toot ila sohatta kristoos
15
1 kafoot,
lel masmasunt se antu inn kolliy,
inn lamm qeeddatten,
inxelliten,
inn mashsh oorisan fadin;
2 lel masmasunt se antu inn kolliyy et qimisattan qapattane iyyann dinannintan;
hin inkinnekuless aypotass amaanten kida.
3 antu se antu qeeddad,
heikk qara tawun inni tarpiyy dayy;
se antu inni tarpiyyenno,
qum it matsaafadda miilot qari tsaafant mittass kristoos jupposhaynu minann toy;
4 mookam;
qum it matsaafadda miilot qari tsaafant mitti lamm lashsh halpattiyyaate Moohot toxt ila iyy sohashshiy;
5 iyyat kefassenno akkaad,
ukkanna lamm orr hitym hundann lakki akkaad.
6 sekanna kaf tseet hen qareell kiyyoss shokkoohi akkaad;
iyyaa ila orr lek hak ammannetess kiyyan,
orr karatiddu lamm heraawen.
7 sekanna yayqoopess akkaad;
orr hitaymatessenno dahenn akkaad.
8 muutayta qara lamm an se qum alkashaatep kiyyu nafesseno akkaad.
9 oot antu maapar kristaana heka Mooha miid maalla,
antu nam orr hitaym kanneett kiyyonne nam hitaym kidama hembama fadusisa diinniyyu kida.
10 hekoddu male antu aww sedep kodda fott,
dikkuma mooohaaten kida.
daayy se dikkumooyin daassamenno amm qunda male all hehatemu.
antu laaddu iyyaa qareellin erkaman payyah;
hekoddu male hin erkawusamen,
daayy Mooha an olle kinnaattaann male amm anannemu.
11 semmaalla ananno koddu iyyaanno koddane sedin kollinnin.
innanno amaanten,
sed kida.
toxt ila sohatta
12 innu toxt ila sohatta kristoos kollittete,
inn ila orr karatiddu ashshanness,
"toxt ila sohattot amm hekiyyamu" kidin?
13 toxt ila sohattot et teek koddo amm Moohot toxt ila kristoos hesohashshiyyemu kidapa.
14 et Moohot kristoos toxt ila sohashshisa diiy koddo,
kollilaannonno,
amaanteshaynenno aypot kodden kida.
15 lamm Moohot kristoos toxt ila hesohashshiyy kidan kollisaaynon eerpaassin Mooha maanyet koddin kidapa.
shaakketass et orrat toxt ila sohatta diinninan koddo,
amm Moohot kristoos toxt ila hesohashshiyemu kida.
16 orr raaw et toxt ila sohatta diiyyan koddo amm Moohot kristoose toxt ila hesohashiyemu kidapa;
17 et kristoos toxt ila sohatta diiyyu koddo amaanteshinn aypot;
innanno sanu juppotayn ila kallaannin kida.
18 settekul orr hin kristoos amaan raaw allpaten kidapa.
19 innu kristoos irraxatet kodanninkinnu,
et kiyyat husslah sedetesseeh koddo,
iyyaan orr heikk qareelli nam dappinniyy koddaaynupa.
20 hekoddu male,
kristoos toxt ila sohattan orr se raawess qart kodd shaakket toxt ila sohad.
21 maana maalla,
qum toxt nam shokkooh minin deetep,
toxt ila sohattaanno dey,
nam shokkooh minann kida.
22 qum namat dahenn attaam olle kinnaattan raawiyyop,
settep lamm namat dahenn kristoos olle kinnaattaann kiyyat akkannina.
23 hekoddu male nam namass helpooyyass koddinan.
kristoos toxt ila sohattaass qart kida.
helpa iyyat mitaatiyyu deyiyyo orr se hekkaayy kodd toxt ila sohanninan.
24 sekanna,
helpa iyyat peashilaanne hayyotumanne irrot dahenn allpatiyu illo daamum Mooha appa tarpinniyyu daanniyyo muutayta husslah koddina.
25 maana maalla,
hak Moohot olshadaayy dahenn hayyotumaayy keli kodinoss,
kristoos daamuma iyy fadusinnin.
26 olishsh muutayta qara pushimaanninu toxt kida.
27 maana maalla,
"Moohot akkan heikk hayyotumayy kelass ikkod."
hekidant tsaafant;
hekoddu male hin "heikk hayyotumaayy kelass ikkod" kidant,
amm Mooha se heikk hayyotumayy keli ikkod tooyusinniyyamu.
28 et heikk hayyotum kristoos keli koddan kanna ikkim Moohot heikketin dahenn koddinoss immat mashshayyess Mooha se heikk peashshilaayy keli ikkodess piddamina.
29 et toxt ila sohattot kinaatta diiyyu koddo,
hin oot orr raawet ahalisamiyy maana kodinan?
et orr raaw toxt ila sohatta diinninan koddo,
maanaass ootaaddu ahalisamin?
30 innonno helpa min rakkotalli kalinkinnu maanaasse?
