halitt oot orqeeddaat daassam
7
1 oot kaassiy se inn ani tsaafitenetess,
namat et iskattet kettin paxa diiy kid hedikk.a
2 hekoddu male oot arpalumat innayq kodd maalla,
nam mashshmashshayyi aat qafnaadu;
iskattetanno mashshamashshaddi appa manadd qafnaattu.
3 appat iyaan inkot manayyet fadusinniyy iti kaysiyyu;
settep lamm inkot iyaan appamanaddeti fadusinniyy ikkaysittu.
4 iskattet aatunt amm dakintadd qarann hayyotum heqaftamu,
hayyotumat heka appamanaddet;
settep lamm nam aat qeedd dakinshayy qaran amm hayyotum heqapamu,
hayyotumat heka inkotmanaayyet.
5 eti dinkamin kokkaattaa ollisenan helpasseeh koddo male orrdawura diiyyaa;
sed minann illushatta diittan seetsanat inn ekkasa tura mitaataa ollin kinnaadaa.
6 antu lamm sed inni leliyyu korsaap male amm acacapamu.
7 namat dahenn qumaawop kodd kid hoxsaanninkiyy;
hekoddu male nam namass Moohot daayy hawhawi kikkiyyu dayy;
nam shokku et daayy shokku qafnaado ishokku lamm hepil qap.
8 orr aat qeedda diiyyenne iskatt appada manaddu qarin raaweness sedepin kidin,
et qeedda shoke aatuma male qumaawop kallaadan kid hedikk.
9 hekoddu male hadat sohaatin dooha kapa et illushatta fotta diinniyyane aat qeedda shoke aatuma iyyaa hedikk.
10 orr se aat qeeddess shoke hin aatumess lamm sedepin kidin;
acac hin heka poldat male amm hekaawomu;
iskattet aatunt appamanad ketta reehatta diittu.
11 et reehattu koddonno aatuma male kallaattu shoke appamanad olle araarantu;
settep lamm appaanno inkotmanayy purrisa diiyyu.
12 shakkanassenno an porawooshsh sedep kidin male amm poldemu;
diirt kristaana kodd aat amaana diitt qapu et kinnaadu it illo iyy olle kallaatta fadishshu koddo all it diitta diiyyu.
13 lamm iskattet kristaana koddit irishsh amaana diinniyyu qaftu et kinnnaattu illo iyyat it olle kallaata fadiyyu koddo all iyy diitta diittu.
14 maana maalla,
appa Mooha amaana diiy inkotmanayy minan nam Mooha koddina.
inkot Mooha amaana diittenno appa manadd se amaan minann nam Mooha koddint.
hin inkinnekuless meeddaann amm orr Mooha kodda fottinanemu.
et paana sedin kallattane meeddaann orr Moohaat koddinan.
15 hekoddu male nam hin amaana diinniyyu et reehatta fadiyyo hereehadu;
kristaanat appa koddu shoke inkot koddonno amm paana sedenn hehidamenemu;
Moohot innu hemb,
andotin kallaattaass kida.
16 yent,
heufutamu shoke appa manaytet dininninta?
yem,
hedenno heufutamu shoke inkot manaytet dininnint?
Moohot nam hembiyyo op uqqalle kiyyanin kallaatta
17 et koddonno,
namat mashshimashshayy qum poldat iyyi dayyepanne qum Moohot iyy hemb mitti kallaadu.
settep lamm maaparadda kristaana dahennessin lelin.
18 aynonno et karrasama kanna hembamu koddo,
por karrasama diittaatep mitaata diiyyu;
et aynonno karrasama male hembamu koddo hekarrasama diiyyu.
19 karrasamaanno koddo karrasama diittaanno amm iyaan awta qapamu.
iyaan qunda qap,
acac Mooha lushatta kida.
20 semmaalla nam nam paana se helpaan Moohot iyy hembiyyo iyyat uqqalle kiyyun kallaadu.
21 helpaan Moohot hed hembe att ayletemu?
amm rakkot hekishshamu;
qaapa diiyii;
et hed hayyiyane owo kidi.
