iyaan orr hitaymat fadusinniyy
9
1 iyaan antu hiinu erkasa fottinonemu?
antu nam hitaymatin hinemu?
antu poldaaynu Yesus kristoos inxakkinemu?
poldi erkasaawonn inn qunda erkamaawotin hinemu?
2 orr pilass etin nam hitaym kodda diiyyu nafe shaakketass antu innass nam hitaymat.
maana maalla,
kiyyat se inn pold olle qaftanenn inn mashshayness maatam nam hitaym koddaawu ishaakusinniyyu kida.
3 orr an qari ishaamiyyoss mitaattilaawu hiniyya.
4 iyaan innu daminnonne ukinnu akkatta innu fadusinnishshomu?
5 orr hitaym hin shakkanapanne insharadda poldatepanne qum betsirosep innu aat kirstaanishet kodditin iolle antta fottaanemu?
6 shoke iyyaan erkaman payyahan kallaannina parnapaasenne anaahamu?
7 apure nam kalisot male kodashshetayyin wotaattar koddiyyu erkanniyyu hekiyyamu?
shoke nam woynet dihiyyu illo qundaadd dama diinniyyu ayno?
nam heelt shikinniyyu illo aanna uka diinniyyu ayno?
8 antu sedep kidiyyu qum qaap namatepamu?
halittanno sedep kidiyyomu?
9 "horm uunt mijirinniyuu kap hida diiyii."
hekidant halitt muusi qari tsaafant.
Moohot sedep kidiyyu hormada qaapattaanemu?
10 iyyat sedep kid innu qaapattaannin hinemu?
heyye,
shaakketass iyyat innu maalla sedep kid,
se peehampayt irraxatetin peehiyyu,
hin mijirinniyyonno irraxatetin mijirinniyyu,
ikkim olle qootanninoss kida.
11 innu lel Mooha inni seyinne,
etin hin innu fadusinniyy inn qara qeedann kid inn takaamu?
12 et orr pil sed inn qara qootanniyyan koddo,
innu ashshannin sed qareell qootatta diinnina?
hor amm innu sedep henkodinemu;
sedep kodaaynonno ikkim lel masmasunt heka kristoos all inxellini akkan hexikket duupattan fottina kidaan kida.
13 ikkim orr man miilot talla erkanniyyu damooddu man miilot talla akkanniyyanenne orr por laaqqa uqqari dehasa kapeesh erkanniyy laaqqaan qara qootanniyyan damiyyan inxuftanemu?
14 settep lamm orr lel masmasunt kollinniyyu ikkim erkamooddu qara kalaat akkanninaness poldat hexacac.
15 antu lamm hin dahenn ila amm akkan shokkooh naf henqeeddademu.
sed antu tsaaf,
amm maanaass hin ani daassama diiyyen kidaassemu.
para namat hin antu infoojiyyu aypot koddinu kapa etin toy kid ani hedikk.
16 lel masmasunt kollisaawu koddonno amm iyaan antu infoojinu henqapamu;
koomaytet ani koddite,
etin lel masmasunt kollisa diiyyo pelawu anass.
17 etin sed hasawun erkayyo,
tashshoshawoss kalisotin qafnaannina;
etin has patin erkayyo lamm,
kaadum se an harki haayamin kaysiyy male amm akkan antu erkayy hekiyyanem.
18 semmaalla,
kalisot tashshoshawu maana?
kalisot tashshoshawu lel masmasunt kollisan hin antu akkannaay alldiittan erkama lel masmasunt kalisot male kollisa kida.
19 antu amm aylet namatemu;
hekoddu male paana antu fotten orr lek dinisaassin aylet nam heikk kodd.
20 helpaan antu orr ayhuta olle kinnaanniyyo orr ayhuta dinisaassin orr ayhutaatep kallaad;
antu halitt kannaatt kinnaatta diiy nafenno iyyaan halitt kannaatt kiyy dinisaassin nam halitt kanneett kiyyop kodd.
21 antu nam halitt Mooha qapu illo halitt kristoos kela kiyyu kodditete,
siip se halitt dap dinisaassin nam halitt dapep kinnaad.
22 hin tuffasham dinisaassin nam tuffashamep kinnaad.
paana heikketin orr karayy dinisaassin kid dahenn olle akkan heikketin iyyaap kodd.
23 hin dahenn antu kodiyyu,
qoran lel masmasunt qootattaass kida.
24 helpa op nam turin qatta feeliyyane ikkim nam heikk feeliyyu illo nam se inpusheeh hin iddaassamiyy akkanniyyu inxuftanemu?
semmaalla innanno hin inni daassamina akkatta feelaa.
25 orr nam turin qatta feeliyyu dahenn dakinshaddu tashshusinnin kollin;
iyyaa maalla sedep tashshiyyan qoyqoyt alpatinonne helpaaseeh kinnaanniyyu qeeddattaass kida.
innu lamm qoyqoyt pata diinninonne haka parparat kalaanninu akkattaassin ittashshusinnin.
26 settep lamm antu amm nam qaap male aypoti feeliyyopin feelimu;
amm antu nam se hayya shooma aypoti harka deranniyyopin kiyyamu.
27 hekoddu male etin orr shokku lel masmasunt kolliyyu kanna ikkim antu mashshaw iyy allkasham inkoddinessin dakintawu lushattan ikkim ani acacamintu kodusinnin .