daayy laaffot miilot
12
1 kafoot!
ammann lamm oot dayy laaffot miilot ikkim ufunaannintanessin fadin.
2 helpaan inn Mooha ufunaatta diittene areelanne areesh ruuhaman tsootsaan waara diinniyy kann antaayn heufutan.
3 semmaalla nam laaffot miilot iyy tur qeedditete "Yesuset iyy pisham!"
kidiyyu amm hekiyyamu;
settep lamm laaffot miilot iyy tur qeedda male nam,
"Yesus pold!"
kidiyyu kinnaatta diittaayyin inni lelin.
4 daayyada laaffot miilot hawhawwass kikkiyyan;
hor laaffot miilot shakkaah.
5 erkamaanno hawhawwass kikkiyyan;
hor poldat shokkooh.
6 paana erkamaatenno hawahawwas kikkiyy;
hekoddu male iyy dahenn nam heikketin erkanniyyu Mooha shokkooh.
7 daayy laaffot miilot hin hawhawi kikkiyyu nam nam ila akkaattaayy,
maapar kristaana dahenn qimisaass kida.
8 laaffot miilot nam shokkoss qallxishaakan ishaama daannin;
laaffot setteeh lamm ishshokkoss ufunatin ishaama daannin.
9 laaffot setteeh ishshokkoss amaantet daannin;
ishshokkoss lamm daayy dinisaat daannin,
10 shokkoss shammot erkasa,
ishshokkoss lamm lel hima daannin;
ishshokkoss lamm daayyada heka laaffot oshshittet koddaaddu shoke heka laaffot miilot koddaaddu reehat daannin;
shokkoss lamm kap hawhawi kikkiyyu ishaama daannin;
shokkoss hin kap hawhawi kiyyun ishaamam furisa daannin.
11 hekoddu male iyy hin dahenn erkusinniyyu laaffot miilot setteeh kida.
laaffot miilot hasayyess nam namass daayy hawhawi kikkiyyu daannin.
dakint shakkaah meella hawhawi kikkiyy qaft
12 dakint meella lek qafnaattu nafenno shakkaah kida.
hekoddu male qum meella dakint iyaan lek kodditete dakint shakkaah kodditep kristoos qum dakint shakkaah se meella lek qaftop kiyy.
13 ayhuta koddinonno kirikket koddinonno,
aylamma koddinonno aylamma kodda diinnonno,
dahaynon laaffot miilot shakkaahan ahalisamaannin dakint shokkaah koddin.
dahaynonn laaffot miilot shakkaah settin qeeddann.
14 dakint meella lek male amm meel shokkoohamu.
15 lukket,
"antu hark kodda diyy maalla amm meel dakint koddinhinamu" kidaan kat meel dakint koddaadd hatinamu?
16 lapittanno,
"antu iilt kodda diyy maalla amm meel dakint koddinhinamu" kidaan kat meel dakint koddaadd hatinamu?
17 dakint dahenn iinda koddit kid dakayot aha deyaay?
dakint dahenn lapitt koddit kid maanaann ashaayen?
18 hekoddu male Moohot hasayyenn meella shokkushokkutaddo dakint ila soorum.
19 dahenn meel shokkooh koddan kid,
dakint aha deyaat?
20 hekoddu male meella helek;
dakint lamm shakkaah.
21 iilt harkass,
"amm att ani fadusinnikkishshamu" kida amm fottintamu;
mashshanno lukkaass,
"amm ani fadusinnikkishshanemu."
kida amm fottinamu.
22 laaddu meella dakint hin tashshampayyaap kiyy seqareell iyaan fadusinniyy kida.
23 dakint ila meella serka dapep kiyy seqareellin serkinnin;
meella dakint hin innu indeesawinkinnop kiyyanno seqareellin serkinnin helinnin.
24 meellannu hin serka qapass lamm amm hin fadusinniyyanemu.
Moohot lamm meella dakint hin serka dapep kiyy ikkim serkaan kaanin qapaminan kodaan meella dakint ollinqaqqap.
25 iyyat sedep kod,
otant meella dakint ila reehaytet kinnaatta male mashshmashshaddu ikkim olli qaapanninaness kida.
26 dakint ila meel shokku et miidamiyyo meella dakint dahenn olle miidamin;
meel shokku et serkisamiyyo meella dakint dahenn olle masmasin.
27 innanno dakint kristoos;
mashshamashshaynessenno meella dakinshayyet kida.
28 semmaalla Moohot maapar kristaana ila ikkim namat mashshmashshayy erkamooyy qafnaanninoss kod.
paana sedenn,
turaqattaass orr hitaym,
lakkiyya himampayya,
halpattiyya kollisampayya,
ukkannass lamm orr shammot erkanniyyu,
ukkana daayy dinilaatenne daayy nam qarqaaraatenne daayy peashilaatenne daayy kap hawhawi kikiyyu ishaamaat idayy.
29 kat dahenn orr hitaymatemu?
dahenn himampayyaamu?
dahenn kollisampayyaamu?
dahenn iyaan nam shamusinniyy erkannimu?
30 dahenn daayy dinila qapanemu?
dahenn kap hawhawi kiyyun ishaamimu?
dahenn iyaan op kap hawhawi kiyyun ishaamen furinnimu?
31 semmaalla daayy heikk qareell kiyyu akkatta dikkiyy fadada.
ammann lamm paana heikk qara tawun inni akkinnina.