hoxsunt shaakk
13
1 etin kap namatennenne heka hitaymiyyaatin ishaama fottu illo nam hoxsatta diinniyyo qum silfa keehiyyot shoke lulawaan orshoshshoomiyatepin kodd kida.
2 etin daayy him qafnaadu,
iyaan dekamenno dahenn ishshaaku,
ufunatanno dahenn qafnaadu,
amaantet utawa por shokkooshsh por shokkop oohishshu nafenno qafnaadu illo nam hoxsatta diinniyyo antu aypot kida.
3 etin hin antu qapu dahenn hiyayya allqootu,
sohaawonno ikkim apittin doohinan tarpiyyu dayyua illo hoxsunt dapo,
amm ani koddinanemu.
4 hoxsunt duupannishsh;
dikkumaanno erkannin;
hoxsunt amm maashannumishshamu;
amm ipeepishshamu,
amm foojishshamu;
5 hoxsunt amm iyaan nam deesanniyy erkannishshamu,
amm hekoodd fadishshamu;
amm miironnishshamu,
amm qarakala dihannishshamu.
6 hoxsunt hin shaakket koddenn masmasin male amm nayquntin masmasishshamu;
7 hoxsunt awmitt hin it qari dey dahenn fottin,
awmitt amaanin,
awmitt irrayin,
awmitt qimin.
8 hoxsunt ulla kalt;
himat oohamiyy;
kap awshitt ishaamaanno allhatin;
ufunatanno oohamishsh.
9 maana maalla,
him innu ufunonno koddu him innu lelinkinnonno pakaddooh male amm dahennemu;
10 hekoddu male akkan hin innaakot kodd deyiyyane,
hin pakaddooh kodd all hatinan.
11 antu mexumiyyo meddaapin ishaamin,
meddaap qaapannin,
meddaap tooyin kida;
antu namaxashitt kodde lamm heka meumaawu allindiiy.
12 ammann afan kaawat ila tooyinkinnopin tisissiman akkin;
helpaanette lamm moohaanne innu indaannin orr akkinna;
ammann antu upu pakaddooh kida;
helpanette lamm qum Moohot dikkiyy an ufunaad mittassin ananno dikkinnina ufunaannina.
13 semmaalla,
amaantetanne irraxatetanne hoxsunt,
hin halpatt qimiyyan kallaannin;
it hin qara tawtu lamm hoxsunt kida.