hitaym bawloos lakkiyya
orr qorontoosetess
1
1 bawloos se has moohaatin nam hitaym heka Yesus kristoos koddenne kafittaaynu tsimootos kapa,
maapar kristaana heka Mooha se sapara qorontoose kiyyossenne kristaana se huss akkayyaa qalle kiyyu dahenness,
2 Mooha appaaynonne,
poldaaynu Yesus kristoos kapa has dikkanne andot inni koddenii.
aypilaan bawloos Mooha dehayy
3 Mooha appa se nam mutsuroonniyyonne kokkunt dahenn nam daanniyyu appaanne Mooha poldaaynu heka Yesus kristoosess aypila koddenii.
4 iyyat rakkoshaynu dahenn ila innu kokkokkinnin.
semmaalla kokkilaan innu Mooha kapa akkannenn orr se rakkot heikk ila kiyy kokkisa fottinhinna.
5 maana maalla,
qum innu rakkot kristoos illeki qootannep lamm kristoos kapann kokkunt lekitin akkanninna.
6 hekoddu male innu rakkot qeeddanninkinno,
ikkim inn kokkuntanne dina akkannintaness;
innu lamm kokkunt qafnaanninkinnu,
ikkim innanno rakkot se innu qeeddanninkinnu duupattan qeeddattan kokkunt akkannintaness kida.
7 qum inn rakkoshaynu qootannishshan mitt iyyaan kokkunt se innu akkan qootanniyy koddaayn innu ufunu maalla,
irraxatet qintin ootaayni qafna.
8 kafaaynu!
ikkim rakkot se innu huss issiyaate kinno innu qari deet ufunaannintanessin fadin;
rakkot settenno oot it innu qareell kinnaatt maalla irraxatet innu kiyyatin kallaatta qafnu nafennon all quurr makess.
9 shaakketass afa horat toxt innu qari quurantep innu kinnaaden;
hin dahenn innu qari paen,
poraaynooshsh kodda male Mooha se orr raaw toxt ila sohashshinniyun koddaadd ikkimin irraxatet kodanninnoss kida.
10 semmaalla iyyat toxt sedep kishshu kela innu diniyy;
ittureeshanno innu dininnina;
lamm ikkim innu dininninoss irraxatetin iyy kapa qafna.
11 innanno dinkamin innu qarqaaraa;
etin innu dinkam lekin qarqaarsa Mooha akkanno,
orr lek lamm innu minann Mooha aypisanninan.
bawloos qorontoosep anta alldiittaayy
12 akkan innu infoojinkinnu hin iyaa;
sedenno,
kallat se innu orr pilanne karakutt inn olle qafnu,
miilumanne shaakket innu Mooha kapa akkannin koddaadd kida.
hin lamm shaakket koddaadd qaapaannu innoss lelin;
hin kodden,
dikkuma moohaatenn male amm qallishshaaka namatennemu.
13 amm iyaan inn waarusisaanne qall ishshaaka fotta diinnintan inni tsaafinhinnamu;
ikkim dahenn ishshaakintaness irrayinkiyy.
14 ammann iqojess innu ishaakiten;
ukkanna lamm ikkim dikkinnintan dahenn ishshaakiintaness irraxatetin qapa.
sedenno,
lashsh se Yesus poldat deyiyyo,
qum innu innin foojinkinnop innanno innonn foojintan.
15 oot antu sed upu maalla ikkim lakkin qoran akkannintanessin kid turi qatta inn tooya qaapad makess.
16 antu inn tooya qaapad,
helpaan antu meqtooniyaap anniyyonne mitaatiyyu illo huss yihutaatep anniyyo ikkim an qarqaarintaness kida.
17 helpaan antu sed qaapade,
afa nam iyaan iyyat erkanniyyu ufunaatta diiy kap lakk ishaamiyyopin inni kinnaademu?
shoke nam kollila namatin ammann,
"heyye heyye" kidiyyu,
ullaat lamm,
"iyyokku iyyokku" kidiyyopin inni kinnaademu?
18 oot Moohot iyy amaanam kodd maalla,
lel innu inni lelinkinnu amm "heyyenne iyyokkomu".
19 meet Mooha Yesus kristoos hin ananne sillaasenne tsimotoosenno inni lell,
lel awimitt "heyye" kidiyyonneeh male amm lel se "heyye" shoke "iyyokku" kidan nam shurshurinniyyonnemu.
20 lel irraxatet se Moohot innu dayy dahenn,
"heyye" koddinu kristoosenn kida;
semmaalla kida innu kristoos kapin serka Moohaat "ameen" kidinkinnu.
21 iyy ikkimin innonno inn olle kristoosin qiminnu ellinnu kodiyyu,
erkamooyyassenno innu reehad Mooha.
22 hekaayy koddaaynu ishshaakisa iyy maatam innu qari kodenne shorokum se iyyat ittureesh innu daanninnossenno laaffot miilot qaptetap mutsuraannu ili haay iyy kida.