sohaan tsootsa dehaad
8
1 oot sohaan tsootsa dehaadet,
dahetaynonn ufunat qafnaattaynu henxufn.
ufunat nam foojusinnin;
hoxsunt lamm nam qiminnin.
2 nam "ufunatin qap" kidiyyu et kinnaado,
amm sanu qum it ifadusinnishshu mitti hexufnaademu.
3 nam Mooha hoxsanniyyu lamm Mooha kapann iyy ufunasham koddin.
4 semmaalla sohaan tsootsa dehaad dama et koddo,
tsootsa iyyaan kiyyat dap koddaaddonne Mooha shokkooh pateeshsh Mooha pil kinnaatta diittaayy henxufn.
5 akkan moohaanne pold kidamiyy iyyaan lek hekiyyan.
hekoddu male moontallessenno koddo husslah qarassenno iyyaan Mooha kidamiyy et kinnaadanenno,
6 innu lamm Mooha appa shokkooh iyy akkan heikk iyyin kodden,
innonno iyyi kallaanninkinnun qafna.
lamm pold shokkooh,
Yesus kristoos se heikk iyy kapin kodden,
innonno hekooyy koddinin qafna.
7 hekoddu male amm namat dahenn sed heupamu;
oot orr karatiddu turann tsootsa shoomatta kollen maalla,
hak awwet et soha damiyyane afa sohaan tsootsa dehaadetep tooyin;
semmaalla qaapaaddu iqoj koddaan oshshumiyyan.
8 et kodditonno,
damot amm Mooha kapop nam dehannishshamu;
etin dama diinno amm akkan innu qara kellawin hekiyyanemu.
etin dannonno amm akkan innu akkanninnu hekiyyanemu.
9 hekoddu male hasaynin damaann orr se amaantetin qima diiyyess kohayt kodda tura illushadaa.
10 hed se ufunat qapu et man tsootsaat laitu damishsho,
nam amaantetin qima diiy hed akko,
nam hin hed akk sohaan tsootsa dehaad damaass qaapaayy idikkisad koddinomu?
11 semmaalla kafittaayt hin amaantetin qima diiyyenne kristoos iyy maalla toy,
ufunashayt minan patina.
12 paana sedenn kafaayin hin kristaana kodd qarakalaannenne qaapaaddu se qoj peesasaann kristoos qar kalin.
13 semmaalla damot et kafittaawu kirstaanishshass kohayt koddishsho,
kafittaawu kohaytisa tura amm soha daminhinamu.