayq kela innu dinisaass kristoos has moohaaynotenne heka appaynotin jupposhaynu maalla ittarpiyy dayy.
5 parparaashsh hak parparati serka Mooha koddenii.
ameen.
lel masmasunt shokkooh
6 Mooha se dikkuma kristoosin inn hemb raanta reehattan lel haw kiyyu ilop sedep shakar kida kallaann an shamusinnin.
7 antu sedep kidiyyu,
orr inn shurshurinniyyanne lel masmasunt heka kristoos kellisa fadiyy oot iyyaa kiyyan maalla male,
lel masmasunt shokkooh.
8 hekoddu male innonno koddinu shoke hitaymishsh moontallettenno koddo lel masmasunt se innu inni lell pateeshsh et hepil inn leliyyu koddo iyy pisham koddu!
9 qum antu setureeshsh lelep qarinxoorin,
lel masmasunt se inn qeeddatten pateeshsh nam hepila inn leliyyu iyy pisham koddu!
kidin.
10 kat antu fadiyyu ikkim namat an aypisanninossemu?
shoke ikkim Moohot an aypisanninosse?
shoke afan nam masmasusisa fadiyyopin inni kinnaannimu?
nam masmasusisan fadiyy kid amm aylet kristoos koddanhaayemu.
bawloos nam hitaym koddaass hembam
11 kafoot,
lel masmasunt hin antu inni lel iyy nam kapa kodda diiy koddaayy ikkim ufunaannintanessin fadin.
12 Yesus kristoos lel masmasunt sed ani akkiyy male amm nam shokkooh naf qara henqeeddademu;
shoke amm nam shokkooh naf an hekolliyyemu.
13 turann helpaan antu amaantet ayhuta kanni anniyyo ikkim antu ashshann kallaad hedakayten;
ikaanessin maapar kristaana heka Mooha kann arisan all patisa hanhamin makess.
14 amaantet ayhuta lushattaannenno kafaawu orr ayhuta iyyaan lek sapanaawo kiyy qara hentaw.
oot tampet appadaannotessenno ikkaanessin dooh.
15 hekoddu male antu dalatta turann Moohot an pahisad;
dikkumooyyannenno an hemb.
16 oot meetaayyet ikkimin lel masmasunt orr ayhuta kodda diiyi lelinu helpaan Moohot meetaayy ani akkisa hoxsaade amm nam shokkooh naf olle henmariyyademu;
17 iyyaan an tureeshsh orr hitaym kodd kapop yerusaalemep amm henxaanemu;
hekoddu male huss araapaatepin aan;
ukkanna tamasqopin mitaat.
18 par halpatt kanna lamm betsiroos se kefa kidamiyyu akkaassin yerusaalemep aan illo lashsh hundann hen iyy olle ulli olad.
19 hekoddu male yayqoop inshar pold pateeshsh orr hitaym ila amm nam shokkooh naf henxakkemu.
20 hin antu inni tsaafiyyu Mooha turi eerpa kodda diittaaddun inni ufunaytinnin.
21 sekanna sooriyaanne kilqiyaapin aan.
22 maaparadda kristaana hin huss yihuta qalle kiyy amm miintawu hexakken upanemu.
23 hor ishaamaan,
"iyy se tureeshsh innu kann arinniyyu amaantet se iyyat all patisa fadiyyu ammann ishaamin."
kidiyyaah dakayen;
24 illo ootaawossenno Mooha aypisannin kida.