31 kafoot,
lashshmin toxt an qari pain,
sedenno antu inn leliyyu,
oot fooj se antu poldaaynu Yesus kristoos kapin inni qapu ipatpah kodd maalla kida.
32 et orr raaw toxt ila sohatta diinninan koddo,
sootant hin antu sapara efesoonete afa namap pinant olle soot,
maana ani kodint?
shoke qum se it,
"paarren toyinna,
daminaa ukinaa."
kidantep koddaaddipa.
33 patandapa diiyyaa;
"kayishsh nayq has dikk nayqinnin."
34 mutsura koyadaa;
juppotanno erkasa diiyyaa;
otanshayn ila iyyaan Mooha ufunaatta diiy kiyy;
antu sedep kidiyyu inn deesasaass kida.
dakint se toxt ila sohatt
35 hekoddu male nam shokku,
"orr raaw ashshann toxt ila sohanninan?
et sohadane,
dakint ashshann kishshu qafnaanninan?"
kida kaassatta fottina.
36 att eepayt,
hotta att seyinnishshu toya male amm kiyyat qafnaanniyyamu;
37 att kaappa shoke hepil seyinnishsho hottaah seyinnin male amm sakkattaan kanneeshsh akkaanninamu.
38 Moohot lamm hotta settess hasayyenn dakint idaannin,
hotta settessenno mashshmashshayyess dakint hawhawi kikkishshu daannin.
39 uuma kiyyat qapu dahenn amm soha shakkanooh qapamu;
soha nam orrop kiyyan;
soha horet lamm hawwass kiyyan;
soha hampira orrop kiyyan;
soha qurtsummetatenno hawwass kiyyan.
40 settep lamm dakint moontallet kiyy;
dakint husslahatenno kishsh;
hekoddu male serka dakint moontall orrop kiyyan;
serka dakint husslah lamm hawwass kiyyan.
41 serka lashsh se otawishshu hawwass kiyyan;
serka lehaatenno hawwass kiyyan;
serka iskaatenno hawwass kiyyan;
serka iskitt shokku heka iskitt shokku ketteeshsh hawwass kiyyan.
42 toxt ila sohatta heka orr raaw sedep kiyy;
dakint allpatishshu mookamin,
dakint patadiinnishshu sohannin.
43 hin deesotin seyisam,
serkaann sohanninan;
hin tashshampayya kodd seyisam irrot qafnaanninan sohanninan;
44 hin dakint soha koddit seyisant dakint laaffotaten sohannint.
dakint soha et kinnatto dakint laaffotatenno kinnannint.
45 settep lamm,
"attaam nam hirayma uuma kiyyat qapu kodd."
hekidant tsaafant;
kristoos attaam lakkiyyot laaffot kiyyat daanniyyu kodd.
46 hekoddu male hin turaqatta dey,
dakint sohaat male amm dakint laaffotatemu;
hin heka laaffot kodd heka soha kanneeshsh dey.
47 ataam hin nam turaqatta kodd,
huss ila uumam,
heka husslahat;
lamm nam lakkiyyot dey moontalleett kida.
48 iyyaan huss ila uumam qum nam huss ilat;
iyyaan heka moontall koddenno qum nam moontallet kida.
49 qum innu paahnat nam husslah qafnopin paahnat nam moontallettenno qafnaanninna.
50 kafoot,
sedepin inni kidin;
sohaanne diik amm daamum Mooha taya fottinanemu;
settep lamm dakint allpatishshu amm dakint patadiinnishshu tayintamu.
51 toare,
iyaan dekam shakkanoohin inni lelin;
innu dahaynon amm raawinhinnamu;
hekoddu male dahaynon oohaminhinna.
52 innu oohaminnonno helpaan kaas muutayta dawamiyyo rixisatta indaatep uilaash kida.
kaasat dawamina;
orr raawenno iyyaan allpata diinniyy koddinan haynan;
innonno oohaminhinna;
53 maana maalla,
dakint hin allpatishshu se pata diinnishshu,
settep lamm hin toyishshu se toya diinnishshu uuwatta fadusinnin.
54 hin allpatishshu se pata diinnishshu uuwannishsho,
settep lamm hin toyishshu se tooya diinnishshu uuwannishsho,
"toxt se inpushshenn limant!"
hin kidant tsaafant kaysaannint.
settep lamm,
55 "toxta!
inpushaatt ahayla kiyy?
toxta!
irrot att namin miidishshu ahayla kishsh?"
hekidant.
56 irrot toxt juppot;
irrot juppotatenno halitt kida.
57 hekoddu male,
Mooha se poldaaynu Yesus kristoos kapin inpusha innu daanniyyoss aypila koddenii!
58 semmaalla,
inn iyyaan hoxsasham kafoot,
inn erkama poldati payahishshan,
aypot kodda diittaadd heufunaatene,
qima ellaa;
akkan shokkooh nafin seseya diiyyaa.
erkama poldatenno helpa min erkasa kokkaadaa.