tsootsa shoomattot amm fadusinniyyamu
10
1 kafoot,
appadaannu dahenn urrashshet se kannaatt kinnaattaddonne pakatet ilin tarpaaddu ikkim ufnaannintanessin fadin.
2 iyyaa dahenn muus olle kinnaattaass urrashshet settenne pakatet settin ahalisamen.
3 dahenn damaan Moohot dayy damen,
4 dahenn ukot se Moohot dayy uken;
settenno,
ukot shilk hekat Mooha se iyyaa kanneeshsh anniyyu ila sohatt;
shilk settenno kristoos kida.
5 lamm Moohot iyyaa ila iyyaan lekenn amm hemasmasemu;
semmaalla nakulalless sunken allraawen.
6 qum iyyaa iyaan nayq hadadenep ikkimin innonno iyaan nayq inhadannines hin paahnat innu koddit.
7 qum it,
"siipat damaanne ukaass qaaen,
hirpassenno sohaden" kidant tsaafantep qum iyyaa ila orr shokku tsootsa shoomadenep innanno tsootsa shoomatta diiyyaa.
8 qum iyyaa ila orr shokku arpalumenepin kat innonno arpaluminnamu;
oot iyyaa sedep koden maalla iyyaa ila nam kum hund lakkenne halpatt lashsh shakkaah raaw.
9 qum iyyaa ila orr shokku pold aekkawusaden illo maakan pokamen raawenep innonno pold ekkawusatta diinnaa.
10 qum iyyaa ila orr shokku kumuliyaden illo hitaymishsh toxtatin allpatenep kumuliyatta diiyyaa.
11 hin dahenn paahnat koddaass iyyaa qari paen,
innu hin sapan muutayta qara kiyyassenno ikkimin qara kollinnu innu tsaafamen.
12 semmaalla nam afa ellep it ikkinnaannishshu sunka tura illushadu.
13 ekkawusama nam heikk qari deyiyyu qara tawu amm inn qari hepaxemu;
oot Moohot iyy amaanam kodd maalla,
ekkawsama humunayn qara tawun ikkim ekkawsamintan amm inn kodinamu;
helpaan ekkawusamot inn qari paxo irrot inn induupannittan inni daattaann paana inn uqqalle intarpintan inni dikkinnina.
14 semmaalla moyshadoot,
tsootsa shoomatta ketta allsekaadaa.
15 antu maalla sedep inni kidiyyu iyyaan qalliqaapanniyy koddaaynenn kida;
semmaalla hin antu ishaamiyyu inn mashshayni wokaa.
16 waallet qoran hin innu Mooha aypisattan qootanninnikinnu it diik kristoos olle shokkohum qaftu ihinemu?
laaqqot hin innu moossanninkinnu it soha kristoos olle shokkohum qaftu inhinemu?
17 oot laaqqot hin shakkaah koddit,
innonno iyyaan laaqqot shakkaah sett qootanniyy koddin maalla,
iyyaan lek koddinu nafenno innu soha shakkanooh kida.
18 hin siip israaelet erkanniyyan tooyaa;
iyyaan laaqqaan damiyy,
por laaqqa uqqari dehasa olle shokkohum inqapanemu?
19 antu sedep kidiyyu,
afan laaqqa tsootsa dehaadenne tsootsa heriy qapan kidiyyop inni kinnaanninmu?
20 iyyokku;
orr Mooha ufnaatta diiyy qayyass laaqqa dehannin male amm moohaassemu.
semmaalla ikkim inn qayy olle shokkohum qafnaannintan amm fadinkiyyamu.
21 waallet poldatenne waallet qayy ukaass amm fottihhintanemu;
damot poldatenne damot qayy amm qootatta fottihhintanemu.
22 kat sed erkasaannin pold maxashannumusinninnamu?
innu iyy qareellin iyyaan qiqqim koddinemu?
23 "heikk hedaassamen",
hor amm dahenn koddimu;
"heikk hedaassamen",
hor amm dahenn nam qiminnimu.
24 namat mashshimashshayy iyaan orr shokku koddinanno iqaapadu male iyaan iyyi koddinaah fada diiyyu.
25 soha kapiyaalle kashamiyy dahenn qaapaynalle ijjawusatta male damaa.
26 maana maalla,
hussanne hin uqqar innaakenno dahenn heka poldat.
27 orr Mooha amaana diinniyyu ila et nam shokku inn hembu inn illo anta hoxsaattane qaapayn ilaat ijjawusatta male hin iyyaa inn dehanniyyan damaa.
28 et lamm namat,
"hin iyaan tsootsa dehaad" inni kido oot nam se inni leletenne qaapaayn maalla dama diiyyaa.
29 antu sedep kidiyyu,
oot qaap nam sett maalla male amm qaapaayt maallamu.
kat maana maalla qaap nam pil minan hasaawu dawramin?
30 etin Mooha aypisattan damiyyu koddo,
hin antu moohan aypisanniyyu minann maanaassin waaramin?
31 semmaalla et damishshan shoke ukishshan shoke akkan heikk erkannishshane dahenn serka moohaati erkayyaa.
32 ayhutaassenno koddu,
orr ayhuta kodda diiyyessenno koddu,
maapar kristaana heka moohaatessenno koddo aynossenno kohayt kodda diiyyaa.
33 qum antu,
ikkim namat dahenn dinanninu,
hin ani koddina fada male iyaan orr shakkani koddin fadan hin antu erkanniyyu dahennin nam heikk masmasusinniyyop innanno settep kodaa.