22 maana maalla,
nam aylet kodd illo poldat iyy hemb pold kapann aylum kela sohad.
settep lamm nam aylet kodda male hembam aylet kristoos kida.
23 oot Moohot heriyin inn pidd maalla,
aylet nami kodda diiyyaa.
24 kafoot,
nam mashshimashshayy qum iyyat hembam mitt Mooha olle kallaadu.
orr haypaat qeedda diiyyenne iskatt appada qarin raawen
25 oot iyyaan aatuma diiyyetess amm acac antu pold kapa qeeddad hekiyyamu;
hekoddu male,
oot poldat ani mutsurood maalla,
nam amaanam koddannin korsa sed daannin.
26 oot helpayn innu ammann uqqalle kinnu iyaan nayq kodden maalla,
porayn ila kinnaattin kid hedikkap ani kinnannin.
27 lamm et aat qeedditu koddo purrisa fada diiyii;
et qeedda diitto,
qeedda fada diiyii.
28 hekoddu male et qeeddito amm juppot hedi koddintamu:
settep lamm et inant aatuntu koddo amm juppot iti koddintamu.
hor orr aat qeeddiyyanne iyyaan aatumiyy are husslah qara rakkot lekit iyyaa qari deyin;
hadashawonno ikkim rakkot sed ila passannintaness kida.
29 kafoot!
antu sedepin inni kidin:
sapanat hehummaoodi;
sed kanneeshsh nam aat qapu afa qafnaatta diiyyep kallaadu.
30 hin pooyiyyanno afa pooya diinniyyanep,
hin masmasiyyanno afa masmasa diinniyyanep kallaadenii;
hin mehadda heriyyanno afa akkan dapenep;
31 orr akkan husslahatin erkawusanniyy afa inxerkawsatta diinniyyanep kallaadenii.
maana maalla,
kallat husslah sed itarpintu kida.
32 semmaalla ikkim akkan shokkooh nafi baaqqura male kallaannintanessin fadin.
nam aat qeedda diiy oot iyyat pold masmasusisa fadiyyu maalla qaapatiyy erkama poldi qara kiyy.
33 hin aat qeedd lamm heka husslah sedetenne iyaan iyyat aatayyin masmasusinninu qaapannin.
34 paana sedenn qaapayyenno qalliqootamin.
settep lamm iskattet aatuma diittenne inant,
oot iyyaa sohaanne nafsetin miila fadiyyan maalla,
qaapatiddu erkama pold qara kiyy.
hin aatunt lamm oot it irishadd masmasusisa fadishshu maalla,
heka husslahat qaapannin.
35 antu sedep inni kidiyyu,
iyaan dikk inni qaapattaann male amm inn baaquurisaassemu;
hadashawonno ikkim inn paana fadusinniyyun kallaannintanenne qaapaann qalliqootama male mutsuroonn qalleelli poldi erkannintaness kida.
36 hekoddu male et nam shokku inant iyyat rapad aldiitta fadu illo paratidd sekaattan aanu,
illo all it diittayy afa iyaan nayq it qari kodaap ikinnaadu,
iyyat lamm it qeedda fado,
qum se iyyat hoxsaad qari orqeeddenii;
sedep kodaayy amm juppot ikoddintamo.
37 hekkoddu male et nam shokku mutsurooyy qimisadu,
akkan iyy koomiyy teekan,
iyyat hin hasaayy fadiyyu lushatta fottonne inant se iyyat rapad qeedda diitta kutadu koddo iyaan dikk errkayy.
38 semmalla nam aat qeedd iyaan dikk erkayy,
nam aat qeedda diiyyenno iyaan aaku erkayy.
39 iskattet hak appa manadd kiyyatan kiyyoss halitt orqeeddaaten hehidant;
et appa manadd toyo lamm nam it hintu olle aatuma fottint;
hekoddu male nam hin it olle aatumishshu kristaana kodda fadusinnin.
40 qaapaawonn lamm et aatuma male kallaannishshu koddo seqareell masmasuntin kallaannint.
ananno lamm afa laaffot Mooha an ila kishshop ani kinnaannin.