amaanaman erkasa
4
1 semmaalla,
oot Moohot innu mutsurood illo erkama hin innu dayy maalla,
amm irraxatet allquurinhinnamu.
2 iyaan dekamenne nam deesanniyy allin diinn;
amm ururum erkanninkinnamu;
amm lel Mooha all oohinkinnamu;
sekapeeshsh patinpahinnin shaakket ishaamin;
ikkim namat dahenn innu qeeddanninossenno Mooha turi iakkinnin.
3 lel masmasunt hin innu kollinninkinnu et qar shuushuqisamu koddu nafenno,
iyat qar shuushuqisam orr se allipatinoss kida.
4 seetsan hin peashisampayt husslah kodd orr se amaana diinniyyu qalle mutsuraaddu jooliy.
paana sedenn ikkim iyyaa attumat lel masmasunt heka serka kristoos se paahnat Mooha kodd inxakkini kod.
5 innu kollinninkinnu,
Yesus kristoos pold koddaayyenne innonno iyyaan ootaayy maalla inni erkanniyy koddaaynu male,
amm oot hekaynotemu.
6 maana maalla,
Mooha se "attumat poorinnat ili attumattu!"
kid,
iyyeeh ikkimin serka Mooha hin Yesus minn akkaanniyy ufunaanninnu mutsuraannu qallessenno attumayy.
7 hekoddu male,
irrot hin kaant,
heket Moohaat male amm hekeshaynomu.
sed ufnaytisaass innu iyyaan mehaddaan huss ila soorumamep kiyy qalless mehaddaan serkisam haayamen.
8 por heikketeeshsh rakkot innu qari deyishsh;
hor amm pushmaanninkinnamu;
hallutta innu koddishsh;
hor amm irraxatet allquurinkinnamu;
9 olishshada innu kann arinniyyan;
hor amm nam hendafnemu;
innu sunkinniyan,
hor amm raawinkinnamu;
10 ikkim kiyyat Yesus innu ila akkaannintoss lashsh minin toxt Yesus haxinnin inxannin.
11 kiyyat Yesus sohaannu hin toyiyy ila akkaattaass innu iyyaan kiyyatin kiyy Yesus minannin lashsh min toxt tarpisamin daassamin.
12 semmaalla innu qar oxoorin toxt daassaminkinno inn lamm kiyyat akkann.
13 hekoddu male qum it,
"henxamaan;
semmaalla ishaam" kidant tsaafantep,
oot innonno laaffot shakkaah heka amaantet qafnu maalla amaaninkinn;
semmaalla lamm ishaamin.
14 Mooha hin Yesus pold toxt ila sohashshiyy ikkim lamm Yesus olle innu sohashshinninnu illo inn ollenno iturop innu dehanninoss henxufn.
15 dikkuma Mooha hin orr leki puriyy serka Moohaat aypila qari aypila padawaass hin dahenn inni kodden.
amaantetin kallaatta
16 Semmaalla amm irraxatet allquurinhinnamu;
Et dakinshinnu hin akkaannishshu alhatan annishshu nafenno,
lamm hin akkaatta diinnishshu lashsh lashshann awshumint.
17 Rakkoshaynu se hoshiltenne helpaasseeh koddit serka parpar hin kaan akkan op olle ekkanninan dap innu akkinninta.
18 Iinnu lushanninkinnu hin akkaatta diinniyy male amm iyaan akkaanniyyamu;
Maana maalla,
hin akkaanniyy helpasseeh kida;
hin akkaatta diinniyy lamm heka parparat.