qarqaarsa kristaana daassam
9
1 oot qarqaarsa kristaana kodaati inni tsaafa amm an fadusinnishshamu.
2 maana maalla,
orr shokku qarqaaraass qaap dikk qafnaattaayn henxup;
par se tarpe hiran inn iyyaan akkayya kallaanniy orr shokku qarqaara dikkisattaayn orr se meqtooniya kiyyossenno henlel;
qaapaayn se dikkanno iyyaa ila orr lek erkamaan dikk erkasa sohashshiyy.
3 semmaalla oot sedet innin foojaannu aypot kodda turan kaf sed inn kapop hitin;
innanno qum se antu sed tureeshsh inni lelep dikkisadaa lushadaa.
4 et orr meqtooniyya an olle inn kapop deyan inn dikkisatta diittan,
iyyaa inn qari paxane,
irraxatet se innu inn qara qafnonn deesawinhinna,
innanno ikkaaness deesawintan.
5 semmaalla ikkim kafat innu tureeshsh inn kapop anninan,
dukat se inn daanninhinna kiditen inn qaapusinninan inn illo dikkisattan lushannintaness iyyaa dinkama an fadusiyy.
paana sedenn iyyaan inn daannishshanenno irrotin kodda male hinnashayn koddaayy akkinnin.
6 sed immashshi oorsadaa,
nam qojiyy seiy iyaan qoj oyhannina,
iyy lekiyy seiy lamm iyaan lek oyhannina.
7 oot Moohot nam masmasuntan daanniyyu hoxsanniyyu maalla,
nam daatta qaapad mutsurooyy qalle hin iyyat qaapad dayyu male qaap lakkenn shoke koomaytan daatta diiyyu.
8 iyaan inni fadusinniy dahenn helpa min akkattan erkamaan dikk dahenn erkasa ikkim fottintaness Moohot purnatan kiint inn daatta fottina.
9 sedenno qum it,
"hiyaayyaass puriy dayy;
tsillumayyenno hak parparatess kallaannina."
kidant tsaafantep kida.
10 Mooha se,
hotta seysampaytass hotta,
damaassenno dama daanniyyu,
hotta inn seinnintan purnatann inni daannina;
qunda qarqaarsaaynetenno inni lekinnina.
11 orr hin qarqaarsaann innu kapin iyyaa painniyu dahenn ikkim Mooha aypisanninan innanno lashmin nam qarqaarintaness Moohot akkan heikketenn inn shorokumusinnina.
12 qarqaarasa hin inn kodishan rakkot kristaana hoshilisaaha kodda male,
ikkim orrat aypila Mooha dehanninaness kodin.
13 erkamaann heka qarqaarsa hin amaanamaayn akkinniy qara sohaattan,
lel masmasunt heka kristoosi acacamaaynenne qarqaarsa se kaan inn iyyaassenne orr dahenni daatten minan orrat Mooha serkinninan.
14 iyyaa ootaayn Mooha dinkamiyane dikkuma Mooha hin kaan iyyat inni qapu minan innass darrayyin.
15 oot daayyaayy se lelama fottama diinniyotess Moohot hexaypisamu.