raaet poldat bawloos akkiyy
12
1 fooja ila akkan akkaanniyyu et teeku nafenno fooja et an fadusinnishsho raaet poldat ani dayyenne ani akkiyennin foojina.
2 nam shokkua iyy heka kristoos koddin up;
nam hin par hundan afur tureeshsh moont halpattiyaallep qeeddam;
(iyyat qeeddam,
sohan koddu kodda diiyyo amm henxupamu;
Mooha up.)
3 hekoddu male nam hin qeeddamaayy henxup,
hor sohan koddu kodda diiyyo amm henxupamu,
Mooha up;
4 iyyat kennetep qeeddam,
iyaan kap nam qalle sohatta diinnaayenne namat lela fotta diinnaay dakay.
5 nam sedep kiyyonn foojinhina;
oot hekaawotess lamm tashshotawu pateeshsh amm akkan shokkooh nafin foojinhinamu.
6 etin fooja fadu nefenno oot antu shaakket ishaamiyyu maalla amm eepayt kidaminhinamu.
hekoddu male hin namat an qara akkiyonne an qara dakayiyyu qareell tawunisan an badda turan kidin fooja diinnin.
7 hin lek nam shammusinniy antu akk minann ikkim antu infoojiness,
akkan quddetap an madinu,
iyyanno hitaymishsh seetsan iyy an miidinu ani dassam.
8 hin ikkim an ketta reehanninoss halpattannin pold dinkamad.
9 iyyanno,
"dikkumaawu hed kayin;
maana maalla,
tashshoshayt ilass irroshiyyu ikkaantess akkaannint."
he ani kid.
semmaalla irrot kristoos ikkim an ila kiyannintoss masmasunt lekitennin tashshoshawun fooja hoxsaannin.
10 oot helpaan antu tashshe irrot akkanniyyu maalla,
antu kristoos minan tashshiyyo,
otamiyyo,
rakkanniyyo,
op an il koyanniyyane,
antu baaquriyyo masmasinkiyy.
qaap bawloos orr qorontooseti qapu
11 foojaawonn eepaytin kodd;
iyyaan sed qarin anin pai inn kida;
iyyaan an aypisannaay inn makess.
etin akkan shokkop dihama diiy naf kid,
"orr hitaym hin iyyaan kakkaan" kidamiy kannaatt amm henkiyamu.
12 hin nam hitaym koddaawu akkinniy,
iyaan antu inn kapa kiyyo duupatta kaanin erkayy kida.
iyaanno ishshaakanne shammotanne yeeshutta kida.
13 inn qari haisot kodda diittaawu pateeshsh,
maanannin maaparadda kristaana shakkan kanneett inn kinnaytiyy?
hin lamm et nayqunt ani koddo all ani diiyyaa.
14 toare,
antu inn kapop deya dikkisanniyu hin halpattiyaawu kida;
etin inn kapop deyo amm haisot inn qari koddinhinamu.
antu fadiyyu inn male amm kodasheshaynemu.
lemma meddaass kodashshet orqudop qapin male amm medda lemmaass orqudop qapimu.
15 ootaayness lamm kodashetawooh kodda male issenno tarpisa daattaass masmasinkiy.
antu sedep ikkaani inn hoxsanniyyo,
inn lamm sedep iqojesseeh an hoxsaannimu?
16 hekoddu male amm inn qari haisot henkoddemu;
afan shonkumanne malmatilan inn qapep amm inn kinnaatta diinnintamu.
17 orr se antu inn kapop hit ila nam shokkooh naf kapin inni henpaasemu?
18 ikkim tiitu inn kapop deyinossin dinkam.
kafittaaynonno iyy olle hit;
tiitu inn hemalmatiyemu?
iyyanne an qaap shokkohannin erkanninpa?
antonaannonno shakkannohin hinemu?
19 hak ammannetess afan inn turi iqara marmannikinnop inni kinnaannimu?
kristoosin kinnaattaann Mooha turassin ishaamin;
moyshshadoot,
innu hin dahenn ishaaminkinnu inn qimisaass kida.
20 helpaan antu ayyep deyo,
qum antu fadiyop kinnaatta diinnintan,
ananno lamm qum inn fadishanep kinnaatta diinnina henkidin huurin.
maana maalla,
saapaass otanshayn ila shiittaanne maxashanumanne jiiaytaanne ihoxsaatta,
kexemanne,
hashshashanne foojanne orrqari sohatta kinnaanninamu henkidin.
21 et antu lakkiyya inn kapop deyiyyo saapaass moohaawu inn turi an deesanninamu henkidin huurin;
orr se sed tureeshsh juppot erkayy hin iyyaa erkayyenenne oshshumanne arpalumanne nyauur se iyyaa erkayyeness oot iyyaa juppooshaddu qara mitaata diiyenessin dappinninamu henkidin huurin.