iqara oorilaan bawloos oot erkamaayyat dehayy
10
1 an bawloos,
helpaan antu inn kapa kiyyo huuriyy kidamiyyu;
antu inn kapa sekaade lamm amm huuriamu kidamiyyu;
dikkuntanne dipatum kristoosennin inn dinkamannin;
2 orr karaddu iyyaan afan qaap husslahatin kallaanninkinnop innu tooyiy turass ilaash iyyaa lelan fadin.
hekoddu male helpaan antu inn kapop deyo ikkimin ilaash ishaaminu ikkim inn an inxaykusinninessin inn dinkamannin.
3 innu husslah qalle kallaanninkinnu nafe,
amm adant husslahatin adimu.
4 mehadda adanshaynotenno iyyaan irrot olishsh pusha irrot Mooha qap male amm mehadda adant heka husslahatemu.
5 shiittaanne qaap aypot hin Mooha ufunaatta qari foojin sohanniy allin pulpulinna.
qaap nam dahenn poojan ikkim kristoosi acacaminu kodinna.
6 inn acacama qarin paittane acacama diitta dahenn qara haarot oorsattaass hendikkisann.
7 inn akkan patalleel akkaanniyaah tooyin;
a nam antu heka kristoos kidiyyu qarxooru qaapadu;
settep lamm innonno qumaayyep heka kristoos koddaaynu qaapadu.
8 etin hayyotum se poldat innu dayyin foojiyyonno amm deesawinkiyamu;
maana maalla,
hayyotum hin innu daassam inn qiqimisaass male amm inn purjaajisaassemu.
9 hitaymadaawun afan inn sissikiinniyop inqaapadan.
10 maana maalla,
orr karatiddu "hitaym bawloos iyaan hursanne iyaan qim;
lamm et op iyy tooyiyane sharpayt;
ishaamayyanno ullaash kiyan" hekidin.
11 orr se sedep kidiyyu hitaymaan innu por seka kinno tsaafinkinnonne innu inn kapa kinno erkanninkinnu hawhaw kinnaatta diittaaddu ishaaka iyyaa fadusinnin.
12 hekoddu male innu orr se ixaypisanniyu olle iqapa shoke iyyaap kinnaattaas huurinkinn.
iyyaa lamm oot iyyaa mashshaddu iolle qapiyanenne ekkanniyan maalla,
amm qall qaapanniyanemu.
13 innu lamm erkamaan Moohot innu dayy innu inn kapan inpainnennin foojin male sed qareell tawunisan iyaan innu infoojinkinnu amm hekiyanemu.
14 innu lel masmasunt heka kristoos lelan inn kapop dexne,
heel innu daassam qar amm hentarpinemu.
15 lamm erkamaan orr pil kanni payyahenin all foojan heel se innu daassam qar amm tarpinhinnamu;
sekkapeeshsh amaanteshinn kaanishshu mitti erkamaan Moohot innu dayy ikkim otanshayn ila paldaattan anninaness irraxatetin qafna.
16 semmaalla erkama orr pil ilop kalan erkamaan tureeshsh erkawsamin fooja kapeeshsh hussaayn qar tarpan lel masmasunt lela fottinhinna.