7
1 sedeeshsh,
mooyshshadoot,
oot lel irraxatet sed innu daassam maalla,
hin dakintanne laaffot oshumusinniyy dahenn ketta sekaattan,
Mooha huuraannenno immiilisan Mooha iddehhannu.
masmasunt bawloos
2 has dikkin innu qeeddadaa;
nam innu qarkall amm hekiyyamu;
amm nam henmiidinemu;
nam innu iyyaan iyyi koddaayy qara qeeddann amm hekiyyamu.
3 sedep kidaawu amm horat inn qari quuraassemu;
qum antu sed tureesh inn lelep mutsuraannu qalle kishshhan;
semmaalla kiyyatin koddonno toxtannenno amm inn ketta rehanninhinnamu.
4 patpahisa inn ishaamaass amm huurra henqapamu;
ikkaanessin innin foojin;
kokkuntannon innin akkad,
rakkoshaynu dahenn ila ikkaanessin masmasin.
5 helpaan innu meqetooniyaap deinenno,
por hexikketeeshsh rakkot innu qari dey male amm apure henhaysannemu;
altaashsh jiiayta,
tallaashsh lamm huurallen kinna.
6 hekoddu male,
Mooha hin orr se dappinniyyu kokkinniyyu tiitu innu kapop hitaann innu kokkiyy.
7 innu kokkunt akkann,
innu kapop deyaayenneeh kodda male inn iyy kokkisaayn dakayaaynonnenno kida;
darrax inn ani qaftanenne dappetanne tajamaayn iyyat innu lele ikkaanessin masmas.
8 hitaymaan antu sed tureeshsh inni tsaaf et inn dappusiyyan koddo,
hitaym sett inni tsaafaawonn amm akkanat ani dakaysamaanniyyamu;
et an dakaysamaattu koddu nafe,
it ani dakaysamaatt,
oot hitaymaawu helpa qoji inn dappusiyy maalla kida.
9 amman lamm henmasmas;
antu inmasmas inn dappusisaawun kodda male dappeshayn minin qaapaayn se nayq qara mitaataaynenn kida;
semmaalla oot dappeshinn has Mooha qari koddit maalla,
amm innu inn qari henkallemu.
10 dappet has Mooha qari koddishshu,
oohama jupot qara mitaatan por dinaatep namin anniyyu akkinniyyu maalla,
amm nam dakaysamaanniyyamu;
dappet husslah lamm toxtann deyin.
11 dappet hin has Mooha qari koddit,
akkan dikk erkasa qimussa ashshann kiyy,
iqqara oorilaan ashshann kiyy,
jiiayta ashshann kiyyu,
huuraan ashshann kiyy,
darrax ashshann kiyyu,
qaap ashshann dikkaanniyyu,
jiixilaan ashshann kiyy otanshayn talli akkisaayy dikkiyyaa qaapadaa.
inn lamm hin dahenn ila kinnaatta diittaayn hexufnaytitten.
12 semmaalla sed antu inni tsaaf,
hoxsunt inn innu qaftan ikkim Mooha turi patpahintoss male,
amm oot nam se nam qar kaletess shoke oot nam se qarkalmaadetessemu.
13 innonno sedminann kokkuntin akkann.
kokkunt se innu akkann qareell tiitu masmasaayyennin ikkaan masmasin;
masmasunshaynonno,
oot inn dahetaynin tiitu kokkittenenne mutsuraayy haysitten maalla kida.
14 hin antu inn minin foojiyyu tiitoss henlel;
amm innanno an heddeesattenemu;
lashshminin shaakket inni lelin.
settep lamm fooj hin innu ootaayn tiitu lell shaakket koddaayy heufunasham.
15 semmaalla dahaynenn iyyaan acacam koddaaynenne,
huurraanne helshattan iyy qeeddattaayn et qaapanniyyo,
hoxsunt iyyat inni qapu it kaant.
16 ananno hexikketin inn irrayaawonn ikkaanessin masmasin.