2
1 semmaalla,
ikkim antu lakkiyya inn kapop indeynin illo inn indappusinniness henkutad.
2 etin inn dappusiyyu nafe inn iyyaan antu dappusiyy pateeshsh aynu an masmasusinnina?
3 tureeshsh antu maalla sedep tsaaf,
orr helpaan antu inn kapop aane an masmasusinnaay an dappusisa tura kida;
maana maalla,
masmasunshiyyu masmasunt heka dahetayn koddaadd amaaninkiyy.
4 antu inni tsaafiyyonno,
dappet kaantenne mutsuraan baaquriyyanne ilmamaan lekenn kida;
hin dahenn hoxsunt kaant inni qafnaattaawu ikkim ufunaannintaness male amm inn dappusisaassemu.
nam nayqinniyyoss allhattu kida
5 nam nam dappusiyy,
ishaamaan hoxsa ani kodda diittu male,
paana shokkonn anaaha kodda male dahetaynenn inn dappusiyy.
6 nam sedess horat orr lek inn ila iyy qari quuren iyy kayinta
7 lamm ikkim nam hin ikkaani dappisan irraxatet all inquurini allhattu ikidan kokkokkisa inn fadusinnin.
8 semmaalla hoxsunt inn iyyi qaftan ikkim ammannenno iqqiminnintanessin inn dinkamannin.
9 antu maalla hitaym sett inni tsaaf,
iyyaan ekkawsamaan inn qari deyiyy fottiyyanne iyyaan heikketi acacamiyy koddaayn ufunaattaass kida.
10 nam inn allhattu ikkidishshaness ananno allhattun ikkidina;
shaakketass iyaan antu maalla allhattu ikkidinu et kinnaadane kristoos turass inn maalla allhattun ikkid.
11 antu maalla alhattu kidiyyu,
oot innu shonkum seetsan ufnu maalla,
ikkim iyyat innu qarass filta inxakkanniness kida.
baaqur bawloos
12 helpaan antu lel masmasunt heka kristoos lela saparaan tsiroata kidamiyyap aane,
poldat kaalt ani qahiyy makess;
13 hekoddu male oot antu kafittaawu tiitu ulla akka diiy maalla amm mutsuraawu hehaysadenemu.
semmaalla kristaana se ulla kiyyu kapa hensohad illo meqtooniyaap aan.
14 hekoddu male Mooha se helpa mitt kristoos kapin inpushan innu tur qeeddiyyonne shittot dinnahunt somm qaftotep ufnat innu oot kristoos qafnu ikkimin por heikketin inpainnu innu kodiyyoss aypila koddenii.
15 maana maalla,
innu orr dininossenne orr patinoss itsaana dinnahunt somm qapop iyyaan kristoos kapin Mooha dehaad kida.
16 innu orr shokkoss dinnahunt toxtat,
orr shokkos lamm dinnahunt kiyyatat kida;
kat aynu erkamayn erkasa kayina?
17 innu amm qum orr se lek lel Mooha mehaddaap kashiyyapin kinnamu;
sekkapa innu qum orr se qaap dikk qapu Moohot iyyaa hitep kinnaattaannin kristoosin Mooha turi ishaamin.