qarqaarsa kristaanot daanniyyu
8
1 kafoot,
ikkim dikkumaan Moohot maaparadda kristaana hin meqtooniya kiyy qapu ufunaannintanessin fadin.
2 iyyaa rakkot lekitin ekkawsantete masmasunshiddu ikaant;
ikkaan teekayya kodditete,
qarqaarsa lek koden.
3 qafnashaddu mittassenne se qareellanno hasaaddun daattaaddoss antu maanyet.
4 iyyaa erkama qarqaarsa se kristaana daassamiyu ila harkaaddu kinnaattaas ikkaani innu dinkamaden.
5 iyyaa erkayyen,
se innu qaapann qareell kida.
turaqattaass poldass iddayyen;
ukkannass lamm has moohaatenn innoss iddayyen.
6 semmaalla oot tiitu turaqatta erkama hin dikk hir maalla,
ammanenno erkama qarqaarsaayn ikkim kaysila qaran pausinninossin iyy dinkamin.
7 innanno akkan heikketen,
settenno amaantetanne lelanne ufunatanne qimussaanne hoxsunt se inn innu qaftan dahennen heshorokunten;
erkama qarqaarsa hin inn erkanishanennenno ikkim shorokumintanessin fadin.
8 sed lamm antu inni leliyyu amm inn acacaassemu;
hekoddu male qimussa orr shokku olle tooyaman hoxsunshinn shaakket koddaadd ishshaakass kida.
9 inn dikkuma poldaaynu heka Yesus kristoos heufutan;
iyyat shorokitt kodditete,
ikkim inn teekayy minin shoroht koddintaness inn maalla teekampayt kodd.
10 oot qarqaarsa sedetess,
korsa inni koddinu antu inn korsiyu hin iyy;
par se tarpe daattaasseeh kodda male daatta qaapattaassenno turiqatta iyyaan hir inn kida.
11 amman hin inn hirten qum humunayn mitti kaysiyaa;
sedenno qaap se dikk inn daatta qaftan ikkim erkaman akkinnintaness kida.
12 daattaass etin has dikk qafnaanno,
hin innu daanninkinnu qeeddamiyyu,
se innu qafnu mitt daattaan male amm se innu qafnu qareell daatta qaapattaannemu.
13 sedep kidaawu,
<<inn daattan payyahan orr shokku haysadenii>> kida kodda male,
ikkim dahetaynin orrkapi kinnaannintaness kida.
14 helpaan inn rakkannishshane,
ikkim shorokumaaddu rakkoshayn qalle inn sohashshinninoss,
ammann shorokumaayn rakkoshaddu qalle iyyaa sohashshiyu;
paana sedenn orrkap kinnaannintan.
15 sedenno qum it,
"nam lekisadessenno amm alli hetarpitemu;
se qojisadessenno amm alli hekelawutemu."
kidant tsaafantep kida.
tiitonne kataayy
16 lamm Mooha se qum antu inni qaapanniyop ikkim tiitu mutsurooyyalleell inni qaapanninu kod heaypisamu.
17 tiitu inn kapop deyiyyu hinnatayyenn masmasuntann male amm oot innu iyy dinkamin maallaahamu.
18 kafittaaynu se lel masmasunt lelan maaparadda kristaana heikketin aypisamennon iyy olle hitinna.
19 sedeeh kodda male helpaan innu qarqaarsa settin anninkinno,
ikkim innu olle anninoss maaparadda kristaanatin pahisam;
innu qarqaarsa settin anninkinnu,
pold serkisaassenne orr shakkan qarqaara has dikk qafnaattaaynu minan kida.
20 innu kodashshet sed op qarqaarsa dayyen qapinkinno,
namat innu haasa turan ilushannin.
21 qaapaannu,
pold turasseeh kodda male nam turasseenno iyyaan dikk erkasa kida.
22 kafittaaynu se helpa leke paana hawhaw kiyyun ekkawusaman kokkaad innu akkinin kerra tiitu olle hitin.
oot iyyat amaantet kaant inn qara qapu maalla,
qimussaan iyyat erkama hinin inn qarqaara qapu heka tureeshsh qara tawan.
23 nam oot tiitu ufunaatta fadiyyu et kinnaado,
iyyat kayshaawu iyy inn qarqaara an olle erkanniyyu kida.
oot kaf se iyy olle anniyyu et koddito,
iyyaa iyyaan maaparadda kirstaanaatin pahisam serka kristoosi ell kida.
24 semmaalla,
hoxsunshayn iyyaa akkiyyaa.
paana sedenn hoxsunshaynenne innin foojaannu aypot kodda diittaayy maapar kristaana turi patpahinnintan.