6
1 oot innu iyyaan ollin Mooha erkanniyy koddin maalla,
daayy Mooha aypotass inqeeddadan henkidin inn dinkamannin.
2 Moohot,
"helpaan senen hed dakay,
lashsh dinaaten hed qarqaar!"
hekidine,
toare,
helpaan sen ammann;
lashsh dinaatenno ammann kida.
3 erkaamaannu innu qari qapama tura akkan shokkooh nafen amm aynossenno kohayt koddinhinnamu.
4 sekapeeshsh rakkotanne miidamaanne baaquranno duupatteten erkamampayya moohaatep paana heikketin iddehanninna.
5 erkamampayya Mooha koddaaynu innu inxakkinninnu,
kaypamaanne hidamaanne innu qari sohattaanne erkaman payyahaanne peot dapaanne tuffaann kida.
6 settep lamm miilumaanne ufunatanne duupattaanne dikkumaanne laaffot miilotin turqeeddamaanne hoxsunt shaakketatenne
7 lel shaakketatenne irrot moohaatenn kida.
mehadda adant iyyaan innu kopilaanne torap qapanninnu tsilluma kida.
8 serkaass shoke deesotass,
sooqqamaass shoke aypisamaass innu hendikkisanni.
innu shaakket ishaantete "iyyaan nam paasiyy" innu kiden;
9 iyyaan ufunashamiyy kodditete iyyaan ufunashama diinniyin koddin;
heraawen kidantete,
toare kiyyatannin kinn;
hettolantete amm toyinkinnamu.
10 dappet ilanno lashsh min masmasinkinn;
teekayya kodditete orr lekin shorohoti kodin;
iyyaan akkan dap kodditete heikketin qafna.
11 inn iyyaan qorontoose kallaanniyy!
toare,
patinpahinnin inni lelin,
mutsuroonnonno innaass henqahinn.
12 inn innu hoxsatta diinnin male amm innomu.
13 qum meddooyyotep an inn lelonu,
innanno mutsuraann qahiyaa innu hoxsaadaa.
orr amaana diinniyyu olle sena diiyyaa
14 paana kodda diinniyyun orr amaana diinniyyu olle sena diiyyaa;
tsillotanne juppot maana ollin qapan?
attumatanne poorinnat ashshann ollin kallaanninan?
15 kristoos seetsana olle senat maanat qap?
shoke se amaaniyyonne se amaana diinniyyu maana ollin qapan?
16 man miilot tsootsa olle senat maanaat qap?
qum moohoot,
"man kallashawotin otant siipawu ili kodannina;
iyyaa ollennon kallaannina;
antu moohaaddun iyyaa koddina;
iyyaanno siipawu koddinan."
kid lelep innu man miilot heka Mooha se kiyyatin kiyyot kida.
17 semmaalla,
"iyyaa ila reehhadaa illo sohadaa;
hekidin poldat.
hin oshshumenno qappatta diiyyaa;
ananno innin qeeddannina;
18 antu appaynin inni koddina;
innanno meddaawu diidaanne iskatt ani koddintan;
hekidin Mooha heikk fottiyyu."