bawloosenne orr hitaym eerpampayya
11
1 ikkim eepumaawu se qoj an duupannintaness irrayinkiy;
toxinnass ani duupadaa.
2 qum inant issinkishshotepin nam shokku inni rap;
iyyanno kristoos kida.
semmaalla qum Moohot inni doohiyopin ananno inni doohin.
3 hekoddu male qum maakot ururumayyin hewaan patandapusiyep,
qaapaann nayqaannina illo inn amaanama se dikkanne miili inn kristoosi qaftan all diinnintanemu henkidin huurin.
4 et nam pil deyu illo Yesus se innu inni lell pateesh hepil inn lelo shoke laaffot se inn qeeddatten pateeshsh hepil qeeddattan,
shoke lel masmasunt se innu inni lell pateeshsh hepil qeeddatan koddo ulleesh rux kidin qeeddannin kidapa?
5 hekoddu male antu amm afan "orr hitaym hin iyyaan kakkaan" kidamiy kannaatt kiyyop ani kinnaanniyanemu.
6 etin nam ishaama footta diinniyyu koddu nafenno hor ufunat henqapa;
sedenno helpa leken paana lekin patpahinn inn lell.
7 lel masmasunt heka Mooha kalisot male inn lelaawonn inn kaanisa maalla lahaat iqqapaawu juppot ani koddemu?
8 inni erkasa maalla maaparadda kristaana shakkan qara qarqaarsa qeeddattaawon iyyaan ponq.
9 helpaan antu inn kapa kiyyu rakkanniyo,
oot kaf hin meqtooniyaash dey an qarqaaren maalla,
amm nam antu rakkusiyy hekiyyamu;
hak ammannetess amm inn henrakkusiyemu;
ittureeshanno amm inn rakkusinninhinamu.
10 shaakket kristoos an ila kinnaattaadden,
amm nam huss akkaayya qalle foojawu an qara dawurinu hekiyyamu.
11 antu sedep kidiyyu maanaasse?
oot antu inn hoxsatta diinniyyu maallamu?
ikkimin inn hoxsanniyoss Moohot heup.
12 orr hitaym shakkan hin "innonno qumaddopin erkanninpa" kidiyy,
hin iyyaa irrayiyan dapusisaass hin ammann antu erkanniyyu ittureeshanno erkanninhina.
13 orr hinep kikkiy iyyaan orr hitaym heka kristoos pahanaatta ixoohiyy orr hitaym heka eerpaatenne erkamampayyaan nam paasiyy kida.
14 amm hin iyaan nam shamosinniyamu;
seetsananno hitaymiyya attumat pahanaattaass ixoohin.
15 semmaalla erkamampayya hin lamm erkamampayya tsillot pahnaatta ixoohaaddonno amm nam shamusinniyamu,
muutayta qara heriy erkamooddot akkanninan.
nam hitaym koddaayy minan miidama bawloos qari pai
16 "nam eepaytap an diha diiyyu."
heinkidin qar oorin lelin.
etin eepaytap inn kinnaadonno ikkimin jawshayy foojinu eepaytap an tooyaa.
17 etin sedep foojan ishaamiyyo,
ishaamaawu eepumann male amm qum has poldatepamu.
18 oot orr lek heka husslahatin foojiyan maalla,
annanno iyyaapin koddin.
19 oot inn iyyaan qalliqaapanniy kodditen maalla,
masmasuntann eepayya duupannin.
20 et namat ayleti inn kodanniyyo,
inn ponqiyyo,
innin erkawusanniyyo,
inn tuffanniyyo,
inn paaliyyo duupannikkishshan.
21 innu lamm sedep koda tashampayya koddaaynu deesotannin ishaamin.
hekoddu male et nam iaypisanniyyu kinnaado ananno issin aypisannina;
ammanenno antu sedep kidiyyu eepumann kida.
22 iyyaa ipiretemu?
ananno ipirishsh.
iyyaa israaeletemu?
ananno israaelishsh.
iyyaa hotta aprihaamemu?
ananno hotta aprihaam.
23 iyyaa erkamampayya kristoosemu?
antu iyyaa qara tawoss erkamampaytaayy;
antu yaaraytapin sed ishaamin;
iyyaa qara tawoss erkaman hentashsh;
helpa leke henhidam;
helpa leke henkaypam;
helpa leke toxt qaran henpai.
24 orr ayhuta helpa hene hund halpattann tsinqotann litsoottann an hekaypen.
25 halpattann halittin hentolam;
shokkoonn dakan henreepam;
halpattann konka antu qalle anniyyu qarass rakkot hedeit;
awoddat shakkanne kallapat shakkass pakatet qarass henxolad.
26 errall antaawu leka minan,
rakkot haqatenne heka mallaxat,
heka eewwaatenno an qari hepaitt;
kafaawu ayhutaanne siip kapeeshsh rakkot an qari hedeeyt;
saparaallenne nakulaallenne pakatet qarassenno rakkot an qari hepait;
settep lamm eerpampayya kapaashshanno rakkot an qari hepait;
27 erkama lekenne tashotin qap;
helpa leken peot dap;
tuffetanne deepotin rakkad;
helpa leken dama dap;
damhaytanne patpatt kinnaattot an qari pai.
28 hepil dahenn diha male,
iyaan lashsh min an baaqurusinniy oot maaparadda kristaana dahenneti qaapatta kida.
29 nam shokku tashshiyyo ananno tashshan diiyyemu?
nam shokku juppot ili sunkiyyo miirottan diiyyemu?
30 foojat et fadusinniyy kid,
iyaan tashoshawu akkinniyannin foojina.
31 Moohot appa poldaaynu heka yesuus hin hak parparat aypisam erpootta diittaawu heup.
32 antu sapara tamasqu qalle kiyyo peashisampayt hin Daam aretaas kidamiyyu kannaatt kiyyu an qapa fad illo kaalt saparanett wartiyadan lushusinnin.
33 hekoddu male orrat erra maskotet ohint sett ilan shaarin an lekkashshiyen illo antu harkayy kela passad.