ollisena diitta otant kristaana ila kiyyu
6
1 otanshayn ila et nam shokku nam shokku olle dapat qafnaado kristaana turi ollin ishaama kapa ashshann orr amaana diinniyyu turop horat orr qari quurusisa annin?
2 ikkim kristaanat husslah qari horat quurinu inxuftanemu?
inn iyyaan husslah qari horat quuriyy kodditete,
ashshann hin qoj qari horat quurot inn pushin?
3 kallat husslah diiy male ikkimin hitaymiyya naf qari horat quurinnu inxuftanemu?
4 semmaalla et dapat sedep kishshu kinnaatto,
orr se maapar kristaanatin tuffasham turop ashshann orrdeeha annin?a
5 inn deesasaassin sedep inni kidin.
otant kaf shokkooh ila nam qimaayt koddinu qall qaapanninu inn araarsinu teekemu?
6 kat kaf shokkooh orr Mooha amaana diinniyyu turop orrdeeha ollin antot koddiyyamu?
7 innaah orrdeehaann pushmaattaaynipa.
sekapeeshsh et inn qarakalmaattan kid hedik inhinemu?
settep lamm et inn malmatiyyan kid innass hedikk inhinemu?
8 hekoddu male inn mashshayness kafaayn qar kalin qari patinnin.
9 nayqisampayya daamum Mooha taya diittaaddu inxuftanemu?
patandapa diiyyaa,
arpalayya shoke orr tsootsa shoomanniyyu shoke orr nyauuriyyu shoke diiddaan diidda olle arpalumiyy;
10 shoke keraxala shoke hin kodashsheti hanhamiyy shoke taarampayya shoke hin mahh nam qara patinniyy shoke ponqampayya amm daamum Mooha taynanemu.
11 inn ilanno karatinn sedep kishshan makess.
hekoddu male ammann mahh poldaaynu heka Yesus kristoosenne laaffot moohaaynotenn jupposhinn hejiqant,
inn miilten,
tsillampayya kodditen.
dakint serka Moohaat dehasa
12 "heikk anass daassamen."
hekoddu male amm dahenn iyaan ani koddiyyamu.
"dahenn anass dassamen."
hekoddu male amm shakkanooh nafess aylet koddinhinamu.
13 "dama kardass;
kardanno damaass."
Moohot lamm lakkaddon all iyyaa patinnina.
hekoddu male dakinshinnu lamm poldi erkasaass male amm arpalumassemu;
poldat dakinshaynoss iyaan fadusinniyy daannin.
14 qum Moohot pold toxt ila sohashshiyyep;
innonno irroshayyenn toxt ila sohashshinnina.
15 dakinshinn meel kristoos koddaadd inxuftanemu?
illo meel kristoosin qeeddina meel kalayyatat kodinnamu?
amm koddintamu.
16 nam kalayyat olle kiyaanniyyu,
kalayyat se olle soha shakkanooh koddaayy inxuftanemu?
"iyyaa lakkaddun soha shakkanooh koddin" hekidant tsaafante.
17 hekoddu male nam Yesus pold olle kiyyanniyyu,
iyy olle laaffotann shokkooh kida.
18 arpalum ketta sekaadaa.
juppot namat erkanniyyu dahenn amm dakintayy qarassemu.
nam arpalumiyyu lamm dakintayy qarass juppot erkannin.
19 dakinshinn man miilot heka laaffot miilot se inn Mooha qara qeeddatten koddaadd inxuftanemu?
semmaalla inn heka Moohaat male amm hekoonnamu.
20 oot inn heriyin piddanten maalla dakishaynenn Mooha serkiyyaa.