11
1 qum antu kristoos paahnaanniyyop innanno an paahnaadaa.
tampet shoomatta
2 oot inn awmitt an qaapannishanenne kollilaan antu inni dayy qimisannishan lushannishshan maalla innin aypisannin.
3 hekoddu male diirt heikketess mashshat kristoos,
iskattass lamm mashshat diirt,
kristoosessenno mashshat Mooha appa koddaayy ikkim ufunaannintanessin fadin.
4 diirt mashsh qarann uuwaat qeeddiyyu illo Mooha dinkamanniyyu shoke him leliyyu dahenn kristoos se iyy qari hayyotum qapu deesannin.
5 settep lamm,
iskattet mashshadd qarann uuwaat qeedda male Mooha dinkamishshu shoke him himishshu dahenn diirt se it qarin hayyotum qapu deesannin;
iskattet mashshadd qarann uuwaat qeedda diinnishshu qum it iqqar haatattep tooyamin.
6 et iskattet mashshadd qarann uuwaat qeedda diinnishshu koddito iqqar muujattu;
et lamm iqqar muujatta shoke haatattot it liilinniyyu koddo uuwaat iqqarin qeedditu.
7 oot diirt paahnat Moohaatenne iyy serka Mooha iyyin akkaanniyyan kodd maalla,
amm mashshayy qarann uuwaat qeedda iyy fadusinniyyamu;
iskattet lamm serka diirtat kida.
8 maana maalla,
iskattet diirt ila dey male amm diirt iskattet ila deyemu.
9 settep lamm iskattet diirt maalla uumam male amm diirt iskattet maalla uumamemu.
10 sedenn hitaymiyya Mooha minann iskattet hayyotum kannaatt kinnaattaadd ishaakisa uuwaatin iqqar qeedditu.
11 hekoddu male pold kapeeshsh iskattet diirt male diirtanno iskattet male amm kallaaniyyanemu.
12 maana maalla,
qum iskattet diirt ila akkaattep diirt lamm dalanniyyu iskattet ila kida.
hekoddu male heikk Mooha kapa akkaannin.
13 intu inn mashshayyi tooyaa;
iskattet uuwaatin iqqar qeedda male Mooha dinkamattaadd hedikkamu?
14 mashsh deerawsattot diirtass deesot koddaayy uuma naf innu kollinniyyomu?
15 iskattetass lamm mashshat daassam,
iqqarin deka kodd maalla,
mashsh derawusattot itass serka kida.
16 lamm nam sed shiitta fadiyyu et kinnaado,
innonno maaparadda kristaana hepilanno sed pateeshsh amm akkan pil innu ufunu hekiyyanemu.
eetot pold
(mati. 26,26-29; mar. 14,22-25; luqaa. 22,14-20)
17 inn orqudi qapamishshan iyaan nayqass male amm iyaan dikkassemu;
semmaalla kollilaan antu ammann inni daanniyyun amm inn aypisanninkiyyamu.
18 heikk turi qattisan,
orqudiqapama maaparaayn ila reehaytot kinnattayyin dakay;
hin antu dakayenno por shokkonn shaakket koddaaddu amaaninkiyy.
19 orr shaakket qap ikkim reehaminan akkaanninaness reehaytot otanshayn ila kinnaatta fadusinnin.
20 helpaan inn orqudi qapamishshane amm eetot poldati damimu.
21 maana maalla,
oot inn helpaan inn damishshane orrlusha male hawhawi damishshan maalla,
nam shokku tuffiyy shokku lamm taaroonnin.
22 kat man inn ulla damintanenne ulla ukintan inqaftanemu?
shoke maapar orr Moohaat tuffannimu?
shoke orr se akkan dap deesannimu?
kat maanan inni kidina?
sedennin inn aypisanninamu?
shokkooh nafess amm inn aypisanninhinamu!
23 hin antu pold qara qeeddad innassenno tarpiyy hin iyy.
aww se Yesus poldat tarpisam daassame awwadd laaqqot qeedd,
24 Mooha aypisad,
qall mooss illo,
"hin asohaawu iyaan ootaayn daassamina;
sed anin qaqqaapadaa" kid.
25 settep lamm eetot kanna waallet qeedd illo,
"waallet hin kaka awshiyya hin diikaawun koddina;
helpa ukishshan min sed anin qaqqaapadaa" kid.
26 helpaan inn laaqqot sed damishshanenne waallet sedenno ukishshane dahenn hak poldat deynoss toxshayy ishaamintan.
27 semmaalla nam paana kodda diinniyyun laaqqot sed damiyyu,
waallet pold ukiyyu dahenn,
soha poldatenne diikaayy tuffattaayyenn kaassawsamina.
28 semmaalla namat laaqqot sed damaanne waalleet sed uka tureeshsh mashshayyi ittooya iyy fadusinnin.
29 nam soha pold maana koddaaddu reeha male laaqqot sed damiyyonne waallet sed ukiyyu mashshayyess horat damin ukin.
30 inn ila orr lek tashshenenne baaqen,
shakkan lamm raawen sed minann kida.
31 etin mashshaynu ittooyinn kid amm horat innu qari quuramaatemu.
32 hekoddu male,
ikkim ukkanna husslah olle horat innu qarass inquuraminess poldat ammann horat innu qari quuran innu tushin.