daayyada himatenne heka kap hawi kiyyu ishaamaat
14
1 hoxsunt kanni aanaa;
daayy laaffot miilot,
karkutt him ishaama qimiyyaa fadaa.
2 nam kap haw kiyyu ishaamiyyu moohaass male amm namass ishaamimu;
oot iyyat hin dekad laaffot miilotin ishaamiyyu maalla amm nam qallishshaakiyyu hekiyyamu.
3 nam him himiyu lamm nam qimisaassenne korsaassenne kokkokkisaas ishaamin.
4 hin kap haw kiyyun ishaamiyyu mashshayyesseeh iqqiminnin.
hin him himiyu lamm maapar kristaanat qiminnin.
5 dahaynen et kap hawhaw kikkiyun ishaantin kid hoxsaanninhaay,
karkutt et him himittan kid ani dikkaannaay;
ikkim maapar kristaana qiminoss nam ishaamaan furinninu et teeko,
se kap haw kiyyu ishaamiyyu kapa se him himiyu aak.
6 semmaalla kafoot,
etin inn kapop deyu illo hin inni koddina,
settenno lel Mooha se dekam patapahisaanne ufunaatanne him lelaanne kollila inni lela diiyyu,
kap hawi kiyyun ishaamo maanan inni padawina?
7 mehadda laalet hin nafset dap,
kuluttatanne shonqaap kikkiyy nafenno et nass hawi kiyyu dapane nass laalet hin iyaa dakaysinniyyan maana koddaayy ashshann ishshaahmannina?
8 lamm kaasat et nass ishshaahmatta diinniyyun keeh kid aynu adanti dikkisannaay?
9 settep lamm helpaan inn ollin ishaamishshane et lel patpahin ollin ishaama diittane hin inn ishaamishshan aynu ufnaatta fottina?
afa haayya qara ishaamishshaanep kinnaannintan.
10 husslah qara kap lek kiyy;
kap furila dap lamm amm hekiyyamu.
11 semmaalla etin furila kap se ishaamamiyyu ufunaatta diiyyu koddo,
nam se ishaamiyyoss keesuman koddina;
iyyanno anass keessuma koddina.
12 oot innanno daayy laaffot miilot ikkaan fadishshan maalla,
daayy se maapar kristaana qimisa koddinu ikkim inni lekinu fadadaa.
13 semmaalla nam kap hawi kiyyu ishaamiyyu ikkim ishaamaan furinninu dinkamadu.
14 etin kap hawi kiyyun dinkamado laaffotawu dinkamannin male qaapaawu qalle qunda amm hekiyyanemu.
15 semmaalla maana koda an fadusinnin?
laaffotawonnin dinkamannina,
qaapawonnenno lamm dinkamannina;
laaffotawonnin laalannina,
qaapawonnenno lamm laalannina.
16 et sedep kodda diiyyo,
helpaan att laaffotin Mooha aypisannishsho,
nam iyaan att kidishshu ufunaatta diiy aypilaan att dehannishshoss ashshann "ameen" kida fottina?
17 shaakkes,
att porayteeshsh idikkass aypisannin,
hekoddu male nam pil amm inqimiyyamu.
18 oot antu inn dahenn qara tawoss kap hawhawi kiyyun ishaamiyyu maalla,
moohan aypisannin.
19 hekoddu male orr pil kollisaass maapar kristaanati lel kum lek kap hawi kiyyun ishaama kapa etin lel hen kap orrat upun qaapaawun ishaam kid ani hedikk.
20 kafoot,
qaapaaynin meddaap kinnaatta diiyyaa;
iyyaan nayq erkasa medda koddaa,
qaapaaynin lamm orraxashiyyaa koddaa;
21 sedenno halitt qarass,
" 'orr kap hawhawi kiyyu ishaamiyyonnenne
kap orr pilatennin siip sedi ishaamina,
et sedep koddonno amm an qara dakaynaanemu'
hekidin poldat"
hekidant tsaafant.
22 semmaalla kap hawi kiyyu ishaamot orr se amaana diinniyyoss ishaaka koddin male amm orr amaaniyyossemu.
him ishaamot lamm orr se amaaniyyoss ishaakb koddin male amm orr se amaana diinniyyossemu.
23 helpaan maapar kristaana orqudi qapamo et kristaanat mashshmashshayy kap hawhawi kiyyun ishaamiyyu illo orr kap se ufunaatta diiy shoke orr amaana diiy ullop deyan koddo,
orr se ishaamiyyoss,
"orr hin yaariyyan" kidinanemu?
24 hekoddu male et namat dahenn him ishaamu illo nam amaana diinniyyu shoke nam ufunaatta diiy ullop dey kid,
lel se iyyat dakayiyyu dahenn minann iddakaysamaannint;
settep lamm lel se iyyat dakayiyyu dahennen horat iyy qari quuramint.
25 hin mutsuraayy qalli dekadenno patapahinan,
settep lamm miintayyenno lahin eskinnina,
"shaakketass Moohot otanshaddu qalle kiyy!"
kidan Mooha shoomannina.
halitt helpa dinkam maapar kristaanaate fadusinniyyu
26 kafoot,
semmaalla maanan kodina?
helpa inn orqudi qapamishshane inn ila nam shokku laalet qapa,
iyy shokku kollilla qapa;
iyy shokku hin dekam patapahisa qapa;
iyy shokku kap hawi kiyyu ishaama qapa;
iyy shokku lel se furisa qapa;
daayy hin dahenn iyy kristaana qiminniyyu kodda iyy fadusinnin.
27 orr kap hawhawi kikkiyyu ishaamiyy et kinnaadane,
nam lakk shoke halpatt kodden illo orrkann orrkanna ishaamenii;
hin iyyaa ishaamiyyanenno nam shokku qallifuriyu.
28 hekoddu male nam furinninu et kinnaatta diiyyo lamm,
orr kap hawhawi kiyyun ishaamiyy otant maapar kristaana ila herui kidenii illo iissessenne Mooha ishaamenii.
29 himampayaanno lakk shoke halpatt kodden ishaamenii,
orr pil lamm him se lelam ikkim maana kodd orkela reehenii;
30 hekoddu male maapar se ila et Moohot nam shokku him dayyo,
se turaqatta ishaamiyyu rui kidu.
31 ikkim mashshimashshayn kollintanenne kokkaannintanness dahetaynenn orrkann orrkanna him hima fottihintan.
32 laaffot himampayya himampayyaass acacamin;
33 maana maalla,
Moohot Mooha andotat male amm Mooha orqari ooratemu.
qum it maapar kristaana dahenn ila koddishshop,
34 por orqudqapamaate iskatt herui kidenii;
ikkim qum halitt acaciyyu mitti acacaminaness male amm ikkim ishaaminan iyyaa hedaassantemu.
35 et akkan ufunaatta fadane manaddu talla appadamanaddu kaassadenii;
et iskattet maapar kristaana ila ishaamishsho deesot koddine.
36 kat lel Mooha inn kapeeshsh deyemu?
shoke lel Mooha inn kapanneeh paemu?
37 nam,
"antu himampayt" shoke "antu daayy laaffotatin qap" kidiyyu et kinnaado,
hin antu inn tsaaf acac pold koddaayy ufunaadu.
38 nam sed ufunaatta diiy et kinnaado iyyanno ufunashama diiyyu.