erkamampayya kaka awshiyya
3
1 kat ammannennon iaypisanninnamu?
shoke heka orr shakkanatep taptaappet aypila innass shoke inn kapa innu fadusinnimu?
2 inn mashshayness ukkul taptaappet aypila it mutsuraannu qalli tsaafant namat dahenn uponne waarusisa fottinu kida.
3 inn taptaappet kristoos,
it patpahit,
qalametin kodda male laaffot Mooha se kiyyatin kiyyotenn,
daka qari kodda male mutsura nam qalli tsaafant innun erkawsant kida.
4 innu maalla sedep kidinkinnu,
oot innu kristoos kapin Mooha qari amaantet kashanninkinnu maalla kida.
5 Mooha innu fottosinnin male amm iyaan innu poraynooshin erkasa fottin kidinnu hekiyyanemu.
6 iyyat halitt se fiitalan tsaafamin kodda male laaffot miilotann ikkimin erkamampayyaa kaka awshiyya kodda kayinu innu kod;
maana maalla,
halitt fiitalan tsaafam toxtann deyin;
laaffot miilot lamm kiyyat daannin.
7 halitt tsaafam,
daka qarass fiitalaan kida;
attumat serka Mooha hin helpaan halitt daassame kishshu,
it allihatishu kodditu nafenno,
ikkim israaelet serkaani minann miint muus illisatta tooya fotta diinninaness kodit.
semmaalla halitt hin toxtin deyiyyu et serka hinep kiyyin akkaadu koddo,
8 kat ashshann erkamaan laaffot miilotin kodd serka hin qara taw qafinaatta diinninan?
9 et erkamaan horat toxtatin deyiyy serka qafnaanniyyane,
erkamaan orrat tsilluman akkanninan ashshann serkaan se qareell taw qafnaatta diinninan?
10 halitt hin tureeshsh serka qapu,
se serka kaan qapu kapi tooyamiyyo iyy serka dap koddin.
11 hin alhatiyy serka qafnaanniyyane,
hin alhata diinniyy ashshann serka hin qareell taw qafnaatta diinnina?
12 semmaalla,
oot innu irraxatet sedep kishshu qafnu maalla,
huura malen ishaaminna.
13 innu amm muus se attumat miinshayy hin haahinnishshu shiiqan annishsho israaelet akka tura uuwaatin immin dekiyyopin kinnaamu.
14 hekoddu male israaelet,
oot qaapatiddu qeeddatta tashsh maalla,
hak awwetess helpaan iyyaa matsaafadda kaka pahayya waarusinniyyane,
kaarrata hin ulla kiyy;
iyat maalla ulla kinnaanniyyu,
oot iyat kristoosenneeh allqeeddamiyyu maalla kida.
15 awwenno et matsaafa halitt muus waarusinniyyane qaapatiddu afa kaarrata se kelaah kiyyop kiyyaannin.
16 hekoddu male et namat por poldatep mitaato kaarrata hin allqeeddamin.
17 poldat laaffot;
por laaffot pold ulla kishsho shayy kallaatta kiyy.
18 innu dahayinonn miint kaarratan dekama diittennin serka pold qum kaawwatatep haahittetea ikkimin iyy pahanaanninnu serka qari serka padawattan oohaminna.
hinenno koddinan,
pold se laaffot kodd kapa kida.